Kull ħaddiem għandu valur, u aħna qegħdin fil-politika biex intejbu l-ħajja tal-ħaddiema kollha.
Kliem il-Prim Ministru u Mexxej Laburista Robert Abela, f’intervista f’Jum il-Ħaddiem, flimkien ma’ martu Lydia u binthom Giorgia Mae.
Fl-ewwel Jum il-Ħaddiem tiegħu fit-tmun tal-pajjiż u tal-Partit Laburista, Robert Abela wassal messaġġ ta’ kuraġġ u fakkar li wara l-maltemp jiġi l-bnazzi.
Il-Prim Ministru Robert Abela stqarr: “Kburi li flimkien mal-Kabinett, mal-Grupp Parlamentari ħadna deċiżjonijiet li minkejja li ma kelniex manual fuq xiex nistrieħu, nemmen li kull deċiżjoni li ħadna kienet fit-tajjeb, ħalliet riżultati li huma mixtieqa fuq kollox ħarisna s-saħħa tal-poplu Malti u Għawdxi f’mument daqstant importanti.”
Mistoqsi jekk qattx immaġina lilu nnifsu Prim Ministru, Robert Abela qal li dejjem għamel ix-xogħol fdat lilu b’lealtà u mħabba lejn Malta, kif għadu jagħmel sal-lum.
U bħalu tagħmel martu Lydia: “Meta ddikjara Robert li se jitfa l-kandidatura tiegħu kont lesta li ngħin fejn nista’ u nkun ta’ spalla għalih f’kull mument.”
Il-Prim Ministru tenna d-determinazzjoni tiegħu biex din il-leġislatura tkun l-aħħar waħda b’rappreżentanza baxxa ta’ nisa fil-politika, għaliex mill-elezzjoni ġenerali li jmiss, se jidħol fis-seħħ mekkaniżmu li se jibbilanċja r-rappreżentazzjoni tas-sessi fil-Parlament.
Dr Abela sostna: “Konvint ħafna fl-importanza tal-parteċipazzjoni ta’ aktar nisa fil-ħajja pubblika, fil-ħajja politika f’kull livell tas-soċjetà tagħna. Kull darba li kien hemm nisa f’karigi importanti dejjem taw riżultati mill-aqwa.”
F’dan il-kuntest, mart il-Prim Ministru irrakkontat storja ta’ mara b’żewġt itfal li ltaqgħet magħha u kienet bla xogħol, u li llum qed tgħin biex taqla’ l-ħobża ta’ kuljum flimkien ma’ żewġha.
Is-Sinjura Abela stqarret: “Għidtilha titħajjar toħroġ taħdem? Qaltli kieku iva nitħajjar, u dakinhar kont għintha toħroġ taħdem. Ħarġet taħdem, tista’ llum il-ġurnata tgħin il-familja finanzjarjament u kull darba li niltaqa’ magħha dil-mara tgħidli grazzi, għaliex għamilt il-kuraġġ biex noħroġ naħdem u nkun jien ukoll li qed ngħin lill-familja tiegħi.”
Robert Abela qal li kemm ilu fit-tmun tal-pajjiż, kellu bosta deċiżjonijiet diffiċli x’jieħu, imma wkoll mumenti sbieħ.
Dr Abela sostna: “Għada se jkollna esperjenzi sbieħ u għaldaqstant jiena verament kburi b’din il-kollettività tal-poplu li kulħadd qed jiġbed ħabel wieħed biex verament noħorġu minn dan il-mument u ngħinu, minjaf għada pitgħada numru ta’ snin oħra, kemm verament konna hemmhekk għal pajjiżna fil-mument li sejħilna.”
U issa li t-tfal mhux imorru skola minħabba l-pandemija tal-COVID-19, kif qed tqatta’ ħinha d-dar iċ-ċkejkna Giorgia Mae?
Giorgia Mae qalet: “Nagħmel l-online lessons, nagħmel il-homework.”
U għalkemm irid l-aqwa għal bintu fejn tidħol l-iskola, Robert Abela jemmen li l-edukazzjoni tmur lil’hinn miċ-ċertifikati.
Il-Prim Ministru kompla jgħid: “Jiena naf ħafna persuni li m’għandhomx edukazzjoni formali jiġifieri qatt ma marru Università, qatt ma kellhom edukazzjoni terzjarja imma huma fost l-aktar nies edukati li naf, fil-manjieri tajbin li għandhom, fil-mod li jimxu tajjeb ma’ ħaddieħor u din hija l-lezzjoni li jien nixtieq ngħaddi lil Giorgia kif ukoll li nikkomunika ma’ ħafna nies.”
Omm Giorgia appellat lill-ġenituri biex jużaw dan il-ħin b’mod għaqli, u jqattgħu ħin ta’ kwalità ma’ uliedhom.
Giorgia Mae ddeskriviet lill-ġenituri tagħha: “Il-papà li huwa kind-hearted, he’s caring and always smiles. Il-mummy kind-hearted u caring ukoll u tqatta’ ħafna ħin miegħi.”
Il-Mexxej Laburista fakkar li l-festa ta’ Jum il-Ħaddiem tirrifletti l-bażi tal-Partit Laburista, li tant jemmen fil-valur tal-ħaddiema.
Huwa qal: “Kull min jaħdem għandu valur u anki min ma jaħdimx u min jixtieq jaħdem u ma jistax, il-pensjonanti tagħna, u għaldaqstant illum qed niċċelebraw dak il-jum daqstant sabiħ u għażiż għalina għaliex ifisser il-politika li verament nemmnu fiha bħala Partit.”
