“Ħamsin xahar ilu ġejt quddiemkom b’sentiment ta’ kuraġġ u tama. Bi proġett ambizzjuż. Kont tlabtkom il-fiduċja tagħkom fijja u filwaqt li bl-eluf kbar fdajtu f’dan il-moviment, ftit kienu dawk li emmnu li l-ħolma tiegħi, tagħna, li Malta tkun l-aqwa fl-Ewropa tista’ sseħħ”
Qal dan il-Prim Minsitru Joseph Muscat, fl-ewwel diskors ta’ din il-kampanja elettorali.
Qal li llum ftit għad fadlilhom dubju li grazzi għall-poplu, u bis-saħħa tal-għażliet li saru, Malta qegħda fuq quddiem u fil-quċċata tal-Ewropa.
Il-Prim Ministru qal li dak li l-poplu beda flimkien ħamsin xahar ilu għad fadallu biex jintemm.
“Ninsabu biss nofs triq. Biex Malta tibqa’ l-aqwa fl-Ewropa, fadlilna x-xogħol x’nagħmlu. Il-proġett tagħna lkoll għadu ma spiċċax. Dak li rnexxielna nagħmlu għamilnih flimkien magħkom u bis-saħħa tagħkom.”
Joseph Muscat qal li kulħadd iħoss il-progress li sar f’pajjiżna, minkejja l-Oppożizzjoni kontinwa. Minkejja l-forzi konservattivi u l-establishment. Minkejja li tul it-triq kien hemm min ipprova jifred lil dan il-poplu li baqa’ u se jibqa’ magħqud.
“La ma waqqfuniex mill-progress sal-lum, qed nitolbokum biex ma tħallux l-istess forzi jwaqqfu lil dan il-pajjiż milli jkompli jissaħħaħ. Jilħaq quċċata oħra. Tħallux lil min jifridna” qal il-Prim Ministru.
Qal li jinsab quddiem in-nies għax ma jibżax mill-ġudizzju. Ma jibżax iħares f’għajnejn omm tal-familja, f’għajnejn ħaddiem fuq paga minima, f’għajnejn anzjan jgħix bil-pensjoni jew f’għajnejn dik it-tifla li għad fadlilha ħajjitha quddiemha u jistaqsi:
Tridu tkomplu mexjin ‘il quddiem?
Tridu tkomplu fit-triq tal-progress?
Meta beda din it-triq, spjega l-Prim Ministru, kien anzjuż.
Ried li flimkien ma’ sħabu jara l-ekonomija ta’ Malta terġa’ tibda tissaħħaħ, tiehu n-nifs u tiġri ‘il quddiem.
Meta kien jitkellem fuq tkabbir ekonomiku, ma kienx jitkellem fuq numri. Dan il-Gvern sab sisien mtaqqba, b’nies fi Brussel jgħidu lil Malta li jew se taqtgħu mill-ispiża tas-saħħa, jew mill-benefiċċji soċjali, jew mill-istipendji jew mill-pensjonijiet, jew se nidħlu aħna biex naqtgħu l-ispejjeż tagħkom, kif għamlu ma’ pajjizi ferm ikbar minna.
Ċara it-tweġiba ta’ Joseph Muscat:
“Għednilhom mhux talli se naqtgħu. Talli se nagħtu, u iktar ma nagħtu iktar se naqilgħu. Iktar se noħolqu ġid u se nqassmuh fost il-familji Maltin b’ġustizzja. U dak li ġara.”
Raħsu l-kontijiet għal kulħadd – familji u negozji u ingħatat stabbilta’ fil-prezz tal-petrol u d-diesel.
Daħal iċ-childcare b’xejn – għax il-Gvern emmen fil-potenzjal li iktar ġenituri joħorġu jaħdmu. Emmen li l-ekonomija kienet se tikber anke bis-saħħa ta’ numru ta’ nisa rekord fid-dinja tax-xogħol.
Ingħataw iktar benefiċċji soċjali lil min irid jaħdem – għax il-poplu Malti huwa bieżel u jrid jaħdem.
Sar investiment bla preċedent fl-edukazzjoni – għax l-futur ta’ pajjiżna jiddependi fuq uliedna se nerġgħu noffru l-aqwa inċentivi għall-għalliema tagħna.
Ġie investiment lejn Malta li ma daħalx bil-qatra il-qatra, imma bil-gelgul – kien hemm record ta’ investment lokali u barrani f’Malta.
Dan kollu wassal biex qatt daqs illum ma kien hawn record ta’ nies jaħdmu. L-inqas livell ta’ nies qegħda fl-istorja. Il-pajjiż li ra l-ikbar żieda ta’ ħaddiema fl-Ewropa. X’ma nkunux l-aqwa fl-Ewropa.
“Fl-istess ħin rajna l-ewwel Surplus fil-kaxxa ta’ Malta minn żmien il-Perit Mintoff. U ma rekkinnihomx il-flus” żied jgħid il-Prim Ministru.
Spjega li dawn il-flus intużaw fost min l-iktar li għandu bżonn. F’din il-leġislatura ingħatat l-ewwel daqqa soda lill-faqar.
Barra minn hekk, qal Muscat, ingħataw drittijiet u Malta saret fost l-aqwa fid-dinja f’dawk li huma dittijiet ċivili.
Għaraf li saru żbaljajna matul it-triq. Tkellem anke fuq l-iżbalji u talab skuża umli ta’ meta saru dawn l-iżbalji.
“Imma min kien jaħseb erba’ snin biss ilu li se ndawru r-rotta ekonomika, se nrażżnu d-dejn u ndawru deficit f’surplus, se jkollna l-Maltin kollha li jridu jaħdmu fix-xogħol, li se ngħollu l-pagi, l-istipendju, il-pensjonijiet u naqtgħu t-taxxa lil kulħadd. Raħħasna l-kontijiet u għalaqna l-vit tal-power station li kienet tarmi f’imnifsejn uliedna l-iktar żejt li jniġġes” qal Muscat.
Fakkar kif l-Ewropa ġiet lura – u mhux talli ma qaltilnix aqtgħu l-ispiża… talli qed jgħidulna għidulna kif għamiltu ħalli nimxu fit-triq tagħkom.
“U għalhekk qiegħed hawn illum quddiemkom… mingħajr biża’ imma b’ħafna umilta’… nistaqsikom tridux ħames snin oħra ta’ ġid” qal Joseph Muscat.
Qiegħed quddiemkom noffrilkom l-għażla, spjega Muscat.
“Tħallux lil min jgħidilkom f’din l-elezzjoni mhemmx għażla. Din hija għażla bejn jekk tridux intom li nkomplu mexjin fit-triq tal-progress. Jew tridux treġġgħu l-arloġġ lura. Lil min falla għal tant snin qabilna temmnuhx li se jbiddel u jirnexxi issa. L-għażla tiegħek hija ċara: Lil min trid ikompli jmexxi l-ekonomija fit-triq tal-progress għall-ħames snin li ġejjin? Tinsewx li dawn huma l-istess nies. Anzi, issa tfixklu aktar u spiċċaw Koalizzjoni ta’ Konfużjoni.”
Fakkar li dawn huma l-istess politiċi li ħallew pajjiżna f’sitwazzjoni ta’ dejn u deficits rekord, qgħad, mediċini out-of-stock, power station taħdem bl-iktar żejt li jniġġes u l-ogħla kontijiet fl-istorja. Dan mhux 25 sena ilu, imma erba’ snin biss ilu.
“Għalhekk qiegħed hawn quddiemkom” qal Muscat.
“Bl-istess ħeġġa li kelli meta bdejt immexxi dan il-moviment. Bl-istess enerġija ta’ erba’ snin ilu. Bl-istess entużjażmu ta’ min jaf li għadna mxejna nofs it-triq. U bl-istess umilta’ qed nitlobkom il-fiduċja biex inkompli mmexxi dan il-pajjiż. Għax dak li ksibna mhux b’kumbinazzjoni u ma jistax jittieħed for granted.”
Spjega li l-isfidi mhumiex l-istess li kellu pajjiżna 50 xahar ilu. U għalhekk il-Partit Laburista mhux negattiv. Għax ma jħarisx lura. Għax huwa partit b’viżjoni, ħareġ mal-ewwel fit-tieni jum tal-kampanja elettorali, bl-ewwel ħames prijoritajiet biex Malta tibqa’ għaddejja mill-aqwa żmien.
Wara li spjega l-prioritajiet, il-Prim Ministru reġa’ għaraf li fit-triq saru żbalji. “Imma tgħallimna. U kif tgħallimnix!” qal Muscat.
“Imma fuq kollox miegħi tafu fejn qegħdin. Tafu li żammejt kelmti. Għax din hija kwistjoni ta’ kredibbiltà”
Żammha fuq l-ekonomija, it-taxxa, il-kontijiet, in-negozji, il-ġid, ix-xogħol, iċ-Childcare, it-tablets. Żamm kelmtu mal-pensjonanti, mal-istudenti, mal-ommijiet u nisa li jridu jaħdmu, ma’ koppji omossesswali u mal-persuni b’diżabbilta’.
“Fadlilna wisq x’nagħmlu biex nieqfu issa. Fadlilna wisq x’noffru biex nieqfu nofs triq. Għinuna nimxu t-triq kollha flimkien. Inwgħedkom li l-ħames snin li ġejjin mhux se jkunu b’inqas.”
L-aqwa żmien ta’ pajjiżna għadu ġej.
