Fil-ħarġa tagħha tal-Ħadd, il-gazzetta Maltatoday żvelat li d-Deputat Nazzjonalista David Thake għandu kumpanija oħra, li huwa shareholder waħdu fuqha, li għandha iżjed min-nofs miljun ewro f’VAT dovuta lill-Istat.
Dan ifisser li b’dak żvelat issa, Thake għandu mat-€820,000 VAT dovuta, liema ammont li ma ħallasx imur lura s-snin.
Skont dak rappurtat mill-Maltatoday, id-Deputat Nazzjonalista li kien jagħmel il-programmi fuq ir-radju tal-Partit Nazzjonalista jippriedka fuq il-korrettezza, għandu kumpanija oħra bl-isem ta’ Maltashopper Ltd. u minn mindu din nħolqot fl-2011, qatt ma ssottemiet l-accounts mar-Reġistru Malti għall-Kumpaniji.
Dan ifisser li l-kumpanija ta’ Thake naqset tagħmel dan għal għaxar snin sħaħ.
Il-gazzetta rrappurtat li meta hi affaċjat lil Thake b’dan l-iżvilupp ġdid, huwa ma ċaħadx li ma ħallasx mal-€550,000 f’VAT dovuta fuq il-kumpanija Maltashoppers biss.
Mill-ammont kollu li għandu xi jħallas f’VAT dovuta fuq iż-żewġ kumpaniji, Thake saħaq li hemm minnu parti mid-diferiment tat-taxxa, miżura tal-Covid-19.
Meta affaċċjat bil-mistoqsijiet, Thake spjega wkoll li dak li ma għamilx f’għaxar snin se jagħmlu issa.
Din l-istorja ġdida fuq li Thake ma ħallasx it-taxxa dovuta ħarġet fil-beraħ ġimgħa u nofs wara li t-Times żvelat l-ewwel storja ta’ Thake, li l-kumpanija l-oħra li wkoll huwa l-uniku shareholder fuqha, Vanilla Telecoms, għandha ftit aktar minn €270,000 f’VAT mhux imħallas.
Dan ifisser li fuq il-każ biss ta’ Vanilla Telecoms, Thake ma ħallasx VAT fuq madwar miljun u nofs ewro dħul u fuq medda twila ta’ żmien.
Quddiem dan kollu, il-Kap Nazzjonalista Bernard Grech ħareġ jiddefendi lil Thake għal darba wara l-oħra b’diversi stqarrijiet fosthom l-aħħar waħda, ilbieraħ filgħodu fejn meta staqsejnih f’konferenza tal-aħbarijiet dwar David Thake, Grech qalilna li għandu fiduċja f’Thake u dak li qal huwa aċċettabbli.
Fil-fatt Grech qal, “David Thake wieġeb id-domandi tiegħu, jien għandi fiduċja li dak li qiegħed jgħid huwa allura minnu u aċċettabbli.”
David Thake, anki qabel sar Deputat fejn ħa s-siġġu Parlamentari ta’ Simon Busuttil, kien jikteb u jitkellem kontra t-tmexxija t’Adrian Delia u saħansitra sfiduċjah bħala parti mill-Grupp Parlamentari Nazzjonalista.
Huwa kien fost l-ewlenin li ħadem biex tpoġġa Bernard Grech Kap, ieħor li għamel snin ma jħallasx it-taxxa u ra kif għamel biex jirranġa wara li kien qal li se joħroġ għal Kap tal-Partit Nazzjonalista.
Quddiem dan kollu l-Partit Laburista kien saħaq li Bernard Grech huwa ostaġġ tas-sitwazzjoni.
Dan għaliex għandu problema ta’ kredibilità minħabba li d-dnub tiegħu huwa bħan-nuqqas ta’ min poġġih Kap.
