Ġie mniedi proċess ta’ konsultazzjoni pubblika dwar abbozz ta’ management plan għall-Belt Valletta bħala Sit ta’ Wirt Dinji tal-UNESCO. Dan hekk kif ġie mniedi d-dokument imfassal minn tim ta’ esperti, li ħadmu flimkien tul ix-xhur li għaddew, biex abbozzaw l-ewwel management plan li qatt kellha l-kapitali f’pajjiżna.
Il-management plan għall-Belt, li hu rekwiżit mill-UNESCO għal kull sit li jagħmel parti mil-lista tal-Wirt Dinji, jikkonċerna l-evawlazzjoni u studju tal-istat li tinsab fih il-kapitali Maltija fir-rigward ta’ dak li jagħmilha wirt kulturali rikonoxxut madwar id-dinja.
L-għan ta’ dan id-dokument hu li jippromwovi u jissalvagwardja l-valur universali ta’ din il-belt, li ġibdet l-attenzjoni u l-popolarità ta’ miljuni ta’ persuni.
Aleks Farrugia, li hu s-site manager tal-ValletTa World Heritage, spjega li dan id-dokument hu mqassam fuq seba’ kapitli, bl-aħħar wieħed ikun il-qafas ta’ pjan ta’ azzjoni għas-snin li ġejjin.
“Fid-dawl ta’ dak l-istudju, il-pjan ’il quddiem dwar kif il-Belt tista’ tibqa’ tkun ippriservata u kkonservata għall-ġejjieni fid-dawl ta’ dak li jagħmilha world heritage site.”
Aleks Farrugia – Site Manager Valletta World Heritage
Il-pjan jittratta dawk li jissejħu l-elementi taħt id-definizzjoni ta’ outstanding universal values, li jagħżlu lill-Belt Valletta bħala wirt uniku tal-umanità.
Hu żied jgħid li dawn l-elementi jinkludu l-awtentiċità u l-integrità tal-Belt u l-komunità Beltija bil-wirt tanġibbli u intanġibbli tagħha.
F’aġġornament lill-midja, il-Ministru għall-Wirt Nazzjonali, l-Arti u l-Gvern Lokali, Owen Bonnici, saħaq li l-għan ta’ dan il-pjan hu li, filwaqt li tkun assigurata l-konservazzjoni u l-preservazzjoni tal-lokalità storika, il-Belt tibqa’ ċentru ħaj u vibranti f’pajjiżna, xi ħaġa li baqgħet karatteristika tagħha sa minn meta twaqqfet mill-Ordni tal-Kavallieri aktar minn erba’ mija u ħamsin sena ilu.
“Management plan biex naraw il-feedback tan-nies dwaru biex niġbru dan il-feedback u l-kummenti tan-nies inġenerali u l-għaqdiet. Dawn il-kummenti jinġabru u jintbagħtu lill-UNESCO biex hemmhekk inkomplu nsaħħu l-ħidma tagħna b’risq il-Belt kapitali ta’ pajjiżna.”
Owen Bonnici – Ministru
Mill-Erbgħa 20 ta’ Diċembru dawk kollha interessati jistgħu jaċċessaw dan id-dokument ta’ proposta għall-Belt Valletta u jibagħtu l-kummenti jew is-suġġerimenti tagħhom sat-22 ta’ Frar tas-sena li ġejja.
