Ħmistax-il pittura tas-seklu 17 mill-artist Malti magħruf Stefano Erardi, li juru lill-appostli, issa qed jiffurmaw parti mill-wirja permanenti fil-Palazz tal-Inkwiżitur, fil-Birgu. Dawn il-pitturi, li kienu mxerrda f’diversi proprjetajiet tal-gvern, ġew trasferiti lura f’idejn Heritage Malta u restawrati matul l-2024.
L-isforz biex jingħaqdu mill-ġdid beda fl-2018, meta kuraturi ntebħu li diversi pitturi minn settijiet differenti kienu mifruxa f’palazzi u binjiet pubbliċi. Bl-għajnuna ta’ esperti u xjentisti, sar proċess metikoluż ta’ konservazzjoni biex il-pitturi jerġgħu jieħdu l-glorja oriġinali tagħhom.
L-Appostli ta’ Erardi juru influwenza tenebrista, f’rifless tal-istil ta’ Mattia Preti. Minkejja li d-dokumenti arkivjali huma limitati, l-attribuzzjoni lil Erardi u l-bottega tiegħu hija kkonfermata minn analiżi stilistika u teknika. Dawn il-pitturi, li kienu komuni f’binjiet ekkleżjastiċi u kollezzjonijiet privati, issa jistgħu jitgawdew flimkien fil-Palazz tal-Inkwiżitur, f’kuntest storiku li jsaħħaħ l-esperjenza tal-viżitaturi.
