L-aħwa Adrian u Robert Agius magħrufa bħala tal-Maksar, Jamie Vella u George Degiorgio magħruf bħala ċ-Ċiniż tpoġġew taħt att ta’ akkuża wara li l-qorti rat li hemm biżżejjed provi fil-konfront tagħhom. Huma qed jaffaċċjaw akkużi b’rabta mad-delitti ta’ Daphne Caruana Galizia u tal-Avukat Carmel Chircop.
Fl-istess seduta li fiha l-Maġistrat tat id-digriet tal-Prima facie, kompliet tinstema’ l-kumpilazzjoni tax-xhieda. Minn fomm Vincent Muscat magħruf bħala l-Koħħu l-Qorti semgħet pass pass kif twettaq l-omiċidju tal-avukat Carmel Chircop lura fl-2015. Dan mill-mument li ġie ppjanat id-delitt madwar sitt ġimgħat qabel il-qtil għall-mument li ġew sparati erba’ jew ħames tiri f’dahar Carmel Chircop nhar it-8 ta’ Ottubru 2015.
Vincent Muscat spjega kif kienet qed issir pressjoni kbira fuqu u fuq George Degiorgio minn l-aħwa Adrian u Robert Agius sabiex iwettqu d-delitt. Spjega kif dakinhar tad-delitt hu, George Degiorgio u Jamie Vella marru b’karozza żgħira misruqa. Muscat qal kif għal bidu telgħu fis-sular ta’ fuq fejn kien hemm tieqa li minnha setgħu jaraw lill-avukat ġej lejn il-garaxx. Spjega kif ftit tal-minuti qabel ġie niżlu bil-karozza fis-sular tal-pjan fejn kien hemm il-garaxx ta’ Chircop u bil-karozza startjatha baqgħu jistennewh hemm.
Muscat tenna li kif wasal Chircop u kien għodu fetaħ l-ewwel biebha tal-garaxx, George Degiorgio saq il-karozza tant li Jamie Vella li kien bilqiegħda warajh ġie madwar metru u nofs il-bogħod mill-vittma. Fl-awla hawnhekk tenna kif Vella ħareġ idu barra mit-tieqa u b’pistola kulur il-fidda spara minn erba’ sa ħames tiri lejn l-avukat Chircop.
Huwa kompli jagħti d-dettalji dwar it-traġitt lura lejn il-garaxx f’Santa Venera u kif il-pistola George Degiorgio ħbieha fi sprall fil-binja tal-garaxx sakemm din twaddbet fil-baħar imgewżra fl-akwati ta’ Albert Town fil-Marsa.
Vincent Muscat xehed ukoll dwar laqgħa li hu u l-Avukat li kellu dak iż-żmien u li ma jistax jissemma fuq ordni tal-qorti kellhom mas-supretendent Keith Arnaud. Arnaud stess ukoll xehed dwar din il-laqgħa u spjega kif l-avukat qallu li Muscat xtaq ibiddel il-verżjoni tiegħu biex jgħid li kien gideb meta qal li Melvin Theuma kien involut fil-qtil ta’ Daphne Caruana Galizia. Meta Arnaud qallu li dan ma kienx ser ikun possibli, l-avukat talbu sabiex iħallih jagħmel dan jekk ma jridx li l-ħajja tal-Avukat, ta’ Vincent Muscat u l-qraba tkun fil-periklu. Madankollu, Vincent Muscat irrifjuta li jbiddel il-verżjoni tiegħu.
Il-Qorti ddeċidiet ukoll dwar talba li saret biex l-akkużati u l-avukati tagħhom jitħallew jiltaqgħu kollettivament flimkien fil-ħabs. Hija spjegat kif biex persuna taħt arrest tkellem avukat m’hemm l-ebda bżonn ta’ permess. Hija osservat li l-imputati u l-avukati tagħhom għandhom id-dritt li jħejju ruħhom bl-aqwa mod għall-każ madankollu l-Qorti astjeniet milli tiddeċiedi hi dwar din it-talba hekk kif din hija prerogattiva tad-direttur tal-Faċilità Korrettiva ta’ Kordin u għalhekk ħallietha f’idejh sabiex jiddeċiedi hu.
Rapport iddettaljat b’mod dirett
12:39 – Il-Qorti rat li hemm biżżejjed provi sabiex l-akkużati kollha jitqiegħdu taħt att ta’ akkuża. Is-seduta tal-lum intemmet u l-kawża ser tkompli tinstema’ fid-29 ta’ April.
12:35 – Vincent Muscat irrakkonta kif dakinhar tad-delitt huwa niżel għall-bomba Santa Venera u tela’ l-Bidnija biex iġib iċ-ċwievet tal-garaxx fin-Naxxar mingħand Alfred Degiorgio . Qal li wara mar in-Naxxar u poġġa l-bomba fil-garaxx. Spjega kif imbgħad għamlu xi siegħa u nofs oħra jgħassu u kif ikkalkulaw il-ħin li l-karozza ser tibqa’ fejn hi rrakkonta li George Degiorgio telaq lejn id-dar. Qal li hawnhekk kellu diġà l-bomba tal-mobile miegħu. Qal li Muscat kien sejjer lejn id-dar iżda ma tantx kien fadal ħin biex jerġgħu imorru u għalhekk mar l-appartament ta’ Alfred Degiorgio.
12:27 – Reġa’ daħal fl-awla Vincent Muscat il-Koħħu u hemmhekk bdiet il-kontro-eżami tad-difiża.
Id-difiża bdiet issaqsi dwar il-garaxx fil-Mosta u jekk dan kellux iktar minn sett ta’ ċwievet wieħed. Id-difiża staqsiet dwar jekk kienx hemm meta tbattal il-garaxx minn xi ħwejjeġ.
Huwa spjega li ma kienx hemm. Anke meta mistoqsi dwar min ġab l-armi, qal li dan skont x’qallu Alfred Degiorgio. Vincent Muscat ġie mistoqsi wkoll dwar numru ta’ armi li Muscat qal li kien ġabulhom biex iwettqu d-delitt ta’ Daphne Caruana Galizia. Muscat kien qal li tnejn minnhom kienu msaddin. Meta mistoqsi għaliex l-akkużati li suppost kienu jġibu l-armi tawhom armi msaddin għal biċċa xogħol daqstant kbira, ix-xhud wieġeb li dik il-mistoqsija mhux lilu trid issir.
Muscat kien qal li l-bomba tħalliet taħt dgħajsa maqluba rasha l-isfel fit-tinda tal-patata. Muscat qal li kien hemm bieb illi ma kienx jissakkar.
Id-difiża staqsiet għaliex il-bomba tħalliet fit-tinda tal-patata meta ftit wara kellhom jerġgħu jiltaqgħu magħhom fil-garaxx in-Naxxar. Vincent Muscat qal illi dan kien x’qallu George Degiorgio.
Meta mistoqsi jekk kienx hemm riskju sabiex itella’ din il-bomba mill-Marsa san-Naxxar Muscat qal illi kien hemm. Muscat qal li l-bomba bil-messaġġ li tattivaha kienu ġabuh magħhom Jamie Vella u Robert Agius. Madankollu, id-difiża ġibtitlu l-attenzjoni li l-bieraħ f’seduta oħra huwa qal li l-mobile seta’ xtrah Alfred Degiorgio. Meta mistoqsi għaliex qal hekk il-bieraħ, Muscat qal illi kienu nxtraw ħafna mobiles. Id-difiża hawnhekk qaltlu biex jiddeċiedi dwar liema verżjoni ser iżomm u liem hija vera. Muscat qal li l-mobile ġabuħ Jamie Vella u Robert Agius, iżda dan skond x’kienu qalulu xi ħadd mill-aħwa Degiorgio.
Spjega kif huwa lanqas ra dan il-messaġġ li qed jgħid li tawh Jamie Vella u Robert Agius. Dan ukoll huwa skond x’qalulu l-aħwa Degiorgio.
Id-difiża staqsew dwar meta segwew lil Daphne Caruana Galizia sal-Phoenicia fil-lejla tan-Notte Bianca u meta huma niżlu l-bomba Santa Venera ħalli jekk ikollhom l-okkażjoni jagħmlu d-delitt.
Muscat ġie mistoqsi għaliex fuq okkażjoni waħda li kellhom huma niżlu l-Bomba Santa Venera. Dan meta fil-ġranet ta’ wara huma baqgħu jagħmlu l-għassa barra d-dar tagħha f’tal-Bidnija. Dwar għaliex ħallew il-bomba Santa Venera u reġgħux ħaduha n-Naxxar, Vince Muscat spjega kif huma qatt ma kienu jaraw il-karozza barra u allura bdew jaqtgħu qalbhom li jkollhom l-opportunitá li jdaħħlu l-bomba fil-karozza barra d-dar tagħha.
12:04 – Il-Maġistrat daħlet lura fl-awla u minnufih tat id-digriet dwar talba li saret biex l-akkużati u l-avukati tagħhom jitħallew jiltaqgħu kollettivament flimkien fil-ħabs. Hija spjegat kif biex persuna taħt arrest tkellem avukat m’hemm l-ebda bżonn ta’ permess. Hija osservat li l-imputati u l-avukati tagħhom għandhom id-dritt li jħejju ruħhom bl-aqwa mod għall-każ, il-Qorti astjeniet milli tħalli lill-imputati u l-avukati tagħhom jiltaqgħu b’mod kollettiv. Dan hekk kif qalet li din hija prerogattiva tad-direttur tal-Faċilitá Korrettiva ta’ Kordin u għalhekk ħallietha f’idejh sabiex jiddeċiedi hu.
Tela’ jixhed is-supretendent Keith Arnaud dwar laqgħa li kienet saret ma’ avukat u Vince Muscat. L-avukat kien talbu biex Vincent Muscat jbiddel il-verżjoni tiegħu jekk ma jridx li l-ħajja tal-avukat, ta’ Vincent Muscat u l-familjari tiegħu tkun fil-periklu. Huwa kien talab li Vincent Muscat jitħall jibdel il-verżjoni sabiex jgħid li kien gideb dwar Melvin Theuma għaliex kellu itieh xi flus. Dan wara li Vincent Muscat kien infurmah bl-involviment ta’ Melvin Theuma fid-delitt ta’ Daphne Caruana Galizia. Is-supretendent qal kif dar lejn Vincent Muscat biex jara x’irid jgħid u dan qallu li hu ma jridx jibdel il-verżjoni tiegħu. Hawnhekk l-avukat tenna li għalhekk hu kien ser jieqaf hemmhekk waara li Vincent Muscat wera x’kienet ir-rieda tiegħu.
Spjega wkoll kif Arnaud staqsa dwar xi theddid li seta’ kien hemm iżda l-avukat ma riedx jagħti iżda dettalji.
Id-difiża fil-kontro-eżami innutat kif din il-laqgħa saret f’Settembru tal-2019. Huwa innota kif wara ġie arrestat Melvin Theuma u wassal lill-pulizija għal min allegatament wettaq ir-reat. Madankollu dak iż-żmien kien għadu ma ngħatax il-maħfra presidenzjali. Hawnhekk Arnaud qabel mad-difiża. B’hekk intemmet ix-xhieda tas-supretendent Keith Arnaud.
11:19 – Il-Qorti ssospendiet is-seduta għal madwar 20 minuta. Wara mistenni jixhed is-Supretendent Keith Arnaud sabiex jagħmel xi rimarki bil-ġurament. Dan qabel isiru l-mistoqsijiet tad-difiża lix-xhud Vincent Muscat fil-kontro-eżami. Fil-kontro-eżami d-difiża, għall-kuntrarju tal-prosekuzzjoni, tkun tista’ tagħmel ċertu mistoqsijiet diretti lix-xhud.
11:14 – Vincent Muscat qal illi xehed quddiem żewġ inkjesti differenti dwar iż-żewġ delitti differenti. Meta mistoqsi mis-Supretendent Keith Arnaud kif kien spjega r-rotta li tagħti għax-xena tar-reat fil-qtil tal-avukat Carmel Chircop, Muscat spjega kif huwa kien urihom ir-rotta fuq mapep li kienu ġabulu quddiemu.
Hekk intemm l-eżami mill-Prosekuzzjoni. L-avukati tal-parte civile ddikjaraw li f’dan l-istadju ser jirriservaw id-dritt għall-kontro-eżami. Id-difiża saħqet li llum lesta tkompli l-kontro-eżami.
Id-difiża talbet ukoll illi kwalunkwe stqarrija li ġiet mgħotija minn Vincent Muscat u li hija relattiva għal dawn il-proċeduri tkun esebita mill-prosekuzzjoni. Dan għal raġunijiet ta’ kontroll tax-xhieda ta’ Vincent Muscat u sabiex ikunu magħrufa d-dettalji kollha. L-avukat mill-uffiċċju tal-avukat ġenerali qal kif it-talba li qed tagħmel id-difiża titratta fuq informazzjoni li ma tikkostitwix evidenza materjali għall-każ inkwistjoni. Qal dan skond l-akkużi kif miġjuba f’dan l-istadju. Il-maġistrat ser tkun qed tagħti digriet dwar din it-talba iktar tard fil-proċess.
11:04 – Qal li għall-ewwel kien jiġi Robert Agius it-tinda tal-patata u wara beda jinżel Adrian Agius ukoll. Qal li George dejjem kien ikellmu hekk, b’ċertu arja.
Huwa qed jintwera numru ta’ ritratti u qed jintalab jgħaraf dak li hemm fihom, fosthom il-binja li fiha hemm il-garaxx li kienu qed jużaw huma biex iżommu l-karozza li ntużat fid-delitt.
Is-Supretendent Arnaud innota kif dan il-garaxx f’Santa Venera baqa’ jintuża sad-delitt ta’ Daphne Caruana Galizia u għal xi żmien kienu jżommu l-bomba hemm, meta kellhom f’moħħhom li jwettqu d-delitt lejn il-Belt Valletta. Vincent Muscat qal li l-garaxx baqa’ mikri għandhom u waqaf iħallas il-kirja wara d-delitt ta’ Daphne Caruana Galizia. Meta mistoqsi għaliex kienu krew dan il-garaxx partikolari huwa qal li m’għandu l-ebda idea min għażlu. Qal madankollu li George Degiorgio u Jamie Vella kienu qalulu biex jibda jikrieh.
Qal li meta għalqet il-kera ma jafx x’ġara minnu l-garaxx u m’għandux idea x’ġara miċ-ċwievet iżda jaf li qatt ma rritornahom lura lis-sid.
10:53 – Vincent Muscat spjega kif George Degiorgio qisu riedha ta’ bully u kien jaqbad jidgħi fuq it-telefon miegħu. Muscat qal li Robert kien qisu jibża minn George. Hawnhekk fl-awla Robert dar lejn George u b’daħqa taħ daqqa fuq driegħu bil-ponn u Vella qabad jidħaq. Il-Qorti ġibdet l-attenzjoni ta’ Jamie Vella.
Muscat qal li d-dgħajsa kienet qisu nxtrat wara li George solvielhom il-problemi bl-avukat Carmel Chircop. Qal li madankollu dan huwa biss x’jaħseb hu. Qal li George kien qallu li Adrian Agius kellu jagħti ħafna flus lill-avukat Carmel Chircop.
10:49 – Vincent Muscat spjega kif il-pjan għamluh qisu madwar sitt ġimgħat sa xahar qabel id-delitt. Dwar il-kwistjoni tal-flus bejn l-avukat Chircop u Adrian Agius, qal li din ma kienx jaf kemm kienet ilha. Qal li jaf li kellhom xi villa lejn Baħar iċ-Ċagħaq u minħabba li kienu jafu lil Carmel Chircop eluf kbar ta’ flus, din il-villa kellha x’taqsam mad-dejn.
Muscat spjega kif huwa tħallas għoxrin elf ewro tad-delitt. Dwar ħlas li ħa ħaddieħor qal li ma jistax jgħid kemm ħadu għaliex hu ma kienx jistaqsi kemm ser jieħdu l-oħrajn.
Dwar id-dgħajsa li kellhom l-aħwa Degiorgio qal ilha għandhom minn wara d-delitt ta’ Carmel Chircop. Qal li George kien mar jiekol Ta’ Xbiex u raha għall-bejgħ u ċempel lis-sid. Spjega kif dan talbu tletin elf ewro u wara rrakkonta kif rah iċempel lil Robert Agius u qallu li għandu bżonn xi flus biex jixtri d-dgħajsa. Spjega kif wara tah il-flus u d-dgħajsa inxtrat.
10:42 – Qal li kien għad hemm ukoll l-Ak47 u l-arma l-oħra. Spjega kif jaħseb li Jamie Vella kien ġabhom miegħu għaliex “huma kienu jġibu dawn l-affarijiet minn barra bil-katamaran.”
Spjega kif l-Ak47 kien fejn saqajhom ġewwa ħalli jekk jinqala’ xi ħaġa huma u jaħarbu u jiltaqgħu ma’ xi pulizija, Jamie Vella jkun jista’ jużah. Spjega kif Jamie Vella kien jaf juża l-Ak47 għaliex kien dilettant tal-arma. Qal li l-pistola l-oħra kienet għal George Degiorgio li dejjem kien ikun iridha ħdejh.
10:37 – X’ħin waslu fil-garaxx qal li Jamie Vella qalilhom li l-karozza ser jieħu ħsiebha hu hekk kif ser joħodha lil xi ħadd biex iqatta’ l-karozza. Qal li isfel tal-binja tal-garaxxijiet kien hemm xi tappiera bl-ilma u hemm niżel George Degiorgio jaħbi l-arma użata.
Wara marru f’appartament u hemmhekk Jamie Vella nħasel u biddel biex ineħħi xi traċċi tal-porvli. Qal li kellhom boroż taż-żibel kbar u l-ħwejjeġ tagħhom tefgħuhom fil-boroż. Qal li wara hu u George Degiorgio marru lejn il-Ħamrun u kien hemm post partikolari fejn kienu jintremgħu ħafna boroż taż-żibel minn dawk li joqgħodu hemm. Qal li huma marru u tefgħu l-boroż ma’ dan il-munzell.
Qal li wara wassal lil George għall-karozza u minn hemm komplew fi triqithom b’mod seperat. Qal li sa qabel il-qtil kien ħa ħamest’elef ewro.
Wara huwa rċieva ħmistax-il elf ewro oħra. Spjega kif għaxart’ elef ewro minnhom kien tahomlu George Degiorgio ftit tal-jiem wara fit-tinda tal-patata. Spjega kif għal kumplament kien qallu jitla’ ż-Żigumar Buġibba.
Qal li Robert kien b’karozza sewda, mar ħdejha u dan tah ħamest elef ewro. Qal li sa dan iż-żmien kienu għadhom iridu jmorru jarmu l-arma li kienet għadha fl-isprall fil-binja tal-garaxx.
Qal kif huwa pparkja fejn il-garaxx, u miegħu kien hemm George Degiorgio u Jamie Vella. Qal li wara li ġab l-arma George, saq lejn il-Marsa. Kif qed jiddeskrivi l-akwati Vincent Muscat jidher li qed jirrferi għal Albert Town fil-Marsa. Irrakkonta kif huwa pparkja mal-ġenb u George Degiorgio niżel u waddab l-arma li kienet imgeżwra ftit metri ‘l barra fil-baħar.
10:24 – Vincent Muscat qal li Carmel Chircop kien dahru lejhom u laħaq għamel madwar żewġ passi l’ġewwa fil-garaxx sakemm spara Jamie Vella. Chircop kellu baskett tal-ġilda “li jkollhom dawk l-avukati” spjega Muscat.
Vincent Muscat qal kif l-arma kienet “tar-romblu” biex l-iskrataċċ ma jaqgħux barra mill-karozza u għalhekk ma jħallux evidenza fuq il-post. Spjega wkoll kif Jamie Vella kellu pistola kulur il-fidda ta’ dan it-tip. Qal li kif sema’ t-tiri baxxa rasu mill-ewwel ħalli ħadd ma jarah hekk kif malli sparaw huwa kien jaf li kienu ser jitilqu minn fuq il-post.
Spjega kif ħarġu mir-rampa u saqu lejn il-ġenb tal-iskola sakemm ġew fit-triq prinċipali. Qal li minn x’ħin waslu fuq il-post għal x’ħin ġew biex jitilqu kienu għaddew bejn nofs siegħa u siegħa. Qal li ma marrux lejn il-wied ta’ Birkirkara minħabba li hemmhekk kien iżomm ftit tat-traffiku. Qal li marru lejn in-Naxxar u daħlu fuq l-ewwel triq fejn hemm l-uffiċċju postali ta’ Birkirkara. Qal li baqgħu sejrin f’garaxx f’Santa Venera fejn hemmhekk kien hemm il-karozza ta’ Muscat. Qal li sadattant George Degiorgio niżżel is-‘sunvisors’ tal-karozza biex ma tantx jidhru.
Qal kif hu u Jamie Vella kellhom balaclava biex jaħbu l-identitá tagħhom. Vincent Muscat qed jispjega t-triq kollha li għaddew minnha sakemm waslu fil-garaxx.
10:07 – L-akkużati u x-xhud Vince Muscat irritornaw fl-awla. Infakkru li qabel ġiet sospiża s-seduta x-xhud kien qed jispjega kif seħħ id-delitt tal-avukat Carmel Chircop. Huwa kien inqatel fil-garaxx tiegħu f’Birkirkara fit-8 ta’ Ottubru 2015. Il-Maġistrat daħlet lura fl-awla u ser tkompli x-xhieda.
09:48 – Qal li żammew il-karozza mixgħulha. Spjega li kif tfaċċa l-avukat u fetaħ l-ewwel bieba, George Degiorgio ġab il-karozza eżatt mal-avukat tant li bejn Jamie Vella u l-vittma kien hemm biss madwar metru u nofs. Hemmhekk Jamie Vella sparalu bejn erba’ tiri u ħames tiri min-naħa ta’ wara.
Is-seduta ġiet sospiża għal ftit minuti.
09:43 – Spjega li stennew fis-sular fejn kien hemm inqas garaxxijiet u għalhekk kien hemm inqas ċans li jiġi xi ħadd u jarahom. Qal li baqgħu jistennew mat-tieqa. Spjega kif bejn wieħed u ieħor kienu jafu l-ħin li fih kellu jiġi l-avukat. Spjega kif Jamie Vella qgħad jistenna iżda f’mument minnhom niżlu isfel jistennew fl-istess sular li fih Chircop kellu l-garaxx. Qal li huma pparkjaw f’rokna u baqgħu jistennew. Qal li Jamie kien bilqiegħda wara George Degiorgio biex isuqu eżatt qrib mal-avukat Chircop u Vella jkun jista’ jisparalu.
09:40 – Qal li waslu fid-daħla tal-garaxxijiet, telgħu fuq nett. Is-supretendent Kieth Arnaud qallu biex jispjega l-frażi “għamilna t-toroq”. Muscat qal li meta telqu bil-karozza misruqa biex imorru sal-garaxx ta’ Chircop huma għaddew mill-istess toroq li kellhom jgħaddu minnhom wara l-qtil biex jaraw li ma kienx hemm toroq magħluqin jew ostakli li setgħu itellfu l-ħarba tagħhom.
Qal li l-binja fiha madwar tliet sulari il’ fuq mil-livell tal-art. Qal li l-garaxx ta’ Carmel Chircop kien l-ewwel wieħed fuq ix-xellug kif tidħol. Muscat qal li hu ma kellux għalfejn ikun hemm iżda riduh magħhom fil-karozza. Qal li hu fil-karozza wara kien riekeb biss, u Jamie Vella u George Degiorgio kellhom jisparaw u jsuqu minn fuq il-post.
Qal li dakinhar tal-qtil waslu Birkirkara kien għadu qed ibexbex. Spjega kif kien qed isuq George Degiorgio u Jamie Vella kien riekeb fuq in-naħa ta’ wara, warajh, u Muscat kien ħdejn Jamie Vella. Qal li qgħadu tnejn wara ħalli jekk wieħed jitbaxxa ma jidhrux. Qal li l-pjan kien li jispara Jamie Vella. Meta mistoqsi għaliex huwa wieġeb li “għax hu kellu jispara”.
Hawnhekk l-imputati infaqgħu jidħku. Xi ħaġa li wasslet biex l-avukat tal-parte civile jiġbed l-attenzjoni fil-Qorti.
Muscat qal illi Jamie Vella kellu joħroġ idu mill-karozza waqt li jkun qed jiftaħ il-garaxx l-avukat u dan kellu jisparalu mingħajr ma jinżel mill-karozza.
09:31 – Bħalissa Vincent Muscat qed jixhed dwar il-qtil tal-avukat Carmel Chircop. Huwa spjega kif Adrian u Robert Agius bdew jisforzaw lilu u lil George Degiorgio sabiex joqtluh. Qal li sabu fejn joqgħod u fejn imur ix-xogħol. Qal li bdew isegwuh u darba marru l-Waterfront tal-Birgu f’festa pubblika u rawh jiekol ma familtu. Qal kif huma bdew isegwuh filgħodu u saru jafu li joħroġ mid-dar fit-8.30 ta’ filgħodu u jibqa’ sejjer il-Belt. Qal li George Degiorgio u Robert Agius marru jfittxu l-garaxx ta’ Carmel Chircop u sabuh.
Huwa qal kif raw li ma jkunx hemm toroq magħluqa x’ħin jiġu biex jaħarbu. Huwa żied jgħid kif fil-karozza kellhom pistola u revolver li xehed dwarhom fl-inkjesta. Iżda żied jgħid ukoll li fil-karozza kellhom Ak47.
Qal li marru hu, Jamie Vella u George Degiorgio b’karozza Toyota żgħira misruqa. Qal li fuq nett tal-binja tal-garaxxijiet kien hemm tieqa li minnha stajt tarah ġej lejn il-garaxxijiet lill-avukat.
Aktar qabel – F’awla 22 kompliet tinstema’ l-kumpilazzjoni tax-xhieda fil-każ kontra l-aħwa tal-Maksar Adrian u Robert Agius, Jamie Vella u George Degiorgio.
Dalgħodu kompla jixhed Vincent Muscat magħruf bħala l-Koħħu. Muscat tkellem ukoll dwar messaġġ li ntbagħat minn Robert Agius tal-Maksar u li fih qal illi jekk jidħol fil-qtil ta’ Daphne Caruana Galizia jkollu l-poter illi jneħħi lill-Partit Laburista mill-Gvern.
Muscat spjega kif avukat li ma jistax jissemma fuq ordni tal-Qorti mar il-ħabs u qallu biex jibdel il-verżjoni tiegħu u biex jgħid li Melvin Theuma kien jafu xi flus.
Spjega kif kienu qallu li xi ħadd minn qrabatu kien ser jinqatel jekk ma jibdilx il-verżjoni u għas-sigurtá tiegħu kien jaqbillu iżda huwa ma riedx jibdel il-verżjoni tiegħu.
