Ilbieraħ filgħaxija ngħata bidu għas-servizz ġdid li l-Air France qed toffri tliet darbiet f’ġimgħa bejn Malta u l-Ajruport Paris Charles de Gaulle.
Fi stqarrija maħruġa mill-Ajruport Internazzjonali ta’ Malta ntqal li permezz ta’ dawn it-titjiriet li se jitilqu minn Malta, kull nhar ta’ Tnejn, Ġimgħa u Ħadd, se jkun iffaċilitat l-ivvjaġġar bl-ajru bejn Malta u Franza.
Intqal ukoll li dan il-pajjiż ilu fost l-aqwa swieq tal-Ajruport Internazzjonali ta’ Malta għal aktar minn għaxar snin. Fil-fatt, fl-2019, is-suq Franċiż kien ikklassifikat fir-raba’ post tal-aktar swieq poplari tal-Ajruport Malti, b’sehem ta’ 6.2%.
Il-Kap Eżekuttiv tat-Traffiku fi ħdan l-Ajruport Internazzjonali ta’ Malta, is-Sur Alex Cardona qali li d-deċiżjoni tal-Air France li tibda ttir lejn Malta bħala waħda mis-sitt destinazzjonijiet Ewropej ġodda għall-istaġun tas-sajf, hija vot ta’ fiduċja f’pajjiżna. Dan meta wieħed iqis ukoll r-reputazzjoni eċċellenti li għadha din il-linja tal-ajru, f’din l-industrija.
Huwa sostna li l-prestazzjoni tas-suq Franċiż minn meta l-Ajruport Internazzjonali ta’ Malta reġa’ fetaħ għat-turiżmu kienet waħda b’saħħitha ħafna. Tenna li jinsab kunfidenti li dawn it-titjiriet se jkomplu jgħinu fl-irkupru ta’ dan is-suq importanti.
Min-naħa tiegħu l-Maniġer Ġenarali tal-Fergħa ta’ Air France-KLM tal-Lvant tal-Mediterran, esprima s-sodisfazzjon tiegħu għat-tnedija ta’ dawn it-titjiriet diretti bejn Malta u Pariġi. Dawn għaliex permezz ta’ dawn it-titjiriet il-passiġġieri li jkunu qegħdin jivvjaġġaw minn dan is-suq importanti ser ikollhom aċċess għan-network globali ta’ Air France, filwaqt li aktar turisti minn madwar id-dinja ser ikunu jistgħu jivvjaġġaw lejn din id-destinazzjoni sabiħa.
Matul is-sajf Air France ser tkun qed ittir lejn madwar 200 destinazzjoni fl-Ewropa u lil hinn minnha. Għaldaqstant, it-titjiriet li għadhom kemm ġew inawgurati lejn I-ajruport ta’ Paris Charles de Gaulle huma mistennija li jservu kemm ta’ konnessjoni diretta bejn Malta u Franza u anke ta’ pont bejn il-gżejjer Maltin u destinazzjonijiet aktar imbiegħda.
Air France hija t-tielet linja tal-ajru nazzjonali li qed tniedi titjiriet mill-Ajruport Internazzjonali, wara li LOT Polish u Cyprus Airways bdew joperaw mill-ajruport lejn I-aħħar ta’ Ġunju.
