F’konferenza li kkommemorat l-għaxar snin mit-twaqqif tagħha, l-aġenzija Identity Malta żvelat dehra ġdida, waqt li isimha issa nbidel għal Identità.
F’din il-konferenza ġew ukoll żvelati diversi miri li għandha quddiemha l-aġenzija għall-ġejjieni wara t-trasformazzjoni u s-suċċessi li din għaddiet minnhom fl-aħħar snin.
Id-dehra ġdida tal-aġenzija qed timmarka fażi oħra mill-proċess ta’ tiġdid li din imbarkat fuqu mibni fuq l-interess tal-klijent, li jibqa’ fiċ-ċentru tat-teħid u tad-deċiżjonijiet.
L-emblema l-ġdida, li hi l-qofol tad-dehra żvelata fil-konferenza, turi tliet elementi prinċipali; l-użu tal-lingwa Maltija, l-immaġini tat-torri tal-għassa u marka ta’ subgħa. L-użu tal-lingwa Maltija u t-tipa bajda fuq sfond aħmar huma referenza diretta lejn il-bandiera ta’ Malta u xhieda qawwija lejn l-istorja u l-kultura li sawru l-identità ta’ dan il-ġens maż-żminijiet.
It-torri tal-għassa jixhed l-impenn tal-aġenzija biex tħares l-interessi taċ-ċittadini fil-ġlieda kontinwa kontra t-theddida globali tas-serq tal-identità u l-iffalsifikar tad-dokumenti. Il-marka ta’ subgħa tiġbor kollox flimkien, u minkejja li dan hu element ta’ sigurtà importanti, jissimbolizza wkoll il-bidla radikali diġitali li l-aġenzija wettqet u għadha qed twettaq.
Fi stqarrija, l-aġenzija qalet li din il-bidla mhijiex waħda kożmetika biss, iżda bidla tanġibbli kkonfermata minn żewġ Quality Labels lill-Uffiċċju tal-Passaporti u t-Taqsima tal-Karta tal-Identità għas-servizz għoli li dawn joffru.
Dawn ir-rikonoxximenti ġew f’għaxar snin fejn fihom sar mass roll-out tal-karta tal-identità fl-2014, il-ħruġ ta’ passaport u karta tal-identità ġdida, il-premju tal-aqwa passaport fir-reġjun, rilokazzjoni tal-uffiċini f’binja ġdida, ftuħ ta’ fergħa fl-Isptar Mater Dei, diġitalizzazzjoni ta’ numru ta’ servizzi, l-introduzzjoni tal-X marker u l-emendi legali dwar il-kunjomijiet u l-użu tat-tipa Maltija fl-ismijiet.
Il-Kap Eżekuttiv tal-aġenzija, il-Kulunell Mark Mallia, innota kif dan il-vjaġġ beda għaxar snin ilu meta seba’ entitajiet li kienu taħt ministeri differenti ngħaqdu taħt kappa waħda.
Qal, “Għalhekk kien jimmerita li, wara dak il-vjaġġ, illum nagħtu libsa ġdida, libsa lill-aġenzija li mhijiex biss bidla kożmetika, imma hi bidla li tirrifletti dan il-vjaġġ kollu li sar fejn aħna llum lil kull ċittadin Malti, lil kull residenti f’Malta nagħtuh bla dubju servizz, però nagħtuh mhux biss l-identità tiegħu, imma rridu noffru wkoll is-sigurtà għal dik l-identità.”
Il-Ministru għall-Intern, is-Sigurtà, ir-Riformi u l-Ugwaljanza, Byron Camilleri, faħħar il-ħidma tal-aġenzija s’issa, filwaqt li ħeġġeġ biex il-ħaddiema tagħha jibqgħu joffru servizz tal-ogħla kwalità.
Qal, “Għaldaqstant tlabt lill-ħaddiema kollha hawnhekk flimkien mal-maniġment tal-aġenzija biex bl-istess mod li f’dawn is-snin irnexxielhom itejbu s-servizzi li joffru lill-komunità tagħna, jaħdmu bla qies biex mhux biss itejbu dawn is-servizzi, iżda jaraw li jkunu servizzi professjonali ta’ dak li titlob minnha l-komunità tagħna.”
