“L-akbar pakkett finanzjarju fl-istorja tal-pajjiż”- il-PM

Il-baġit għas-sena d-dieħla huwa l-akbar pakkett finanzjarju fl-istorja ta’ pajjiżna.

Kien b’dan il-mod li l-Prim Ministru Joseph Muscat beda d-diskors tiegħu bi tweġiba għad-diskors tal-Kap tal-Oppożizzjoni Adrian Delia. 

F’diskors ta’ viżjoni u ottimiżmu, Dr. Muscat semma kif għall-2019, il-miżuri mħabbra fil-budget jammontaw għal €142 miljun.

Innota kif dan il-Gvern mhux talli ma jissikkax iċ-ċinturin wara l-elezzjona, iżda jagħti aktar lill-familji u lin-negozji.

“Illum qed nagħtu aktar mid-doppju milli tajba qabel l-elezzjoni. Abbandunajna ċiklu elettorali u minflok daħħalna strateġija ekonomika sensibbli. L-ekonomija tikber u aħna nagħtu aktar. B’hekk noħolqu middle class ġdida, li mhux biss ħloqniha iżda qed insaħħuha. B’hekk ngħixu s-suċċess.”

Il-Prim Ministru elenka bosta miżuri li permezz tagħhom se jgawdi kulħadd.

16,500 familja se jieħdu żieda fiċ-children’s allowance sa €96, b’nefqa ta’ żewġ miljuni.

200,000 ħaddiem – full-time u part-time – se jirċievu ċekk ta’ bejn €40 u €68 bħala rifużjoni tat-taxxa, b’nefqa ta’ €11,500.

92,000 anzjan u anzjana se jerġgħu jieħdu żieda fil-pensjoni ta’ €4.50, filwaqt li 92,000 ieħor se jieħdu għotja ta’ €300 – b’nefqa totali ta’ €19,000.

12,000 anzjana li m’għandhomx pensjoni se jiżdidilhom il-bonus, u 6,000 pernsjonant tal-korpi se jieħdu ħlas ieħor – b’nefqa ta’ kważi €12,000.

Ġenituri ta’ 26,000 student u studenta se jiffrankaw €700 egħal kull wild bil-miżura ta’ trasport b’xejn – li lill-Gvern se tiswieh għoxrin miljun.

Kull min xtara karozza fl-2008 se jieħu rifużjoni tal-VAT fuq ir-reġistrazzjoni – b’nefqa ta’ €25 miljun.

Filwaqt li qed jagħti dan u ħafna aktar, il-baġit għas-sena d-dieħla ma ħa xejn lil ħadd.

“Għat-tieni darba fl-istorja ppreżentajna baġit bla taxxa waħda. Kieku għamilna hekk biss diġà kien ikun ħafna għax dan il-poplu l-aktar li jrid hu Gvern li ma jfixklux u li jħallih jaħdem. Qatt ma saret fl-istorja tal-pajjiż, u għamilniha darbtejn.”

Il-Prim Ministru qal li dan kollu qed isir b’mod sostenibbli li minnu tgawdi l-ġenerazzjoni li jmiss.

Sostna li dan l-akbar pakkett finanzjarju fl-istorja tal-pajjiż kien possibbli għax saret turnaround – mhux biss tal-Enemalta u l-Air Malta, iżda tal-ekonomija.

“Malta saret kalamita ta’ investiment. Kibret bil-manifattura, turiżmu, servizzi finanzjarji u teknoloġija. L-ekonomija tikber bil-fiduċja – dik li l-poplu tagħna darbtejn fuq xulxin – darba aktar minn oħra.”

Fuq kollox, tenna l-Prim Ministru, dan huwa Gvern li għalkemm mhux perfett għandu l-enerġija u r-rieda li jwettaq biex jagħmel minn Malta pajjiż fejn tkun ppremjata l-bżulija u fejn kulħadd jgħix is-suċċess.