L-Ambaxxatriċi tar-Repubblika Federali tal-Ġermanja, Tanja I. Beyer, ippreżentat l-Ittri ta’ Kredenzjali tagħha lill-President George Vella fil-Palazz Presidenzjali, il-Belt Valletta.
Il-President Vella fakkar li Malta u l-Ġermanja għandhom relazzjonijiet bilaterali eċċellenti bbażati fuq interessi, valuri u għanijiet komuni b’qafas legali b’saħħtu li jinkludi diversi forom ta’ kooperazzjoni.
Malta tħeġġeġ il-miżuri kollha mmirati lejn il-promozzjoni tar-rabtiet tan-negozju u aktar kummerċ ibbażat fuq interazzjoni aktar mill-qrib bejn il-partijiet kummerċjali rispettivi tagħna. Fost l-oqsma l-oħra ta’ kooperazzjoni, il-migrazzjoni, l-enerġija rinnovabbli u l-kuntatti bejn il-popli ġew identifikati bħala li għandhom l-akbar potenzjal.
L-appoġġ tal-Ġermanja lill-Akkademja Mediterranja tal-Istudji Diplomatiċi ntlaqa’ b’mod partikolari mill-President Vella.
L-Ambaxxatriċi Beyer spjegat il-prijoritajiet għall-mandat tagħha, u semmiet b’mod partikolari l-kwistjonijiet dwar il-klima u l-enerġija.
Żiedet tgħid li dawn il-kwistjonijiet jistgħu jiġu indirizzati biss globalment, u affermat mill-ġdid l-interess tal-Ġermanja li taħdem mill-qrib mal-awtoritajiet Maltin f’dawn l-oqsma.
Ġew diskussi fit-tul ukoll il-gwerra fl-Ukrajna, l-instabilità fil-Mediterran, it-tensjonijiet fil-Lvant Nofsani u s-sitwazzjoni tal-migrazzjoni.
