Siġġijiet, palk imdaqqas, armar u attività bla waqfien.
Xeni li l-Fosos tal-Furjana ilu ma jara xhur bħalhom minħabba r-ristrezzjonijiet tal-pandemija.
Madankollu min illum jgħaddi mill-istess fosos dawn ix-xeni jarahom b’għajnejh hekk kif għaddejjin l-aħħar preparamenti għar-ritorn tal- kunċert tant mistenni mit-tenur Joseph Calleja u li jimmarka s-sebgħin sena anniversarju tal-festival ta’ Sanremo.
Fil-fatt il-Ġimgħa wara nofsinhar t-tenur Joseph Calleja flimkien mal-Ministru għat-Turiżmu Clayton Bartolo u ċ-Chairman tal-Awtorità Maltija tat-Turiżmu żaru l-aħħar preparamenti hekk kif għada se jkun qed jittella’ dan il-kunċert bil-parteċipazzjoni wkoll tal-Orkestra Filarmonika ta’ Malta u s-Surmast ta’ Sanremo Leonardo De Amicis.
Fost oħrajn ġie spjegat kif se jipparteċipaw ukoll artisti bħal Nek u rebbieħa passati ta’ Sanremo bħal Fiorella Mannoia u Michele Zarrillo.
ONE News tkellem mat-Tenur Joseph Callejja hekk kif esprima s-sodisfazzjon tiegħu għar-ritorn ta’ dan il-kunċert. Tenna kif il-mod ta’ kif Malta ġġieldet il-pandemija għamel dan kollu possibli.
“Malta għandna waħda jekk mhux l-iktar rata ta’ vaċċinazzjoni għoljin fid-dinja mhux fl-Ewropa biss u allura naħseb issa l-mument li nibdew it-triq lejn in-normalità.”
Tkellimna wkoll mal-Ministru għat-Turiżmu Clayton Bartolo hekk kif sostna wkoll il-mod għaqli u bi prudenza li mexa bih il-Gvern waqt il-pandemija.
“Tajjeb niftakru li bħal dan iż-żmien sena pajjiżna kien totalment differenti hekk kif konnha prattikament qed ngħalqu għat-turiżmu. Din is-sena minflok qed nersqu pass ieħor lejn in-normalità u nkomplu nersqu sabiex nerġgħu nibdew niksbu dawk is-suċċessi li konnha mdorrijin bihom fil-passat fejn jidħol is-settur tat-turiżmu.”
Waqt il-konferenza tal-aħbarijiet tkellem ukoll iċ-Chairman tal-Awtorità Maltija tat-Turiżmu Gavin Gulia.
Tenna kif dawn it-tip ta’ kunċerti jkompli jgħinu jistimulaw it-turiżmu lejn pajjiżna hekk kif dan is-settur għadu qed jirpilja mill-effetti tal-pandemija.
