Michel Rizzo, id-Direttur Maniġerjali preżenti ta’ Allied Group, il-kumpanija responsabbli mill-pubblikazzjoni tal-gazzetta The Times, flimkien ma’ Claude Licari eks uffiċjal finanzjarju ta’ Progress Press, ingħataw il-ħelsien mill-arrest wara li tressqu l-Qorti mixlija b’reati ta’ ħasil ta’ flus u frodi, fost akkużi oħra.
Huma, flimkien mal-kumpanija Progress Press tressqu l-Qorti wara aktar investigazzjonijiet mill-Pulizija tad-Dipartiment tal-Investigazzjonijiet tar-Reati Finanzjari.
Dik l-istess inkjesta, fil-konklużjonijiet tagħha kienet talbet lill-Pulizija biex tinvestiga d-diretturi tal-kumpanija Allied Newspapers.
Riċentament fil-midja ġie rrappurtat li t-Times setgħet frodat tliet kwarti ta’ miljun ewro lil Malta Enterprise fuq finanzjament li kisbet biex tinvesti f’magna tal-istampar.
Wara li l-Maġistrat Charmaine Galea qrat l-akkużi fil-konfront tal-imputati, Michel Rizzo wieġeb mhux ħati kemm għan-nom tiegħu u anke għan-nom tal-kumpanija filwaqt Licari wkoll ċaħad l-akkużi.
Il-Prosekuzzjoni talbet għall-ordni ta’ qbid u ffriżar tal-assi liema talba ġiet oġġezzjonata mill-Avukati tad-difiża.
Wara li l-Qorti semgħet l-argumenti taż-żewġ naħat hija ddeċidiet li tilqa’ t-talba tal-qbid u l-iffriżar tal-assi fil-konfront tal-kumpanija Progress Press, madankollu ċaħdet it-talba fil-konfront ta’ Rizzo u Licari.
Intant d-Difiża talbet għall-ħelsien mill-arrest tal-imputati, liema talba għaliha l-Prosekuzzjoni oġġezzjonat.
Wara li ż-żewġ partijiet għamlu l-argumenti tagħhom, il-Maġistrat Galea ssospendiet is-seduta sabiex tiddelibera d-deċiżjoni tagħha.
Malli rritornat, il-Maġistrat qrat id-digriet fejn fih hija tat l-ħelsien mill-arrest liż-żewġ imputati fuq diversi kundizzjonijiet.
Lil Michel Rizzo, il-Qorti ordnatlu li ma jistax isiefer, ma jkellimx xhieda fil-każ, ma javviċinax opri tal-baħar, ikun f’daru bejn il-11:00 ta’ billejl u s-6:00 ta’ filgħodu, ma jersaqx lejn Progress Press u jiffirma fl-għassa tal-pulizija ta’ San Ġiljan kull nhar ta’ Erbgħa u Sibt. Huwa ngħata l-ħelsien mill-arrest fuq depożitu ta’ €20,000 u garanzija personali ta’ €50,000.
Lil Claude Licari l-Qorti ordnatlu ma jsifirx, li ma jkellimx xhieda fil-każ, jiffirma fl-għassa tal-pulizija ta’ San Ġiljan kull nhar ta’ Erbgħa u Sibt, ikun f’daru bejn il-11:00 ta’ billejl u s-6:00 ta’ filgħodu, ma jersaqx lejn Progress Press.
Il-ħelsien mill-arrest ta’ Licari wkoll sar fuq depożitu ta’ €20,000 u garanzija personali ta’ €50,000.
16:12 – Il-ħelsien mill-arrest għal Claude Licari ngħata wkoll fuq bosta kundizzjonijiet; li ma jsifirx, li ma jkellimx xhieda fil-każ, jiffirma fl-għassa tal-pulizija ta’ San Ġiljan kull nhar ta’ Erbgħa u Sibt, ikun f’daru bejn il-11pm u s-6am, ma jersaqx lejn Progress Press u fuq depożitu ta’ €20,000 u garanzija personali ta’ €50,000.
16:11 – Il-libertà proviżorja mogħtija lil Michel Rizzo hija marbuta ma’ bosta kundizzjonijiet; li ma jistax isiefer, ma javviċinax opri tal-baħar, ikun f’daru bejn il-11pm u s-6am, ma jersaqx lejn Progress Press, jiffirma fl-għassa tal-pulizija ta’ San Ġiljan kull nhar ta’ Erbgħa u Sibt u fuq depożitu ta’ €20,000 u garanzija personali ta’ €50,000.
16:07 – Il-Qorti laqgħet it-talba għall-ħelsien mill-arrest ta’ Michel Rizzo u Claude Licari.
16:05 – Il-Maġistrat Charmaine Galea laqgħet it-talba għall-iffriżar tal-assi tal-kumpanija Progress Press iżda ċaħdet it-talba għall-iffriżar tal-assi ta’ Michel Rizzo, Direttur Maniġerjali tal-Allied Newspapers, responsabbli mill-pubblikazzjoni tat-Times u Claude Licari, eks uffiċjal finanzjarju.
16:03 – Tidħol lura l-Maġistrat Charmaine Galea u mistennija tagħti d-digriet.
15:32 – Il-Maġistat Charmaine Galea ssospendiet is-seduta sabiex tiddelibera d-deċiżjoni tagħha dwar il-ħelsien mill-arrest.
15:27 – Għadhom għaddejjin l-argumenti fuq it-talba tal-ħelsien mill-arrest.
15:23 – L-Avukat Montalto rribatta li d-Difiża kienet taf li l-imputati xi darba kienu ħa jkunu taħt arrest u xorta baqgħu jipparteċipaw bi ħġarhom fl-investigazzjonijiet.
L-Avukat Giglio sostna li d-Difiża qed titlob biex aktar persuni jixhdu f’dan il-każ. Tenna li persuni fil-Progress Press ilhom ġranet iħaffru fl-arkivji biex tnaddaf isimha. Huwa tenna wkoll li dawn in-nies huma nies serji li jridu juru li mxew b’diliġenza, Michel Rizzo inkluż.
15:15 – Il-Prosekuzzjoni qalet ukoll li s-sitwazzjoni għall-imputati nbidlet issa li qegħdin taħt arrest allura din il-kawża trid tiġi protetta.
15:14 – Il-Maġistrat talbet sabiex nimxu għat-talbiet tal-ħelsien mill-arrest.
Il-Prosekuzzjoni oġġezzjonat għal dawn it-talbiet għaliex għad hemm persuni li jridu jixhdu fosthom mill-Malta Enterprise u mill-Progress Press. Sostna li dan il-każ ikkumplikat irid jiġi spjegat minn nies pajżana.
15:12 – Il-Prosekuzzjoni tibqa’ ssostni li l-ordni tal-iffriżar tal-assi tkun qed tipproteġi din il-kawża.
15:11 – Huwa qal li Rizzo qatt ma rċieva rikavat personalment u għalhekk qed joġġezzjona għal din it-talba.
Giglio sostna li l-Prosekuzzjoni qed tgħid li ma kienx hemm dħul u li l-profil finanzjarju ta’ Rizzo huwa impekkabbli.
L-Ispettur Lianne Bonello ħadet il-ġurament sabiex titla’ tixhed.
Hija tgħid li €4,500 mill-flus ta’ Rizzo ma jistgħux jinstabu. Hija tgħid ukoll li kellu €700,000 f’liquid assets’ u li l-profil finanzjarju tiegħu ma ssenjalax problemi.
Giglio jsostni li ma hemm xejn ħażin u li l-Qorti għandha biżżejjed provi biex tikkonferma dan għal Rizzo. L-Avukat Montalto sostna l-istess ħaġa għall-klijent tiegħu bid-differenza li l-profil finanzjarju tiegħu huwa inqas minn ta’ Rizzo. Huwa qal li beda bħala wejter f’lukanda sabiex maż-żmien laħaq uffiċjal għoli mal-Allied.
15:05 – Id-Difiża sostniet li Michel Rizzo dejjem tkellem mal-Pulizija bħala uffiċjali tal-Kumpanija u għalhekk din tagħmel din is-sitwazzjoni kumplikata.
Il-Prosekuzzjoni qalet li l-evidenza tista’ turi li kien hemm dħul u allura trid tipproteġi dan id-dħul li jista’ jkun frodat milli jintuża.
15:02 – L-Avukat staqsa wkoll jekk hemmx dubju li Licari jistax jintervjeni fl-investigazzjonijiet. L-Ispettur wieġbet le.
Issa tela’ jixhed ukoll l-Ispettur Joseph Xerri.
L-Ispettur Xerri ġie mistoqsi jekk il-Pulizija stabbilitx jekk il-flus mill-Malta Enterprise qatt waslux għand Michel Rizzo. L-Ispettur qal li ma jirriżultax li dawn waslu għand Rizzo personalment.
Montalto staqsa jekk waslulux il-flus f’kapaċità oħra. L-Ispettur wieġeb li le.
Bħalissa ż-żewġ partijiet qed jagħmlu l-argumenti tagħhom fuq l-ordni ta’ qbid u ffriżar tal-assi.
14:52 – L-Avukat tad-Difiża Joe Giglio talab lill-Ispettur Ann Marie Xuereb sabiex titla’ tixhed. Hija telgħet fuq il-pedana tax-xhieda.
L-Avukat Joe Giglio staqsa lill-Ispettur Xuereb jekk taqbilx li kien hawn inkjesta mill-Maġistrat Josette Demicoli u li fiha tat struzzjoni lill-pulizija biex tinvestiga. L-Ispettur qablet ma’ dawn id-dikjarazzjonijiet.
Staqsa wkoll jekk Michel Rizzo kienx qed jaġixxi bħala Direttur tal-Kumpanija.
L-Ispettur qalet li l-imputat dejjem tela’ jixhed u pprovda dokumenti aktar milli kien mitlub. Għall-mistoqsijiet tad-Difiża l-Ispettur qalet li Michel Rizzo qatt ma rriżulta li pprova jintralċa l-investigazzjoni.
L-Ispettur qalet ukoll li l-persuni kollha involuti f’din l-investigazzjoni dejjem żammu mal-appuntamenti u t-talbiet tal-prosekuzzjoni.
L-Avukat Roberto Montalto staqsa jekk dawn l-istess mistoqsijiet u r-risposti għalihom japplikawx għal Claude Licari. L-Ispettur wieġbet fl-affermattiv.
L-Avukat Roberto Montalto staqsa jekk Claude Licari għadux jaħdem mal-kumpanija. L-Ispettur qalet li m’għadux jaħdem hemm però ma tafx id-data bl-eżatt.
14:43 – Il-Prosekuzzjoni talbet għall-ordni ta’ qbid u ffriżar tal-assi. L-Avukat Joe Giglio oġġezzjona għal din it-talba, f’isem Michel Rizzo u mhux f’isem il-kumpanija Progress Press Ltd.
14:41 – Licari qed ikun rappreżentat mill-Avukat Roberto Montalto filwaqt li Michel Rizzo u Progress Press Ltd qed ikunu rappreżentati minn Dr Joe Giglio.
14:40 – Claude Licari ta’ 41 sena, imwieled Ħ’Attard u huwa minn San Ġwann wieġeb mhux ħati għall-akkużi fil-konfront tiegħu.
14:39 – Michel Rizzo ta’ 56 sena minn San Ġiljan u mwieled Tas-Sliema wieġeb ukoll “defenittivament mhux ħati” għall-akkużi fil-konfront tiegħu.
14:38 – Il-kumpanija mixlija hija Progress Press Company Ltd. u li tagħha kien Chairman Vince Buhagiar, eks Direttur Maniġerjali ta’ Allied li wkoll qed jaffaċċja akkużi kriminali fosthom dwar ħasil ta’ flus.
Għan-nom tal-kumpanija Michel Rizzo wieġeb defenittivament mhux ħati għan-nom tal-kumpanija.
14:37 – Il-kumpanija mixlija hija rappreżentata minn Michel Rizzo stess li llum huwa akkużat quddiem il-Qorti wkoll.
Il-Maġistrat Charmaine Galea qrat l-akkużi fil-konfront tal-imputati fosthom frodi, ħasil ta’ flus u falsifazzjoni ta’ dokumenti.
14:27 – Michel Rizzo u persuna oħra maħsuba li hija l-kontrollur finanzjarju tal-Allied Newspapers se jkunu qed jaffaċċjaw akkużi kriminali quddiem il-Maġistrat Charmaine Galea. Il-preżentata se tkun qed issir f’awla 4.
Aktar qabel – Michel Rizzo, id-Direttur Maniġerjali preżenti tal-Allied Group, il-kumpanija responsabbli mill-pubblikazzjoni tal-gazzetta The Times, flimkien ma’ persuna oħra qed jitressqu l-Qorti taħt arrest u se jiġu mixlija b’reati ta’ ħasil ta’ flus u frodi, fost akkużi oħra.
Iż-żewġ persuni qed jitressqu wara aktar investigazzjonijiet mill-Pulizija tad-Dipartiment tal-Investigazzjonijiet tar-Reati Finanzjari, f’għeluq ta’ Inkjesta Maġisterjali dwar allegazzjonijiet ta’ ħasil ta’ flus u tixħim bejn Keith Schembri u l-eks Direttur Maniġerjali ta’ Allied Newspapers, tat-Times, Adrian Hillman.
Dik l-istess inkjesta, fil-konklużjonijiet tagħha kienet talbet lill-Pulizija biex tinvestiga d-diretturi tal-kumpanija Allied Newspapers.
Riċentament fil-midja ġie rrappurtat li t-Times setgħet frodat tliet kwarti ta’ miljun ewro lil Malta Enterprise fuq finanzjament li kisbet biex tinvesti f’magna tal-istampar.
