L-artista Maltija Ira Losco se tkun il-mistiedna ewenija taċ-ċelebrazzjonijiet nazzjonali tal-aħħar tas-sena li se tagħlaq is-separju mhux biss fuq l-2018, iżda wkoll fuq ir-renju tal-Belt Valletta bħala l-Kapitali Ewropea tal-Kultura.
Id-dettalji taċ-ċelebrazzjoni li se tilħaq il-qofol tagħha mat-tokki ta’ nofsilejl f’Misraħ San Ġorġ tħabbru f’konferenza tal-aħbarijiet miċ-ċermen ta’ Valletta 2018 Jason Micallef, flimkien mal-Ministru Owen Bonnici u s-Segretarju Parlamentari Deo Debattista.
F’kummenti ma’ ONE News il-kantata Ira Losco qalet li tinsab onorata li se tieħu sehem f’dawn iċ-ċelbrazzjonijiet:
“Huwa ta’ pjaċir għalija li nżomm kumpanija lil dawk in-nies li forsi m’għandhomx il-kumpanija ta’ ħaddieħor jew tal-familjari tagħhom. Nieħu gost li x-show tagħna, l-ispettaklu tagħna ħa jżommilhom kumpanija”.
Żiedet tgħid li tinsab kuntenta li se taqsam il-mużika tagħha ma’ dawk li m’għandhomx l-opportunità li jsegwuha fuq il-pjattaformi soċjali:
“Meta int għandek l-opportunità li titla’ fuq il-palk u tagħti l-prestazzjoni tiegħek u jkollok iċ-ċans li taqsam dawn il-kanzunetti man-nies li forsi mhux dejjem ikollhom l-opportunità li jisimgħuhom. Mhux forsi jkunu marru youtube u raw il-videos tiegħek, imma jkunu hemm f’dak il-post u jiġu jisimgħu l-mużika live, hija xi ħaġa li tagħtini ħafna pjaċir”.
Iċ-Chairman tal-Fondazzjoni Valletta 2018 Jason Micallef fisser l-edizzjoni ta’ din is-sena bħala speċjali għall-Belt Valletta. Qal li fl-ispetakklu se jieħdu sehem ukoll bosta artisti oħrajn fosthom id-duo lokali Xarulu.
Il-Ministru għall-Kultura Owen Bonnici qal li l-festeġġjamenti ta’ lejlet l-ewwel tas-sena fil-Belt saru jiġbdu lejhom eluf kbar ta’ Maltin:
“Hija x-xewqa tagħna li l-poplu tagħna kollu jingħaqad fi żmien festiv. Naturalment il-Milied u l-ewwel tas-sena huma festi ta’ għaqda nazzjonali u aħna nixtiequ li anke din l-attività tkun opportunità biex inkomplu ningħaqdu bħala poplu, u nkomplu nħarsu lejn l-attivitajiet li jġibuna flimkien u mhux lejn l-affarjiet li jifirduna”.
Is-Segretarju Parlamentari Deo Debattista qal li matul il-festa għas-sena l-ġdida, il-Belt se toffri okkażjoni spejċali mhux biss għal Maltin u l-Għawdxin izda wkoll għal mijiet ta’ turisti li jżurnuna għal dan l-iskop.
