It-Tlieta filgħaxija fic-Centenary Stadium iċ-ċampjins lokali Hamrun Spartans ġew megħluba mill-qawwa ta’ Maccabi Haifa ta’ Iżrael b’żewġ gowls f’kull taqsima.
Il-partita intlagħbet quddiem folla sabiħa iżda li kienet ikkundizzjonata min ħin twil wieqaf hekk kif ir-referee tal-konfront kellu jwaqqaf il-partita minħabba flares li twadbu kemm fil-pitch kif ukoll fid-direzzjoni tal-partitarji ta’ Hamrun.
L-Spartans ħarġu aggressivi fit-tentattiv li jaħsdu lill-avversarji u konklużjonijiet ta’ Djuranovic u Jonny ġew imrażna mid-difiża tal-Iżraeliti.
Mat-tokki tal-20 minuta, r-referee waqqaf il-partita għal ftit anqas minn għaxar minuti meta l-partitarji ta’ Maccabi Haifa wadbu flares fil-ground.
Lejn tmiem l-ewwel taqsima Maccabi Haifa skorjaw darbtejn. Fil-41 minuta, minn azzjoni ta’ korner, Frantzdy Pierrot bir-ras xeħħet fix-xibka għal 1 – 0 biex ftit tal-ħin wara, ħarba tajba li ġiet konkluża minn Dean David għal 2 – 0 sal-intervall.
L-Spartans ħarġu aggressivi ħafna mal-bidu tat-tieni 45 minuta u filfatt kienu sfortunati li laqtu l-lasta darbtejn; l-ewwel minn azzjoni diretta ta’ korner u ftit sekondi biss wara konklużjoni ta’ Bjelicic stampat mal-lasta.
Fl-aħjar mumenti ta’ Hamrun, xejn deplorabli għal darba oħra hekk kif partitarji ta’ Maccabi Haifa xeħtu flares fid-direzzjoni tal-partitarji ta’ Hamrun bir-referee din id-darba jwaqqaf il-konfront għal kważi nofs siegħa sħiħa u wara komunikat uffiċjali, l-partita tkompliet.
Hekk kif tkompliet il-partita, preċiżament fil-57 minuta Hamrun sofrew it-tielet gowl meta minn azzjoni ta’ corner, ballun eventwalment spiċċa mill-ġdid fuq ras Frantzdy Pierrot li xeħet fix-xibka tad-debuttant Marchetti.
Ir-reazzjoni ta’ Hamrun ma’ waslitx anzi l-avversarji skorjaw ir-raba u l-aħħar gowl meta Anan Khalaili approfitta minn żball difensiv qabel ma’ skorja għal Maccabi Haifa.
Bil-partita mirbuħa u mitlufa, Hamrun komplew jagħtu kollox u konklużjoni ta’ Luke Montabello lejn tmiem il-partita ġiet salvata minn fuq il-linja tal-gowl.
Bla dubju dan ir-riżultat jagħmila ħafna diffiċli biex il-ġimgħa d-dieħla barra mill-pajjiż, Hamrun Spartans idawwru r-riżultat favur tagħhom.
Ritratt: Hamrun Spartans Media
