L-Aġenzija Ewropea tal-Mediċini qed tevalwa tilqima tal-booster għal dawk iż-żgħażagħ ta’ 16 u 17-il sena

Bħalissa l-Aġenzija Ewropea tal-Mediċini għaddejja b’ħidma sabiex tevalwa d-doża tal-booster għaż-żgħażagħ ta’ 16 u 17-il sena tal-Pfizer/BioNTech.

Dan intqal waqt konferenza tal-aħbarijiet li saret mill-aġenzija u ntqal li dan isir sabiex tara li t-tilqima hija waħda sigura.

Hawnhekk intqal kif fiż-żmien li ġej il-kumpanija Pfizer mistennija tissottometti applikazzjoni sabiex l-Aġenzija Ewropea tal-Mediċini tevalwa d-doża tal-booster għal dawk li għandhom bejn it-12 u l-15-il sena.

Dwar il-varjant Omicron, l-EMA qalet kif studju fl-Afrika t’Isfel juri kif wara żewġ dożi tal-vaċċin wieħed ikollu 70% protezzjoni mill-Covid-19, waqt li bit-tielet doża, dik tal-booster, wieħed ikollu protezzjoni ta’ 90%.

Intqal kif dan il-varjant jinfetta aktar nies mill-varjanti ta’ qabel u b’hekk jagħmlu varjant li jħassbek.

Intant l-Għaqda Dinjija tas-Saħħa fl-Ewropa qalet kif fi żmien tmien ġimgħat, il-varjant Omicron se jinfetta aktar min-nofs il-popolazzjoni fil-kontinent Ewropew.

L-Aġenzija Ewropea tal-Mediċini qalet ukoll kif nisa tqal għandhom ċans akbar li l-Covid-19 iħallilhom effetti severi.

Intqal kif l-informazzjoni turi li bil-vaċċin għal kontra l-Covid-19, ir-riskju ta’ dawk li jidħlu l-isptar jew imwiet jonqos sew.

L-EMA qalet kif permezz ta’ dan in-nuqqas ta’ riskju ma jkunx hemm kumplikazzjonijiet waqt it-tqala.