L-Ambaxxata Amerikana qed tistieden żgħażagħ Maltin fl-età ta’ bejn is-16 u t-18-il sena biex japplikaw għall-Benjamin Franklin Transatlantic Fellowship for Youths li se jsir fl-Istati Uniti fis-sajf li ġej.
L-inizjattiva, imsemmija għad-diplomatiku Benjamin Franklin bil-ħsieb li tonora il-ħajja u l-karriera tiegħu li huma ta’ ispirazzjoni għal dawk li qed jaħdmu biex isaħħu l-koperazzjoni transatlantika, għandha l-għan li trawwem relazzjonijiet fost il-ġenerazzjonijiet iż-żgħar tal-Ewropa u tal-Istati Uniti biex isaħħu l-libertà globali, jibnu relazzjonijiet u javvanzaw valuri komuni.
Madwar 45 żgħażagħ Ewropej, inkluż parteċipant jew parteċipanta minn Malta u għaxar Amerikani, se jieħdu sehem fi programm intensiv ta’ skambju għal xi erba’ ġimgħat fl-Istati Uniti.
Dan il-programm jiffoka fuq il-kwistjonijiet globali li żgħażagħ Ewropej u Amerikani jiffaċċjaw fuq iż-żewġ naħat tal-Oċean Atlantiku fis-Seklu 21.
Il-parteċipazzjoni ta’ persuna waħda minn Malta se tkun iffinanzjata kompletament mid-Dipartiment tal-Istat Amerikan.
Kandidati li jikkwalifikaw għall-programm, iżda li mhumiex aċċettati, se jkunu eliġibbli għall-għażla biex jipparteċipaw f’avveniment fl-Ambaxxata tal-Istati Uniti, li fih l-istudenti se jservu bħala diplomatiċi għal ġurnata f’simulazzjoni tax-xogħol ta’ Ambaxxatur tal-Istati Uniti u l-Ambaxxata tal-Istati Uniti.
Min hu interressat għandu jikkuntattja lill-Ambaxxata Amerikana (usembmalta@state.gov) għal aktar informazzioni. In-nominazzjonijiet għandhom jintbagħtu sad-9 ta’ Frar li ġej.
