Ġew imħabbra żewġ inizjattivi ġodda li permezz tagħhom se jissaħħu l-ħiliet tal-biċċiera Maltin.
L-ewwel inizjattiva hi pjan għal żvilupp ta’ ħiliet fl-industrija tal-laħam permezz ta’ programm ta’ taħriġ mal-Kulleġġ Malti għall-Arti, Xjenza u Teknoloġija (MCAST).
Dan il-programm mistenni jindirizza nuqqas attwali ta’ ħiliet fl-industrija, kemm fil-qasam tal-biċċerija kif ukoll f’taqsimiet oħrajn fil-proċess li jwassal għall-provvista tal-laħam fil-katina tal-ikel lokali.
Min-naħa l-oħra, it-tieni inizjattiva hi t-tiġdid ta’ ftehim li hemm bejn il-Ministeru għall-Agrikoltura, is-Sajd u d-Drittijiet tal-Annimali mal-MCAST, li permezz tiegħu se tkompli tissaħħaħ ir-relazzjoni u l-kollaborazzjoni bejn iż-żewġ partijiet.
Waqt żjara fil-Biċċerija Pubblika, il-Ministru Anton Refalo spjega li l-programm se jkopri l-proċess kollu permezz ta’ taħriġ dwar il-karatteristiċi ta’ laħmijiet u qatgħat differenti tal-laħam, l-iġjene fl-ipproċessar tal-ikel, is-saħħa u s-sigurtà fl-ipproċessar tal-laħam, l-iġjene fl-ipproċessar tal-ikel, iż-żamma tal-għodda u t-tikkettar, fost taħriġ ieħor.
Dan it-taħriġ se jsir biex tkun żgurata l-kwalità tal-laħam.
Qal “Flimkien, permezz tal-edukazzjoni, qegħdin minn naħa nagħmlu kors għall-ewwel darba lill-biċċiera tagħna biex hemmhekk inkunu nistgħu wkoll inġibu ’l quddiem il-ħiliet ta’ dawn il-persuni. Min-naħa l-oħra wkoll inizjattiva importanti hi li niffirmaw Memorandum of Understanding bejn il-ministeru mmexxi minni u min-naħa l-oħra wkoll iċ-ċentru tal-MCAST biex issir aktar innovazzjoni u riċerka f’dan is-settur.”
Il-Ministru spjega li, wara diskussjonijiet bejn il-Veterinary Regulation Directorate u l-MCAST, minbarra taħriġ fir-rigward tal-laħam aħmar, li fil-fatt jiġi pproċessat fil-Biċċerija stess, se jingħata wkoll taħriġ fuq il-laħam abjad, bħal tjur u fniek, li ma jinqatilx fil-Biċċerija Pubblika.
Preżenti għaż-żjara kien hemm ukoll il-Ministru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni, Clifton Grima, li qal ”din hi missjoni importanti tagħna li nipprovdu t-taħriġ f’kull settur tal-ekonomija biex inkomplu noħolqu mhux biss opportunitajiet, imma wkoll dak li l-istudent għandu bżonn biex l-istudji tiegħu jkunu ħolistiċi u jolqtu kull aspett ta’ dak li jkun qed jitgħallem fil-klassi.”
Qal “Filfatt qegħdin naraw inizjattiva li permezz tagħha jkollhom kors ġdid fl-MCAST li jwassal proprju għal karriera f’dan is-settur, li tant hu importanti, settur li hemm bżonn allura ħaddiema ta’ kwalità, ħaddiema li jkollhom proprju dik li hi ċertifikazzjoni li turi l-livell ta’ għarfien tagħhom, ħaddiema li jassiguraw prodott bnin Malti.”
