Wara li sar l-eżerċizzju tar-rikonċiljazzjoni bdew jiġu ssiġillati l-kaxxi tal-voti qabel jaqdbu triqthom lejn is-sala tal-għadd tal-voti fin-Naxxar.
Is-sala tal-għadd tal-voti fin-Naxxar preparata biex tibda tilqa’ l-ewwel kaxxi tal-voti, filwaqt li l-voti qed ikunu rikonċiljati.
Hekk kif daqqu l-għaxra ta’ filgħaxija l-votazzjoni madwar Malta u Għawdex ingħalqet b’mod uffiċjali.
Dan ifisser li issa jibda l-proċess fejn il-voti jiġu rikonċiljati fiċ-ċentri tal-votazzjoni qabel jaqbdu t-triq lejn is-sala tal-għadd tal-voti fin-Naxxar.
Wieħed jista’ jsegwi xandira diretta tal-proċess permezz ta’ xandira speċjali fuq l-istazzjon ONE filwaqt li s-sit ONE.com.mt ser tkun qed tkompli taġġornakom kontinwament bl-aħħar żviluppi b’rabta mal-elezzjoni ġenerali.
Fi stqarrija llejla l-Kummissjoni Elettorali qalet kif it-turnout sas-2pm kien ta’ 44.75%.
Intqal kif il-figura ppubblikata aktar kmieni llum sas-2pm hi ta’ dawk li vvutaw biss matul il-jum tas-Sibt u ma tinkludix elettui li vvotaw fil-ġranet ta’ qabel f’votazzjoni bikrija.
Il-Kummissjoni Elettorali qalet kif dan l-ammont żdied hekk kif ġew mgħoddija dawk li vvutaw qabel, jiġifieri ta’ 15,289, waqt li żdiedu ma’ dawk tal-lum sas-2pm, li jgħoddu 143,628.
Fi stqarrija l-Kummissjoni Elettorali ħarġet it-turnout approssimattiv sas-sagħtejn ta’ waranofsinhar fid-distretti elettorali.
| L-Ewwel Distrett | 43.85% |
| It-Tieni Distrett | 38.26% |
| It-Tielet Distrett | 38.87% |
| Ir-Raba’ Distrett | 42.81% |
| Il-Ħames Distrett | 40.23% |
| Is-Sitt Distrett | 39.32% |
| Is-Seba’ Distrett | 39.05% |
| It-Tmien Distrett | 42.55% |
| Id-Disa’ Distrett | 42.47% |
| L-Għaxar Distrett | 41.47% |
| Il-Ħdax-il Distrett | 39.28% |
| It-Tnax-il Distrett | 37.72% |
| It-Tlettax-il Distrett | 40.50% |
Sas-sagħtejn ta’ wara nofsinhar, it-turnout fl-Elezzjoni Ġenerali tas-Sibt kienet ta’ 40%.
Dan intqal fi stqarrija mill-Kummissjoni Elettorali ftit tal-minuti ilu.
Skont din l-istqarrija ntqal kif il-voti mitfugħa sa dan il-ħin huma 143,628.
Dan huwa meqjus bħala turnout relattivament baxx.
L-andament bħalissa huwa wieħed mexxej hekk kif bosta qed jikkonkorru għall-post tal-votazzjoni assenjat lilhom.
Wieħed jista’ jinnota kif il-ħin ta’ stennija biex wieħed jidħol jivvota huwa qasir u mexxej hekk kif bniedem jidħol jivvota u fi ftit ħin ikun lest.
Għall-ħabta tal-11:00am, il-President ta’ Malta, George Vella, flimkien ma’ martu, s-Sinjura Miriam Vella, dehru deħlin jivvotaw fil-post tal-votazzjoni, fil-Kulleġġ St Thomas Moore fiż-Żejtun.
Id-Deputat Prim Ministru u Deputat Mexxej għall-Affarijiet tal-Parlament, tal-Partit Laburista, Chris Fearne deher dieħel jivvota fil-post tal-votazzjoni, l-Iskola Primarja Santa Monica, f’Ħal Tarxien.
Għall-ħabta tal-10:00, il-Kap tal-Oppożizzjoni, Bernard Grech flimkien ma’ martu Annemarie Grech daħlu jivvotaw fl-Iskola Sekondarja taż-Żokrija fil-Mosta.
Il-Prim Ministru u Mexxej tal-Partit Laburista, Robert Abela, flimkien ma’ martu Dr. Lydia Abela għall-ħabta tad-9:00am ivvotaw waqt din l-elezzjoni ġenerali fiċ-ċentru tal-votazzjoni, fl-Iskola Primarja ta’ Sant’Anna f’Wied il-Għajn.
B’kollox hemm seba’ ċentri tal-votazzjoni għal min hu pożittiv għall-Covid-19 jew fi kwarantina mandatorja.
Kull min hu pożittiv jew fi kwarantina għandu jmur jivvota f’dawn iċ-ċentri minflok fil-kamra tal-vot kif imniżżel fid-dokument tal-vot.
- Fiċ-Ċentru ta’ Smart City se jkunu qed jivvutaw dawk tat-tieni u r-raba’ distrett.
- Fiċ-Ċentru tal-MCAST f’Raħal Ġdid se jivvutaw dawk tal-ewwel u s-sitt distrett.
- Fiċ-Ċentru ta’ Ħal Far se jivvutaw dawk tat-tielet u l-ħames distrett.
- Fiċ-Ċentru ta’ Ta’ Qali se jivvutaw tas-seba’ u l-ħdax-il distrett.
- Fiċ-Ċentru ta’ Pembroke se jivvutaw dawk tal-għaxar u t-tnax-il distrett.
- Fiċ-Ċentru tal-Life Sciences Park f’San Ġwann se jivvutaw dawk tat-tmien u d-disa’ distrett
- Fiċ-Ċentru tax-Xewkija se jivvutaw dawk tat-tlettax-il distrett.
- Fiċ-Ċentru li jinsab fl-Isptar Mater Dei għal dawk rikoverati l-isptar
Wieħed jista’ jinnota kif filwaqt li bosta kkonkorrew bi ħġarhom biex jivvotaw fil-post tal-votazzjoni allokat, l-andament hu wieħed mexxej hekk kif m’hemmx ħin ta’ stennija fejn wieħed jidħol jivvota u joħroġ fi ftit ħin.
Bosta nies jikkonkorru fil-lokalità taż-Żejtun biex jivvotaw.
Ftit wara s-7:30am deher dieħel jivvota d-Deputat Mexxej għall-Affarijiet tal-Partit, tal-Partit Laburista, Daniel Micallef.
Hu deher dieħel jivvota fiċ-ċentru tal-votazzjoni allokat fl-Iskola Primarja ta’ Ħad-Dingli.
Numru ta’ votanti bdew jikkonkorru fiċ-ċentri tal-votazzjoni li għandhom assenjata sabiex jivvotaw.
Kmieni dalgħodu l-Kummissjoni Elettorali bdiet il-proċess tat-tqassim tal-kaxex tal-voti fl-iskejjel u ċentri oħrajn assenjati biex fihom dawk eliġibbli jkunu jistgħu jivvotaw.
Il-proċess jinkludi l-issiġġillar tal-kaxxi tal-voti, li jammontaw għal 742 kaxxa tal-voti mqassmin f’116-il ċentru tal-votazzjoni. Ma’ dawn hemm ukoll iċ-ċentri speċjali għal dawk li huma pożittivi għall-COVID-19 jew jinsabu fi kwarantina preventiva.
Il-ħin tal-votazzjoni se jkun qed jibda fis-7:00am u jagħlaq fl-10:00pm.
Illum Malta tivvota fl-elezzjoni ġenerali 2022.
340,423 persuna huma eliġibbli biex jivvutaw f’din l-elezzjoni ġenerali wara li sal-Ġimgħa f’nofsillejl ma nġabrux 14,473 dokument tal-vot.
L-aktar żewġ distretti li minnhom ma nġabrux voti huma l-għaxar u t-tnax-il distrett.
Il-votazzjoni se tiftaħ ftit tal-minuti oħra, propjament fis-sebgħa ta’ filgħodu u tibqa’ għaddejja sal-għaxra ta’ filgħaxija.
Biex teżerċita d-dritt tal-vot trid tieħu d-dokument tal-vot.
B’kollox hawn 742 kaxxa tal-votazzjoni f’116-il ċentru ta’ votazzjoni madwar Malta u Għawdex.
Dan apparti li hemm seba’ ċentri ta’ votazzjoni għal votanti li huma pożittivi għall-Covid-19 jew fi kwarantina.
Dawn iċ-ċentri apposta li tibqa’ anki dieħel bil-karozza jinsabu f’Ħal Far, Pembroke, l-MCAST Raħal Ġdid, Life Science Park f’San Ġwann, Ta’ Qali, Smart City, l-isptar Mater Dei u x-Xewkija.
Huwa stmat li mal-4,200 votant jista’ jivvota f’dawn iċ-ċentri.
