Bħalissa għaddejjin l-aħħar xogħlijiet b’rabta mal-proġett li ra t-trasformazzjoni tal-pjazza tal-Mellieħa, li ġiet riġenerata kompletament biex tkun tista’ titgawda aħjar u tagħti dehra ferm isbaħ lil-lokal li hu attrazzjoni ewlenija fit-Tramuntana tal-pajjiż.
Fil-fatt, kif seta’ jara fuq il-post crew ta’ ONE News, li żar il-proġett mifrux fuq ħamest elef metru kwadru, għad fadal biss ftit xogħol infrastrutturali, primarjament fuq żewġ turġien li jgħaqqdu s-Santwarju tal-Madonna tal-Vitorja mal-istess pjazza prinċipali.
ONE News hu infurmat li l-proġett, li nbeda fl-aħħar tas-sena li għaddiet, se jkun qed jiġi inawgurat fil-jiem li ġejjin.
Dwar l-aħħar xogħlijiet spjegalna l-Perit tal-proġett Roderick Spiteri.
Qal, “Jonqos l-aħħar affarijiet żgħar bħalissa u qed nagħlqu l-pavimentar tat-taraġ li hu l-aħħar ħaġa li għad fadal minn dan il-proġett, imbagħad ikun jonqos affarijiet żgħar fejn jidħlu street lighting, forsi xi street furniture oħra.”
Dan il-proġett ġie ddisinjat mill-Awtorità Maltija għat-Turiżmu, l-MTA, u ffinanzjat mill-istess awtorità flimkien mal-aġenzija Infrastructure Malta, li t-tnejn flimkien wasslu dan il-proġett biex ikun jista’ jitgawda kemm mir-residenti, iżda wkoll minn dawk li jżuru ż-żona, fosthom ammont konsiderevoli ta’ turisti.
Fil-fatt, il-ħsieb wara dan il-proġett kien wieħed uniku hekk kif għamilha possibbli li jgħaqqad ir-riġenerazzjoni li saret fi snin passati madwar is-Santwarju tant popolari mal-pjazza, kif kompla jisjega l-Perit tal-proġett stess.
Qal, “Kienet ix-xewqa li l-proġett, li sar fl-antik, fejn kien hawn is-Santwarju tal-Mellieħa ġiet riġenerata dik iż-żona, jingħaqad mal-pjazza u dan il-proġett ħaseb li jgħaqqad il-pjazza ta’ fuq tal-Mellieħa man-naħa t’isfel li jgħaqqad kollu mas-Santwarju tal-Mellieħa.”
Ix-xogħol, li nbeda f’Ottubru li għadda, fost l-oħrajn kien jinkludi l-bini mill-ġdid tal-pjazza mill-qiegħ fejn ingħaddew ukoll is-servizzi mill-ġdid u xogħol li jikkumbatti l-għargħar hekk kif il-post fejn tinsab il-pjazza hi waħda suġġetta mhux ħażin għall-konsegwenzi tar-riħ.
Il-Perit Spiteri nnota magħna wkoll xi sfidi li proġett iltaqa’ magħhom primarjament mil-lat arkeoloġiku.
Qal, “Taħt il-pjazza stess hemm xelter antik li jaqsam madwar il-pjazza kollha li jibqa’ sejjer anke sal-bogħod, aktar ’il fuq jiġifieri mill-pjazza, u allura waħda mill-akbar sfidi li kellna waqt ix-xogħlijiet kienet li jrid ikollna moniteraġġ ta’ arkeologu li matul ix-xogħol kollu il-proġett ġie mmonitorjat mill-arkeoloġija, ovvjament dan jieħu t-tul.”
Spiteri stqarr ukoll li nstabu wkoll xi bjar waqt dan il-proġett li lkoll ġew ippriservati.
Dan il-proġett mhux biss sebbaħ u għolla d-dehra tal-pjazza tal-Mellieħa, iżda saħansitra se jkun qed itejjeb l-esperjenza turistika fil-lokal, hekk kif anke jixhed investiment li qiegħed isir fl-inħawi proprju fejn sar dan il-proġett.
