Minn pupi tad-drapp sa sett biż-żebgħa ta’ Frozen. Minn super eroj, bħal Superman sal-Unikorn, li sab postu wkoll qalb ħafna rigali li taw it-tfal Maltin għal kampanja ‘Rigal bi Mħabba’. Pakketti b’noti apposta li jindikaw jekk humiex immirati għal tifel jew tifla u bl-età mniżżla.
Iltqajna ma’ Dervin Vella li kien għadu kif spiċċa mix-xogħol, fi Pjazza Kastilja, biswit it-tinda li fiha qed jinżammu r-rigali miġburin.
Waqt li jaħdem bħala uffiċjal fil-Faċilità Korrettiva ta’ Kordin, għal dawn l-aħħar tliet snin fil-ħin liberu tiegħu ħass il-ħtieġa li jagħti sehmu fl-inizjattiva ‘Rigal bi Mħabba’, sa mill-bidu tagħha erba’ snin ilu.
Dervin ta’ altruwist li hu, b’mod volontarju darbtejn f’ġimgħa, ukoll jgħallem s-self defence lit-tfal ta’ bejn is-seba’ snin u l-ħdax-il sena fi klabb li għandu fiż-Żejtun. Tlabnih jgħidilna għalxiex iħoss il-bżonn li jagħmel dawn il-klassijiet mingħajr ħlas.
Qal, “Tħoss li taħdem b’mod volontarju mat-tfal, eżempju nieħu minni, dak li tgħallimt jien u kont fi klabbs oħrajn, kont nara li tfal li jkunu batuti jiġulek ftit, imbagħad għax il-ġenituri ma jkollhomx biex iħallsu u qisha kienet toqrosni naqra żgħira. Dak li jkun, iddeċidejt li nibda nagħmel dawn l-affarijiet minn jeddi, hekk. Xi ħaġa li nħobb.”
Hu stqarr ma’ ONE News li jħoss li jkun ta’ ispirazzjoni għat-tfal li jgħallem.
Qal, “Jien irrid inrawwem fit-tfal, dawk li ngħallem jiena li mill-ftit li għandhom jitqassam ma’ ħaddieħor, għal dawk li jkunu daqsxejn fil-bżonn u li huma fit-tbatija wkoll f’dawn iż-żminijiet.”
Vella spjegalna li, bħala ħaddiem fi ħdan il-korpi dixxiplinarji, iħossu kburi li bħala uffiċjal fil-Faċilità Korrettiva ta’ Kordin, flimkien mal-membri tal-Korp tal-Pulizija, is-suldati tal-Forzi Armati, il-Membri tad-Dipartiment tal-Protezzjoni Ċivili u uffiċjali tal-LESA jħossu sodisfatt li jkunu minn ta’ quddiem biex jagħtu sehemhom għall-kampanja ‘Rigal bi Mħabba’.
Qal, “L-appell hu li dawn il-klabbs, li huma żgħar u anke l-kbar, kemm jista’ jkun immexxu din il-kelma li kulħadd jibda jqassam xi ħaġa milli għandu. B’dawn l-affarijiet żgħar, għax bħal daż-żmien, żmien tal-Milied, żmien ta’ mħabba, għandna l-gwerer viċin, xi ħaġa żżomm.”
Mal-mikrofonu ta’ ONE News, Matthew Micallef, uffiċjal tal-aġenzija LESA, li kien ukoll fuq xogħlu, stqarr magħna l-ħsibijiet tiegħu dwar il-kampanja “Rigal b’Imħabba”.
Qal, “Ngħidilhom biex milli għandhom jagħtu, għax mill-ftit li għandek, dawn it-tfal jarawha apprezzament kbir, u nixtieq ukoll ngħid appell għal kulħadd. Dawn it-tfal setgħu kienu uliedkom.”
L-għan tal-kampanja ‘Rigal bi Mħabba’ jibqa’ biex, f’dan iż-żmien festiv, l-ebda tifel jew tifla f’Malta ma jispiċċaw mingħajr rigal.
Il-pubbliku Malti hu mħeġġeġ biex, sa nhar il-Ħamis 21 ta’ Diċembru, ipoġġi r-rigali, bħal ġugarelli, taħt is-Siġra tal-Milied armata apposta fi Pjazza Kastilja biex imbagħad jingħataw lil tfal fil-bżonn.
