Konsulent Internazzjonali tal-Politika dwar id-Droga faħħar il-liġi Maltija dwar l-użu responsabbli tal-kannabis.
Steve Rolles, li riċentament kien f’Malta fejn tkellem f’konferenza dwar l-użu tal-kannabis għal skop rikreattiv, tkellem dwar il-fatt li f’Malta bdew l-assoċjazzjonijiet li fihom tkun membru u tikseb b’mod legali s-sustanza tal-kannabis.
Fi kliem Rolles, il-fatt li l-liġi Maltija tesiġi li dawn l-assoċjazzjonijiet iridu jaħdmu bi skop li ma jagħmlux qligħ u mingħajr ma jirreklamaw lilhom infushom, dan huwa suċċess garantit minnu innifsu tal-liġi Maltija li għaddiet mill-Parlament f’nofs Diċembru li għadda.
Rolles, li ġie kkwotat mill-Maltatoday, qal li l-liġi Maltija tispikka fuq ta’ pajjiżi oħrajn għaliex ma hemmx inċentiv ta’ qligħ għall-assoċjazzjonijiet li jaqsmu l-prodott tal-kannabis fost il-membri.
Il-liġi Maltija tispeċifika li ma tistax tkun membru f’aktar minn assoċjazzjoni waħda u inti ma tiġix arrestat jekk ikollok sa seba’ grammi tal-kannabis għall-użu personali.
Il-liġi tgħid ukoll li jekk ikollok aktar minn seba’ grammi iżda inqas minn tmienja u għoxrin gramma ta’ kannabis, tittella’ quddiem Tribunal presedut minn Kummissarju għall-Ġustizzja u mhux Qorti Kriminali.
Dan apparti li l-liġi Maltija tagħti ċ-ċans li tkabbar sa erba’ pjanti f’darek.
Rolles saħaq li dan kollu jagħmel il-liġi Maltija b’saħħitha fuq dawk ta’ pajjiżi oħra hekk kif isemmi l-Olanda u jgħid li f’dan il-pajjiż hemm ħwienet li jipprovdu l-prodott tal-kannabis iżda li dan l-istess prodott jinkiseb mill-ħwienet minn organizazzjonijiet kriminali.
Rolles żied jgħid li l-liġi Maltija hija storika minnha innifisha għaliex tagħmilha l-ewwel waħda fl-Unjoni Ewropea li mhux biss tħares lejn id-dikriminalizazzjoni iżda anki lejn l-ikkunsmar tal-prodott tal-kannabis mingħajr profitt.
Fil-kuntest li diġà bdew ikun hawn assoċjazzjonijiet li wieħed jista’ jissieħeb fihom biex jikseb b’mod legali l-prodott tal-kannabis, Steve Rolles saħaq li skont il-liġi Maltija dawn l-assoċjazzjonijiet iridu jagħtu informazzjoni ċara dwar il-prodott u r-riskji marbuta mas-saħħa.
Semma wkoll kif dawk il-persuni li jbigħu l-kannabis b’mod legali għandhom ikunu mħarrġa u jagħtu informazzjoni korretta.
Rolles spjega kif il-liġi Maltija tgħallmet minn dak li ġara fid-dinja fuq il-bejgħ tal-alkoħol u t-tabakk fejn kumpaniji kbar spiċċaw jinkoraġixxu l-użu tal-alkoħol u t-tabakk għaliex kellhom skop ta’ qligħ.
Hawn saħaq li l-liġi Maltija dwar l-użu responsabbli tal-kannabis hija differenti għaliex il-mezz legali ma jħares lejn l-ebda skop ta’ qligħ.
Intant fil-bidu ta’ din is-sena, twaqqfet l-Awtorità dwar l-użu responsabbli tal-kannabis immexxija minn Mariella Dimech, psikoterapista li għal 21 sena ħadmet mal-Caritas.
Il-President ta’ Malta Dr George Vella, li kien iffirma l-liġi dwar l-użu responsabbli tal-kannabis wara li għaddiet mill-ogħla istituzzjoni tal-pajjiż, kien irrimarka għall-esperjenza tal-membri tal-bord tal-Awtorità.
