- Il-Prim Ministru b’messaġġ għas-sena l-ġdida
Is-sena l-ġdida għandha tkompli tagħmilna kburin. Qal dan il-Prim Ministru, Joseph Muscat, fil-messaġġ tiegħu għal bidu ta’ sena ġdida li xxandar illejla. Messaġġ li matulu mess diversi temi.
“Qed nibdew is-sena 2017 aħjar milli bdejna l-2016 għax pajjiżna huwa iktar b’saħħtu u miexi fid-direzzjoni t-tajba,” qal il-Prim Ministru li nnota kif Malta hija wieħed mill-iktar pajjiżi stabbli fl-Ewropa. Dan b’ekonomija fost l-aqwa fl-Ewropa, bil-Maltin li huma l-iktar poplu Ewropew pożittiv dwar il-futur tiegħu.
Ma naqsitx referenza għal fatt li mil-lum Malta ħadet għall-ewwel darba fl-istorja tagħha t-tmexxija tal-Presidenza tal-Kunsill tal-Unjoni Ewropea.
“Aħna lkoll, bħala pajjiż wieħed magħqud, għandna biex inkunu kburin,” iddikjara Joseph Muscat li tenna li dan ma jfissirx li se nsiru pajjiż ikbar u se jibqgħu ċerti problemi li niffaċċjaw ta’ kuljum. “ se nibqgħu sensibbli għall-bżonnijiet tal-familji u n-negozji Maltin u Għawdxin,” wiegħed Joseph Muscat.
Qal li filwaqt li nżommu saqajna mal-art u nifhmu li għandna l-limitazzjonijiet tagħna, irridu nqumu għall-okkażjoni u nagħmlu minn din il-Presidenza success: “Suċċess għall-Ewropa li għandha sfidi kbar quddiemha. Suċċess għal pajjiżna li se juri li d-daqs ta’ pajjiż mhuwiex ta’ xkiel, anzi jista’ jkun ta’ vantaġġ.”
Messaġġ mill-poplu
Il-Prim Ministru fakkar kif l-2016 ipprovdiet sfidi għad-dinja kollha: “Madwarna inħolqu sitwazzjonijiet ta’ instabbiltà f’perjodu straordinarju fejn popli għażlu li ma jaċċettawx l-istatus quo u jbiddlu, kultant anke permezz ta’ għażliet li hezzew l-establishment politiku. Ifisser li l-poplu għażel ħażin? Le”
Minflok qal li dan ifisser li l-popli bagħtu messaġġ ċar li mhux se jidraw jaċċettaw dak li jdejjaqhom.
“Mhux se jittolleraw min jgħidilhom li l-affarijiet ma jistgħux jinbidlu jew biex jikkuntentaw bli għandhom. Il-lezzjonijiet li tatna s-sena 2016 għandna nilqgħuhom bħala opportunità. Lezzjonijiet li għandna nieħdu ħsieb li nifhmu f’pajjiżna wkoll,” irrimarka l-Prim Ministru
Sostna kif fl-Ewropa rridu ndaħħlu sens ta’ għaqda ġdida.
“Matul is-sitt xhur li ġejjin nibdew, mill-Presidenza tagħna, proġett li jgħaqqad l-Ewropa li qed insejħulu reunion. Sadanittant se nkunu qed naħdmu biex immexxu aġenda umli u onesta fuq livell Ewropew u npoġġu ‘l quddiem prijoritajiet li jagħmlu differenza fil-ħajja ta’ kuljum fid-djar ta’ kull ċittadin Ewropew, mhux b’inqas f’darek,” kompla jgħid il-Prim Ministru. Madanakollu saħaq li waqt li jmexxi l-quddiem il-Presidenza l- “l-prijorità tal-Gvern Malti se tibqa’ li nkomplu nagħmlu differenza pożittiva fil-ħajja tiegħek u tal-familja tiegħek. Se ssibuna magħkom u qrib tagħkom iktar minn qatt qabel.”
Suċċess għal kulħadd
Joseph Muscat qal li l-gvern jifhem li għad għandna nies li minkejja t-tkabbir ekonomiku, għadhom iħossuhom qed jaqgħu lura. “Nifhmu wkoll li minkejja li qatt ma kellna xogħol daqs kemm għandna f’pajjiżna llum, għad hemm min jistenna kundizzjonijiet aħjar. Se nkomplu nindirizzaw dawn ir-realtajiet bil-fatti. Nistgħu nindirizzaw dawn ir-realtajiet minħabba dak li għamilna fl-ewwel tliet snin u nofs ta’ din il-leġislatura kien li nsaħħu l-ekonomija,” qal Joseph Muscat li għamel referenza lejn diversi miżuri li ttieħdu. Qal li kien “għalhekk irnexxielna nwieżnu lill-pensjonanti, lill-familji bi dħul baxx, lill-persuni b’diżabbiltà, lin-negozji ż-żgħar, lill-ommijiet u lin-nisa li qed jaħdmu, lill-familji b’ġenitur wieħed, lill-familji middle-class li qed jissaħħu u li iktar nies qed iħossuhom parti minnha.”
Hawm emfasizza li dan kollu ma sarx b’kumbinazzjoni. Sar għax il-gvern ħadem bil-għaqal matul dawn it-tliet snin u nofs biex f’dak kollu li sar jintlaħaq kuħadd.
“Mill-ewwel bdejna ndawru r-rotta ekonomika billi raħħasna l-income tax u l-kontijiet tad-dawl u l-ilma u lħaqna lil kulħadd. Komplejna billi indirizzajna l-isfidi li kellna fil-qasam tax-xogħol u għenna l-ommijiet u l-ġenituri jaħdmu billi għennihom fil-ħajja ta’ kuljum. Għenna lill-persuni b’diżabiltà joħorġu jaħdmu u jgħixu b’inqas xkiel. Imbagħad indirizzajna għall-ewwel darba fi snin kbar lill-pensjonanti, l-ewwel billi għollejna l-pensjoni, u din is-sena billi neħħejna t-taxxa minn fuq il-pensjoni. Għollejna effettivament ukoll il-pensjoni minima,” qal il-Prim Ministru.
Hawn wissa kif jekk ma noqogħdux attenti u ma nkunux bil-għaqal fl-għażliet li nagħmlu, nistgħu nitilfu kollox.
“Din is-sena se tkompli tibni fuq it-tliet snin li għaddew. Se nkomplu nilħqu lil kulħadd. Irridu nagħmlu minn din is-sena waħda ta’ suċċess għal kulħadd,” sostna Muscat.
Qal li l-gvern huwa determinat li jagħmel inqas żbalji mis-sena ta’ qabel. Fuq kollox “irridu nerġgħu nispiċċaw l-2017 billi ngħidu għalaqnieha aħjar milli qed nibdewha.”
Hawn għamel ukoll appell għall-għaqda: “Inħarsu lejn dak li jgħaqqadna u nwarrbu lil min irid jifridna. Ma nħallu lil ħadd idaħħal feles bejnietna bħala poplu wieħed magħqud u kburi bli qed jagħmel.”
B’ dan l-appell u l-awgurju tal-familja tiegħu l-Prim Ministru temm il-messaġġ f’din il-bidu ta’ sena ġdida.
Messagg tas-Sena l-Gdida / New Year’s Message #Malta https://t.co/mLJ1u1vU4H
— Joseph Muscat (@JosephMuscat_JM) December 31, 2016
