L-inċident waqt il-partita tal-EURO 2020 bejn id-Danimarka u l-Finlandja ħasad lil kulħadd fid-dinja tal-futbol u anki lil hinn, meta l-attakkant Daniż Christan Eriksen ikkollassa fil-grawnd.
Minuti qabel intemmet l-ewwel taqsima, Eriksen deher jaqa’ mal-art b’dak li huwa spekulat li kien attakk tal-qalb.
L-għada tal-inċident, il-konsulent mediku fuq il-mediċina sportiva Kirill Micallef Stafrace, qalilna li l-kawża eżatt, diffiċli tkun magħrufa.
Qal, “Milli jidher li smajna kellu attakk tal-qalb. Għala, ma nafux u abbli qatt ma nkunu nafu.”
Għalkemm jittieħdu l-prekawzjonijiet neċessarji speċjalment f’kompetizzjonijiet internazzjonali, inċidenti bħal dawn xorta jistgħu jiġru.
Biex jitnaqqsu l-konsegwenzi ta’ inċidenti simili hemm stabbiliti diversi protokolli, fosthom l-ittestjar u t-taħriġ.
Spjega, “Aħna dejjem ngħidu ttestjar, taħriġ. Taħriġ ifisser li n-nies li qegħdin fuq il-bank ta’ kwalunkwe sport għandhom ikunu mħarrġa imqar fil-kors bażiku tal-ewwel għajnuna għax almenu CPR u dawk il-ftit minuti eżatt wara li jiġri inċident bħal dak, ikunu qed iżommu ħaj lill-persuna.”
Filfatt hekk ġara waqt il-partita tas-Sibt, fejn it-tim mediku aġixxa b’mod effiċjenti ħafna fl-ewwel ftit minuti tant sensittivi wara l-inċident.
L-għan huwa dejjem li l-persuna tibqa’ tirrispondi sakemm tittieħed għal aktar assistenza medika.
Qal, “L-għan tagħna meta nkunu fuq każ bħal dan huwa li nżommu persuna ħajja sakemm tiġi l-ambulanza biex tieħdu għall-kura kif suppost.”
L-ispeċjalista fil-mediċini tal-isport u l-eżerċizzju fiżiku temm jgħid li f’pajjiżna għandna ammont ta’ faċilitajiet mediċi imma huwa importanti li wieħed ikun imħarreġ kif jagħmel użu minnhom.
Qal, “Illum il-ġurnata hemm ħafna defibrillators mal-grawnds tal-isport u anki fost il-Kunsilli Lokali u fil-pjazzez tagħna, dawn huma faċli li tużhom. Imma naqra taħriġ dejjem ħa jgħin.”
Intant, uffiċjali tal-futbol Daniżi kkonfermaw li l-plejer Christian Eriksen jinsab stabbli l-isptar u anki kkomunika mal-kollegi sħabu fit-tim.
