Erba’ Libjani li jgħixu f’pajjiżna u anki għandhom iċ-ċittadinanza Maltija wara li ilhom jgħixu hawn Malta, baqgħu jinżammu arrestati wara li s-Sibt tard filgħaxija tressqu l-Qorti mixlija b’ħasil ta’ flus, evażjoni tat-taxxa u serq ta’ karozzi lussużi.
L-akkużati ġew arrestati wara li f’operazzjoni li wettqu il-Pulizija mill-Iskwadra ta’ Kontra l-Ħasil ta’ Flus, ġew elevati żewġ vetturi lussużi, madwar €100,000 fi flus kontanti, ammont konsiderevoli ta’ ġojjelli u ħwejjeġ tad-ditta, pjanċi ta’ vetturi b’reġistrazzjoni barranija, apparat elettroniku li jinkludi fost oħrajn mobiles, pendrives, kompjuters, tablets u servers u ammont kbir ta’ dokumenti li qed jiġu analizzati.
Fil-Qorti ntqal li allegatament il-Libjani kienu qed jgħaddu eluf ta’ ewro mill-Ajruport Internazzjonali ta’ Malta.
ONE News hu infurmat li l-ammont involut mill-allegat attività kriminali huwa ta’ madwar €20 miljun.
L-ewwel li tressqu kienu Hesham Zayed u Essam Mohammed Edarnawi.
Dawn ċaħdu l-akkużi u ma talbux għall-ħelsien mill-arrest.
Zayed deher ukoll għan-nom ta’ kumpaniji tiegħu.
Intqal li s-sena l-oħra l-Pulizija kienet irċeviet informazzjoni fuq flus li kienu qed jgħaddu mill-Ajruport.
Intqal lilha li dan kien ilu jsir sa mill-2012.
Imbagħad tressaq Tamel Ramadan Ali Hdidan.
Dan ġie mixli li kien joħroġ flus mill-ajruport u jiddikjarahom f’isem Zayed.
Wara tressaq Khaled Bailey.
Dwar Baely intqal li minn fost l-akkużati, huwa kien l-iktar wieħed attiv minnhom.
Huwa ġie akużat ukoll li kien saq karozza misruqa mill-Ingilterra sa Malta.
Kemm Baely Hdidan ċaħdu l-akkużi u għamlu talba għall-ħelsien mill-arrest, liema talba ġiet miċħuda.
Intant il-Pulizija qalet li ġew arrestati wkoll xi Maltin b’rabta ma’ dan il-każ u nifhmu li minn dawk arrestati ma ġiex imressaq kulħadd għaliex il-Pulizija għadha mhiex f’pożizzjoni li tipprosekwixxi kontra kull persuna arrestata u għalhekk xi wħud ingħataw il-Police Bail.
Dan wara li skadew it-48 siegħa bil-liġi li wieħed jinżamm fil-kustodja tal-Pulizija qabel imur fl-iżbarra fil-Qorti.
L-investigazzjonijiet b’rabta ma’ dan il-każ saru b’koordinazzjoni ma’ diversi entitajiet barranin fosthom tal-Istati Uniti, tar-Renju Unit, tal-Italja u l-Europol.
AKTAR QABEL
22:38 – Il-Maġistrat ukoll ċaħdet it-talba għall-ħelsien mill-arest fil-konfront ta’ Khaled Baely
22:37 – Id-Difiża qed titlob għall-ħelsien mill-arrest, liema talba qed tiġi oġġezzjonata mill-Prosekuzzjoni fuq biża’ ta’ intralċ tal-provi. Id-Difiża sostniet li l-evidenza u x-xhieda mhix waħda pajżana. Intqal ukoll li l-imputat ilu jgħix hawn għal aktar minn għaxar snin u miżżewweġ u għandu familja f’Malta.
22:34 – Ir-raba’ u l-aħħar akkużat li qed jitressaq quddiem il-Qorti llejla huwa Khaled Baely ta’ 48 sena. Huwa jgħix il-Gżira u jaħdem bħala xufier.
Huwa wkoll ċaħad l-akkużi miġjuba kontrih.
Huwa akkużat ukoll li mexxa l-flus mill-ajruport f’isem Zayed, u ntqal li minn fost l-akkużati, huwa kien l-iktar wieħed attiv minnhom. Huwa akużat ukoll li kien saq karozza misruqa mill-Ingilterra sa Malta. Huwa daħħal il-karozza bil-katamaran.
22:25 – Nifhmu li llejla se jkunu tressqu b’kollox erba’ persuni. L-informazzjoni li għandu f’idejh ONE News hi li persuni oħra ġew arrestati iżda wħud ingħataw il-police bail hekk kif il-Pulizija ma kinitx f’pożizzjoni li tipprosekwixxi kontrihom wara li għaddew it-48 siegħa bil-liġi li jkunu fil-kustodja tal-Pulizija qabel jitressqu l-Qorti.
22:24 – Il-Qorti semgħet l-argumenti tad-Difiża u l-Prosekuzzjoni, u ddeċidiet li tiċħad it-talba għall-ħelsien mill-arrest tat-tielet akkużat.
22:22 – Id-Difiża qed titlob il-ħelsien mill-arrest filwaqt li l-Prosekuzzjoni qed toġġezzjona minħabba li għad hemm xhieda li jridu jixhdu u l-biża’ ta’ intralċ tal-provi. Intqal ukoll li l-akkużat għandu kuntatti barranin, u għalhekk hemm biża’ li dan jaħrab mill-pajjiż.
22:21 – L-akkużat, li għandu 41 sena u jgħix Ħaż-Żabbar, wieġeb mhux ħati.
22:19 – Fl-awla daħal l-akkużat Tamel Ramadan Ali Hdidan. Dan huwa mixli li kien joħroġ flus mill-Ajruport Internazzjonali ta’ Malta u jiddikjarahom f’isem Zayed. Intqal ukoll li l-Pulizija kellha informazzjoni li huwa kien involut f’xiri u bejgħ ta’ steroids, u kien hemm anke suspett li dan kien qiegħed jimmanifatturahom.
22:07 – Il-Qorti laqgħet it-talba tal-Prosekuzzjoni li jiġu iffriżati tal-assi tal-imputati. Min-naħa tad-Difiża ma saritx talba għall-ħelsien mill-arrest u għalhekk Zayed u Edarnawi se jibqgħu jinżammu arrestati.
21:50 – Hesham Zayed qiegħed jirrappreżenta numru ta’ kumpaniji marbutin ma’ dan il-każ. Zayed wieġeb mhux ħati għan-nom tal-kumpaniji inkwistjoni.
21:47 – Eventwalment, inġabret iktar informazzjoni fuq dawn l-akkużati, u wara li inħareġ mandat t’arrest, ilbieraħ fis-sitta ta’ filgħodu, ġew arrestati.
Bħalissa fl-awla hawn l-akkużati, Hesham Zayed u Essam Mohammed Edarnawi. Iż-żewġ Libjani ċaħdu l-akkużi. Huma qalu li jgħixu f’Malta u jaħdmu għal rashom.
21:41 – Il-Prosekuzzjoni spjegat li f’Mejju tal-2020, id-Dipartiment tal-Investigazzjoni ta’ Reati Finanzjarji rċieva informazzjoni li l-akkużati kienu qed jgħaddu mill-Ajruport Internazzjonali ta’ Malta b’diversi mijiet t’eluf ta’ ewro.
Intqal kif dawn id-dikjarazzjonijiet kienu ilhom isiru mill-2012. Skont l-investigazzjonijiet tal-pulizija kienu wkoll qed jiġu impurtati karozzi lussużi mill-Ingilterra u tlieta minnhom kienu misruqa.
21:27 – Tidħol il-Maġistrat u minnufih mistennija tibda l-ewwel preżentata. Sa issa għadu mhux magħruf b’ċertezza kemm il-persuna se titressaq u tiġi mixlija b’akkużi kriminali iżda qed jingħad li aktarx se jkunu mas-seba’ persuni li jidħlu fl-iżbarra.
21:18 – Fl-awla daħlu żewġ akkużati u hawn ukoll it-tim tal-Prosekuzzjoni u d-Difiża. L-istennija issa għall-Maġistrat Natasha Galea Sciberras biex tibda l-ewwel preżentata.
20:22 – L-aħħar żviluppi mill-awla numru 2, li fiha se jitressqu l-akkużati, jgħidu li dawn se jidħlu fl-iżbarra għall-ħabta tad-9pm.
AKTAR QABEL: Diversi persuni Maltin u Libjani mistennija jitressqu l-Qorti illejla, quddiem il-Maġistrat Dr Natasha Galea Sciberras.
Huma se jiġu mixlija b’ħasil ta’ flus, b’assoċjazzjoni, reati ta’ evażjoni ta’ taxxa, attività finanzjarja mingħajr liċenzja mill-awtorità kompetenti, fost reati oħra.
ONE News se jkun qed jaġġornakom bl-aħħar żviluppi.
L-akkużati ġew arrestati wara li f’operazzjoni li wettqu il-Pulizija mill-Iskwadra ta’ Kontra l-Ħasil ta’ Flus, ġew elevati żewġ vetturi lussużi, madwar €100,000 fi flus kontanti, ammont konsiderevoli ta’ ġojjellerija u ħwejjeġ tad-ditta, pjanċi ta’ vetturi b’reġistrazzjoni barranija, apparat elettroniku li jinkludi fost oħrajn mobiles, pendrives, kompjuters, tablets u servers u ammont kbir ta’ dokumenti li qed jiġu analizzati.
ONE News hu infurmat li l-ammont involut mal-allegat attività kriminali huwa ta’ madwar €14-il miljun.
L-investigazzjonijiet b’rabta ma’ dan il-każ saru b’koordinazzjoni ma’ diversi entitajiet barranin fosthom l-Istati Uniti, ir-Renju Unit, l-Italja u l-Europol.
