Meta ninsabu fuq l-għatba ta’ edizzjoni oħra tal-kunċert Rockestra, li għandu t-tema ‘More Than a Feeling’ u se jsir is-Sibt, il-President George Vella żar iċ-Ċentru ta’ Malta għall-Fieri u l-Konvenzjonijiet, l-MFCC, f’Ta’ Qali biex isegwi mill-qrib l-aħħar tħejjijiet għal dan l-appuntament tant mistenni.
Minn dan l-aħħar kunċert Rockestra taħt il-President Vella, bħas-soltu se tgawdi l-Malta Community Chest Fund Foundation.
Flimkien mad-Direttur Artistiku ta’ Rockestra, Pawlu Borg Bonaci, il-President ta’ Malta tkellem mal-voluntieri li kienu għaddejjin fuq xogħlhom b’entużjażmu liema bħalu.
Id-Direttur Mużikali ta’ Rockestra ta’ din is-sena se jkun Aurelio Belli li wkoll ingħata l-għajnuna mill-Fondazzjoni Malta Community Chest Fund.
Tlabna lil Borg Bonaci jgħidilna aktar dwar dan il-kunċert ta’ mużika rock għal din is-sena.
Qal, “Rockestra għal min diġà attenda u għal min forsi m’attendiex, l-Orkestra Nazzjonali ta’ Malta tistieden kantanti mix-xena mużikali mir-rock u minn xeni oħrajn u nagħmlu mużika minn bands bħal ACDC, il-Beatles, Queen, Skunk Anansie. Hemm swing minn songs mis-sixties u nibqgħu għaddejjin, jiġifieri hawn spettaklu ta’ dawl, effetti speċjali, però importanti buzz kbir u dan il-buzz jitrasmetti u tkun qed tgħin fl-aħħar mill-aħħar lill-Community Chest Fund. Rock On!”
