F’argument b’saħħtu li poġġa l-Avukat Ġenerali Gerard Hogan fil-Qorti Ewropea għall-Ġustizzja saħaq li ma kien hemm xejn ħażin fis-sistema tal-ħatra tal-ġudikanti f’Malta u l-liġi Ewropea ma tipprekludix providimenti fil-Kostituzzjoni tal-istati membri rispettivi fejn il-Prim Ministru jkollu rwol fil-proċess tal-ħatra tal-ġudikanti.
Dan kien l-argument ewlieni fl-opinjoni li ta l-Avukat Ġenerali Hogan f’kawża li fetħet l-għaqda Repubblika, permezz tad-deputat Nazzjonalista Jason Azzopardi, kontra Malta dwar sistema ta’ ħatra tal-ġudikanti li issa anki saħansitra ssaħħet.
Jason Azzopardi u l-għaqda Repubblika marru quddiem il-Qorti Ewropea għall-Ġustizzja kontra l-Gvern Malti talli l-Prim Ministru kien jaħtar ġudikant wara li jkunu għaddew mill-għarbiel tal-kumitat għall-ħatriet tal-ġudikanti li fih hemm il-Prim Imħallef fost oħrajn.
Il-Gvern immexxi mill-Prim Ministru Robert Abela kompla saħħaħ is-sistema li kienet ferm iktar rigoruża mis-snin passati fejn il-Prim Ministru kien jaqbad u jaħtar ġudikant hu mingħajr għarbiel ta’ xejn.
Fil-fatt f’riformi kbar bla preċedent, il-Prim Ministru Robert Abela reħa l-poter minn idu u issa l-politiku m’għadux involut fil-proċess tal-ħatriet tal-ġudikanti.
Dawn issa qed jinħatru wara sejħa pubblika u jiġu mgħarbla u magħżula mill-kumitat għall-ħatriet tal-ġudikanti.
Dawn ir-riformi li wettaq il-Gvern ta’ Dr. Abela sabu anki l-appoġġ tal-Kummissjoni Venezja.
Minkejja dawn l-iżviluppi fis-sistema tal-ħatriet tal-ġudikanti l-avukat Jason Azzopardi u l-għaqda Repubblika xorta baqgħu għaddejin bil-proċeduri kontra Malta fil-Qorti Ewropea għall-Ġustizzja.
Issa l-Avukat Ġenerali fil-Qorti Ewropea kkonkluda li l-fatt li l-ġudikanti huma maħtura mill-eżekuttiv tal-pajjiż ma jfissirx li huma influwenzati minn min jiġu maħtura.
Innota li f’ħafna stati membri oħra kien hemm l-involviment tal-politiku fil-ħatriet tal-ġudikanti, xi ħaġa li llum il-ġurnata f’pajjiżna mhux il-każ.
Il-Prim Ministru Robert Abela kien irrimarka li l-kelliem tal-Oppożizzjoni għall-Ġustizzja, Jason Azzopardi, kien mar quddiem il-Qorti Ewropea għall-Ġustizzja jipprova jikkolassa l-Qorti Maltija.
Intant fi stqarrija uffiċjali, il-Gvern laqa’ l-opinjoni tal-Avukat Ġenerali Hogan u rrimarka li l-opinjoni ta’ Hogan tagħti raġun lil Gvern, li ilu jsostni rigward il-garanziji tal-indipendenza tal-ġudikatura u tas-saltna tad-dritt f’Malta.
Il-Gvern saħaq li dan huwa wkoll dwar il-fatt li Malta hija pajjiż fejn il-prinċipji tas-saltna tad-dritt jitħaddmu u jiġu implimentati fil-prattika.
“Dan kontra l-ħafna allegazzjonijiet u kampanji li jsiru fl-oqsma internazzjonali biex Malta titpinġa bħala xi pajjiż lura fejn id-demokrazija u s-saltna tad-dritt ma jiffunzjonawx”, saħaq il-Gvern li temm jgħid li se jibqa’ impenjat li jkompli jsaħħaħ ir-riformi li qed iwettaq fl-oqsma tas-saltna tad-dritt u l-governanza tajba billi dejjem ikompli jtejjeb isem pajjiżna fuq livell Ewropew u dinji.
