Fid-diskors annwali organizzat mill-Istitut tas-Servizzi Finanzjarji, l-IFS, l-Aġent Gvernatur tal-Bank Ċentrali, Alexander Demarco, tkellem dwar it-tnaqqis qawwi li ġie rreġistrat fl-inflazzjoni din is-sena.
Hu fil-fatt innota kif, sena ilu, ir-rati tal-imgħax madwar id-dinja kienu fl-ogħla livell, għax il-Banek Ċentrali kienu verament inkwetati fuq l-inflazzjoni qawwija li kienet għadha qed tippersisti.
Issa dan kollu nbidel. Minkejja t-tensjonijiet globali, il-prezz internazzjonali taż-żejt u l-gass naqsu u dan għen bil-kbir biex naqset iż-żieda fil-prezzijiet l-oħrajn, bil-Banek Ċentrali issa qed inaqqsu r-rati tal-imgħax u, allura, se jonqsu l-piżijiet fuq il-familji li għandhom self u biex aktar negozji jinvestu.
Demarco sostna li l-ekonomija Maltija gawdiet minn dak il-proċess, tant li r-rata tal-inflazzjoni f’pajjiżna kważi naqset bin-nofs fuq medda ta’ sena. Dan it-tnaqqis kien ferm aktar minn dak imbassar mill-esperti tal-Bank Ċentrali ta’ Malta.
Fl-istess ħin, l-Aġent Gvernatur sostna li mentri madwar l-Ewropa t-tkabbir ekonomiku qed imajna, dak f’Malta għadu qed jissorprendi lill-esperti. Raġuni ewlenija wara dan it-tkabbir hu l-poiżizzjoni fiskali tal-Gvern li hi ferm aktar ġeneruża minn dik fil-bqija tal-Ewropa, fejn iddaħħlu miżuri ta’ awsterità.
Hu sostna li l-politika favur prezzijiet tal-enerġija stabbli kompliet ittejjeb id-dħul disponibbli tal-familji Maltin u qed tnaqqas l-inflazzjoni. Dan filwaqt li nnota li hawn Malta r-rati ta’ imgħax ma tantx żdiedu u b’hekk il-familji u n-negozji ma batewx bħall-bqija tal-Ewropa.
Demarco bassar li l-pagi f’pajjiżna se jogħlew aktar, filwaqt li d-dħul tal-familji se jitjieb minħabba t-tnaqqis fl-income tax u ż-żidiet fil-benefiċċji soċjali.
Minħabba f’hekk, ħabbar li l-ekonomisti tal-Bank Ċentrali se jirrevedu ’l fuq it-tbassir tagħhom għall-ekonomija Maltija, waqt li wissa li s-sitwazzjoni internazzjonali xejn ma tagħti ċertezza, anke għax mistenni jkun hemm tensjonijiet fil-kummerċ bejn il-pajjiżi bi dħul ta’ tariffi.
Madankollu, pajjiżna mistenni jkompli jikber b’rata tajba.
