Il-Linja Nazzjonali tal-Ajru, l-Air Malta wieġbet għall-kummenti li l-unjin tal-bdoti, l-ALPA, tat lil-midja fl-aħħar jiem, fejn allegat li l-Air Malta m’għandiex biżżejjed bdoti biex jaħdmu l-iskeda tagħha, u li qed tħaddimhom aktar sigħat milli permess bil-liġi.
Fi stqarrija, l-Air Malta qalet li l-bdoti jaħdmu medja ta’ 650 siegħa fis-sena, u l-liġi ma tippermettix li bdot isuq iktar minn 900 siegħa fis-sena. Żied jingħad li l-Air Malta għandha biżżejjed bdoti biex jaħdmu l-iskeda ta’ titjiriet, u li dewmien f’xi titjiriet tul is-sajf kienu minħabba rakkomandazzjonijiet mill-unjin stess biex l-iskeda tkun iktar flessibbli.
L-Air Malta żiedet tgħid li dejjem assigurat li tipprovdi lill-bdoti bis-96 jum ta’ mistrieħ fis-sena, u 8 ijiem ta’ mistrieħ żejda, skont il-ftehim kollettiv tal-kumpanija. Il-ftehim kollettiv jippermetti wkoll li bdot jingħata kumpens ta’ €360 għal kull jum ta’ mistrieħ li ma jkunx aċċettat mill-kumpanija.
Intant, il-kumpanija se tkun qed tinvestiga allegazzjonijiet li għamlet l-ALPA fl-aħħar jiem dwar skur ta’ Flight Time Limitation. Dan minkejja li skont studju li sar mill-kumpanija, kwistjonijiet tekniċi u umani rriżultaw fi żbalji fl-iskeda tax-xogħol. Dawn l-iżbalji ġew identifikati minnufih u l-kumpanija ħadet azzjoni f’waqtha dwar dan.
