Mill-1 ta’ Jannar ta’ din is-sena l-anzjani kollha li għandhom 75 sena jew bdew jivvjaġġaw b’xejn fuq tal-linja.
F’konferenza tal-aħbarijiet il-Ministru għat-Trasport u Infrastruttura Ian Borg spjega li din l-iskema ta’ Transport Malta bl-isem Bus75+ ser tingħaqad ma’ fost l-oħrajn dik tal-Bus20 li tfisser trasport pubbliku b’xejn għal żgħażagħ bejn l-14 u l-20 sena.
Il-Ministru Borg qal dan waqt żjara ġewwa l-uffiċċini tal-kumpanija CentreCom fil-Mosta li ser tkun qed toffri servizz ta’ customer care għall-benefiċċjarji ta’ dawn l-iskemi minn Transport Malta.
Waqt il-konferenza l-Ministru Ian Borg spjega li preżentament madwar 19,000 anzjan u anzjana jużaw it-trasport pubbliku u mhux eskluż li b’din il-miżura se jitħajjru iżjed anzjani biex jużaw tal-linja.
Intant Dr Borg qal li matul l-2019, 39,000 persuna għamlu użu minn madwar 8 miljun vjaġġ b’xejn grazzi għall-iskema Bus20.
Issa l-anzjani ta’ 75 sena jew aktar ser jibdew jaraw ir-rifużjoni tal-flus li jkunu nefqu fix-xahar ta’ qabel fuq tallinja card tagħhom.
Dr Borg sostna: “L-1 ta’ Jannar wasal ukoll u l-anzjani ta’ ‘l fuq minn 75 sena ser jibdew jara l-flus jiġu lura għandhom f’dak li għandu x’jaqsam trasport pubbliku.”
Il-Ministru Borg fakkar kif fl-1 ta’ Diċembru li għadda persuni b’diżabilità wkoll bdew igawdu minn skema ta’ trasport pubbliku b’xejn.
Dan bħala parti mill-viżjoni ta’ Gvern li pajjiżna joffri t-trasport pubbliku b’xejn għal kulħadd. Il-Ministru Borg spjega: “Il-viżjoni tal-Gvern li kemm jista’ jkun naslu f’punt fejn it-trasport pubbliku nagħtuh b’xejn lil kulħadd però qed nimxu b’mod sostenibbli u naraw liem huma l-iżjed faxex li għandhom bżonn. Bdejn biż-żgħażagħ fl-età meta wieħed jista’ jġib l-liċenzja tal-karozza u allura nofrulhom it-trasport pubbliku b’xejn. Wessajniha dik biex issa żgħażagħ bejn 14 u 20 sena u studenti ta’ kwalunkwe età jkomplu jgawdu minnha u minn Diċembru li għadda l-persuni b’diżabilità.”
Intant preżenti wkoll għal din il-konferenza tal-aħbarijiet attenda s-Segretarju Parlamentari għall-Persuni b’Diżabilità u Anzjanità Attiva, Anthony Agius Decelis.
Huwa spjega kif ir-riċerka turi li t-trasport pubbliku huwa wieħed mill-mezzi prinċipali ta’ trasport użat mill-anzjani u għalhekk din il-miżura se tgħin favur l-anzjanità attiva.
Huwa aċċenna wkoll għall-inizzjattivi oħra għall-anzjani introdotti minn Gvern Laburista li ser jikkumplimentaw din l-iskema ta’ Bus75+. Inċentivi bħal dħul b’xejn fil-mużewijiet madwar Malta.
Dawk kollha li għandhom xi mistoqsijiet dwar dan is-servizz huma mħeġġa jċemplu fuq in-numru 22483500.
