L-Erbgħa filgħodu bdiet tinstema’ l-kumpilazzjoni tax-xhieda b’rabta mal-każ ta’ Jean Paul Sofia.
Ħames persuni huma mixlija bil-qtil involontarju taż-żagħżugħ f’Diċembru tas-sena li għaddiet u dawn jinkludu lill-kuntratturi Matthew Joseph Schembri u Kurt Buhagiar, lill-Perit Adriana Zammit, u lill-iżviluppaturi Milomir Jovicevic u martu Dijana.
Hekk kif bdiet il-kumpilazzjoni xehed il-Kuntistabbli Darren Farrugia hekk kif spjega li dakinhar tal-inċident daħlet telefonata fl-għassa ta’ Raħal Ġdid dwar inċident li seħħ fiż-żona industrijali ta’ Kordin hekk kif ċeda saqaf.
Hekk kif Farrugia flimkien ma’ Kuntistabbli ieħor marru fuq il-post huwa spjega li ftit wara waslu Matthew Schembri u Kurt Buhagiar. Filwaqt li tteħdulhom id-dettalji u dawk tan-nies fuq il-post waslet ukoll il-Perit Zammit li kienet taħt xokk kbir tant li kellha bżonn assistenza medika. Dak il-ħin hija qalet li ħajjitha spiċċat.
Farrugia spjega wkoll li ġew infurmati li qalb it-tifrik kien hemm 6 persuni, b’4 minnhom ħarġu minn qalb it-tifrik, b’Sofia baqa’ ħariġx u l-mobile tiegħu jindika li għadu fuq il-post.
Tul il-kumpilazzjoni xehed ukoll l-Ispettur Anthony Magri li spjega li daħlet ukoll telefonata fl-għassa ta’ Raħal Ġdid. Spjega li meta kien fuq il-post mal-ħin sar jaf li żewġ ħaddiema kienu fil-periklu tal-mewt, tnejn weġġgħu gravi u ieħor kellu ġrieħi ħfief.
Magri spjega wkoll li ġisem Jean Paul Sofia inħareġ minn qalb it-tifrik għall ħabta tas-sagħtejn u għaxra ta’ filgħodu u ġie ċċertifikat mejjet mit-Tabib tal-Emerġenza Michael Spiteri.
Magri aċċenna wkoll għall-istqarrijiet tal-akkużati mal-Pulizija hekk kif spjega li Matthew Schembri kien emozzjonat ħafna, anke ħabba r-relazzjoni tajba li kellu ma Sofia.
Fis-seduta xehed ukoll l-Ispettur Paul Camilleri li rrimarka kif filwaqt li Schembri u Buhagiar wieġbu għal xi domandi, it-tlieta l-oħra ma tkellmux.
Schembri qal r-ritratti li kien jieħu Sofia fuq is-sit kien jibgħathom lilu biex ikun infurmat dwar ix-xogħol li jkun għaddej.
