Il-Forzi Armati ta’ Malta keċċiet suldat, waqt li ieħor tnaqqaslu l-grad li kien fih, minbarra passi dixxiplinarji kontra erbgħa oħrajn.
Dan b’rabta mas-serqa ta’ 132 kilogramma ta’ kannabis, li kienet miżmuma f’kontejner fil-barracks tal-Armata f’Ħal Safi, fi Frar li għadda u li, skont inkjesta amministrattiva ordnata mill-Gvern, instab li dawn naqsu mid-dmirijiet tagħhom.
Fi tweġiba għal mistoqsijiet ta’ ONE News, il-Forzi Armati qalet li ħadet azzjoni fil-konfront ta’ sitt persuni, wara li ntemm il-proċess ta’ investigazzjoni interna.
Jirriżulta li, fil-konfront ta’ dawn il-persuni, hemm total ta’ 55 akkuża, li tagħhom kollha nstabu ħatja.
L-Armata qalet lil ONE News li l-proċeduri kontra s-sitt persuni jinkludu total ta’ mija erbgħa u tletin (134) jum ta’ xogħol li tnaqqsulhom mill-paga tagħhom, waqt li ngħataw twissijiet uffiċjali lil dawk li se jibqgħu magħha.
Minbarra hekk, dawn ma jistgħux japplikaw għall-ingaġġi uffiċjali, b’telf ta’ benefiċċji u anke bin-nuqqas tal-possibilità li jiġu promossi fil-futur.
Fl-inkjesta amministrattiva, li tmexxiet mill-Imħallef irtirat Geoffrey Valenzia, ħareġ li s-serqa saret għax is-suldat, li suppost kien għassa mal-kameras tas-sigurtà, flok għamel xogħlu, qagħad jara film fuq it-tablet, għamel kwarta oħra mat-tfajla fuq il-mowbajl u anke sajjar.
B’rabta mal-każ tas-serqa, attwalwament għaddejjin proċeduri kontra sitt persuni ċivili, li lkoll wieġbu mhux ħatja għall-akkużi kontrihom.
