L-aġenzija internazzjonali, DBRS Morningstar, ikkonfermat ir-rating ta’ pajjiżna bħala A (high) stable. Dan huwa l-aħjar rating li pajjiżna qatt ingħata minn din l-aġenzija.
L-esperti ta’ din l-aġenzija sostnew li r-riżultati ekonomiċi u fiskali b’saħħithom li kellu pajjiżna qabel il-pandemija, ipattu għar-riskji li jitbaxxa r-rating.
“Malta’s strong economic and fiscal track record prior to the Coronavirus Disease (COVID-19) shock offsets the risks to the ratings.”
Innutaw il-progress ta’ Malta fil-ġlieda kontra l-ħasil tal-flus u l-iffinanzjar tat-terroriżmu, u l-importanza li l-Gvern Malti qed jagħti biex jissolvew sfidi li fadal fis-settur.
“Malta’s recent progress on improving its Anti-Money Laundering and Combating the Financing of Terrorism (AML/CFT) framework.”
B’referenza għad-deċiżjoni tal-FATF, l-esperti tad-DBRS sostnew li jekk il-Gvern ikompli fit-triq li qabad, l-effett ta’ din id-deċiżjoni jkun mitigat.
L-aġenzija tinnota li pajjiżna ntlaqat mill-pandemija wara perjodu twil ta’ prestazzjoni ekonomika u fiskali b’saħħitha, li wassal biex in-negozji jkunu reżiljenti u ppermetta lill-Gvern biex jagħti sostenn qawwi.
“A prolonged period of strong economic and fiscal performance.”
Fit-tbassir tagħhom, l-esperti sostnew li din is-sena, l-ekonomija Maltija mistennija tkun xprunata mid-domanda domestika.
L-esperti nnutaw il-pass notevoli li bih mexa l-pjan ta’ tilqim f’pajjiżna, u jsostnu li l-Fondi Ewropej kapaċi jtejbu l-andament ekonomiku ta’ Malta, saħansitra iktar milli previst.
“Malta’s remarkable pace of vaccination.”
L-esperti jindikaw ukoll fiduċja fl-abbiltà tal-Gvern li jpoġġi l-finanzi pubbliċi fis-sod wara li tgħaddi l-pandemija.
Jitkellmu wkoll dwar ir-riżultat pożittiv tal-Moneyval, li jindika li l-awtoritajiet qed jagħmlu progress kbir fil-qasam regolatorju, tant li l-esperti jsostnu li l-indikaturi ta’ governanza tal-Bank Dinji għal Malta huma ġeneralment konformi ma’ dawk tal-medja tal-Unjoni Ewropea.
“The World Bank’s governance indicators for Malta are broadly in line with those of the EU average.”
L-esperti jinnutaw ukoll li l-Prim Ministru Robert Abela pprovda impetu ġdid biex isaħħaħ is-saltna tad-dritt mindu ħa t-tmun tal-pajjiż f’Jannar tas-sena l-oħra, u saħansitra elenkaw il-kliem ta’ tifħir li kellha l-Kummissjoni Venezja għal-liġijiet ġodda li għaddew mill-Parlament.
“Prime Minister Robert Abela has provided a new impetus to strengthen the rule of law since coming into office in January 2020.”
Fi stqarrija, il-Gvern laqa’ dan iċ-ċertifikat ta’ ħidma li saret fl-aħħar xhur u sostna d-determinazzjoni li dan ix-xogħol ikompli jissaħħaħ fiż-żmien li ġej.
Fuq Twitter, il-Prim Ministru Robert Abela laqa’ l-kunfidenza li għandhom l-esperti tad-DBRS fl-irkupru ekonomiku ta’ pajjiżna, u nnota kif l-esperti jinnutaw l-impatt tar-riformi istituzzjonali, regolatorji u leġiżlazzjonijiet pożittivi fuq pajjiżna.
