Dawn ir-ritratti jixhdu l-istat li jinsabu fih soqfa fid-Dar tal-Anzjani ta’ Bormla.
Dan l-istat mhux riżultat ta’ nuqqas ta’ manutenzjoni fl-aħħar snin, iżda minħabba li, kif qed jirriżulta, meta ttellgħet din il-binja 22 sena ilu minn gvern Nazzjonalista, intuża konkos ta’ kwalità inferjuri.
Minn informazzjoni li kiseb One News, fil-proċess biex jiġu installati l-fire alarms f’din id-Dar, waqt li l-ħaddiema ġew biex jikklippjaw il-wajers mas-soqfa, waqa’ ammont kbir ta’ konkos tant li saħansitra nkixfet ix-xibka.
Aktar kmieni din il-ġimgħa, waqt il-programm Pjazza fuq ONE, il-Ministru għall-Anzjanità Attiva, Jo Etienne Abela, qal li minn rapport li sar, jirriżulta li l-konkrit f’bini bħal dan suppost ikun ta’ kwalità C30, imma hemm postijiet fejn hu C13 u saħansitra C11, li huwa ferm inferjuri minn dak li suppost intuża.
Huwa qal li, filwaqt li jifhem li anzjani li jkun draw joqogħdu f’post partikolari, jorbtu qalbhom miegħu u ma jkunux jixtiequ jiċċaqilqu minn hemm, id-deċiżjoni li dawn jittieħdu fi Djar alternattivi kellha tittieħed għax is-sitwazzjoni qed issir dejjem aktar perikoluża.
Meta rrefera għall-kritika tal-Oppożizzjoni Nazzjonalista, huwa staqsa: “X’ħin triduna naġixxu? Meta jaqa’ s-saqaf u jordom in-nies?”
Nhar it-Tlieta fil-Parlament il-Ministru Abela għamilha ċara li l-gvern Laburista ma jista’ qatt jaċċetta li anzjani fi Djar f’ċerti partijiet tal-pajjiż jingħataw servizz ta’ kwalità ta’ 5 stilel filwaqt li dawk fi fil-Kottonera jgħixu f’kundizzjoni mhux dinjituża u li dejjem qed issir aktar perikoluża.
Huwa qal li fl-aħħar snin saret manutenzjoni biex, minkejja l-problemi strutturali, l-anzjani jkollhom kwalità ta’ ħajja aħjar. Dawn kienu jinkludu sistema ġdida ta’ arja kundizjonata, lift, u bdil ta’ twieqi u gallariji li kienu fi stat perikoluż. Madanakollu, issa wasal iż-żmien li jkun hemm bidla mill-qiegħ fl-interess tal-istess anzjani.
Intant, meta kienet qed titkellem fuq Net TV, il-Kelliema tal-Partit Nazzjonalista għall-Anzjanità Attiva, Paula Mifsud Bonnici, ukoll saħqet li l-PN dejjem emmen li, indipendentament minn fejn inti, kulħadd għandu jkollu dar residenzjali xierqa, anke fil-Kottonera.
Madanakollu, filwaqt li bil-kliem wieħed jista’ jgħid li jrid, bejn il-kliem u l-fatti hemm il-baħar jikkumbatti. Meta wieħed iqis il-fatti, se jkollu jkun il-gvern Laburista li jieħu l-azzjoni meħtieġa biex ineħħi lill-anzjani mill-periklu li nħoloq minħabba li, taħt gvern tal-Partit Nazzjonalista, intuża konkos ta’ kwalità inferjuri – eku ta’ dak li kien seħħ ukoll meta nbena l-Isptar Mater Dei.
Fil-frattemp, bil-ħsieb li jikseb xi vantaġġ politiku partiġġjan, il-Partit Nazzjonalista – li, wara kollox, huwa responsabbli għal din is-sitwazzjoni ta’ problemi strutturali serji fil-binja – qed jagħżel li jisfrutta din is-sitwazzjoni biex jattakka lill-gvern Laburista għax se jieħu azzjoni biex jindirizza n-nuqqasijiet serji li saru 22 sena ilu, taġt gvern Nazzjonalista.
