Mhux bil-kliem iżda bil-fatti, Malta għandha istituzzjonijiet b’saħħithom, li qed jaħdmu bla ma jħarsu lejn wiċċ ħadd.
Iddikjara dan il-Prim Ministru Robert Abela fuq il-programm XTRA ppreżentat mill-ġurnalist Saviour Balzan, fejn saħaq kif l-armonija li hemm bejn l-istituzzjonijiet u entitajiet indipendenti, qed tħalli l-frott f’pajjiżna.
Il-Prim Ministru rrefera għar-riformi storiċi u bżonnjużi li seħħew fl-aħħar xhur, fosthom it-tisħiħ fil-ġudikatura, fil-Korp tal-Pulizija, fit-Taqsima tar-Reati Ekonomiċi u anke l-FIAU.
Spjega, “Mhux biss nitkellmu imma bil-fatti li llum għandna istituzzjonijiet li qed jaħdmu aqwa milli qatt ħadmu f’dawn l-aħħar għoxrin, tletin sena u iva kburi li llum nista’ b’wiċċi minn quddiem nitkellem mal-poplu u ngħidlu iva dan hu l-aqwa mument li qatt kienu qed jaħdmu fih l-istituzzjonijiet.”
Dwar is-sitwazzjoni tal-imxija f’pajjiżna, Dr Abela qal li bħalissa għaddejjin diskussjonijiet dwar x’se jiġri wara l-ħdax ta’ April.
Qal, “Fit-12 ta’ April, il-pjan għat-tnaqqis tar-restrizzjonijiet se jimxi b’mod gradwali u skont ma jiggwidawna x-xjentisti, bħalissa għaddejjin f’diskussjonijiet sabiex iva jkun hemm tnaqqis ta’ resitrizzjonijiet bi prijorità fuq l-edukazzjoni kif spjegat il-Professur Charmaine Gauci.”
Il-Prim Ministru semma r-riżultati ferm pożittivi li qed iħalli l-programm ta’ tilqim f’pajjiżna, b’Malta tinsab l-ewwel fid-dinja bħala l-aktar pajjiż li qed ilaqqam nies ras għal ras.
Dwar l-Oppożizzjoni Nazzjonalista, Dr Abela qal li f’pandemija, din kien moħħha biex tmur għal elezzjoni.
Xi ħaġa li tikkuntrasta bil-kbir mal-ħidma ta’ Gvern Laburista, li prijorità għalih dejjem kienet l-għajnuna lill-poplu Malti u Għawdxi.
Qal, “Ta’ xi ħadd li huwa mmexxi mill-populiżmu li jara r-riħ fejn qed jonfoħ u ħaddieħor li d-deċiżjonijiet jeħodhom abbażi tal-prinċipji tiegħu.”
Il-Prim Ministru saħaq li eventwalment, in-nies se jaraw min ġab il-bidliet fil-pajjiż, fosthom dawk fl-eqqel ta’ pandemija bħar-riforma fil-kirjiet u d-diskussjoni fuq l-emendi fil-liġi tad-divorzju.
Il-Prim Ministru kien ċar ukoll meta mistoqsi dwar il-proġett tal-ElectroGas.
Qal, “Ejja ma nattakawx proġetti li qed jagħmlu differenza kbira fil-ħajja tan-nies, il-Proġett tal-Electrogas ifisser kwalità ta’ arja aħjar u iva kwalità ta’ ħajja aħjar ifisser ukoll kontijiet tad-dawl orħos għall-poplu. Jekk hemm xi ħadd li naqas dwar il-proġett, iħallas dak ix-xi ħadd u għalhekk hemm istituzzjonijiet li qed jaħdmu.”
Il-Prim Ministru tkellem ukoll dwar l-għajnuna kontinwa li dan il-Gvern qed jagħti lin-negozji biex dawn, anke fi żminijiet diffiċli, ma jġorrux il-piż waħedhom.
Tikkumplimenta din l-għajnuna hemm dik li qed tingħata lill-ħaddiema u lill-familji.
Finalment il-Prim Ministru saħaq li dan kollu qed isir bil-għan li jibqgħu jsiru bidliet pożittivi fil-ħajja tal-poplu Malti u Għawdxi.
Ritratt: Gareth Degiorgio
