George Farrugia, il-persuna li ngħata l-proklama fl-iskandlu taż-żejt saħaq li għal diversi drabi ltaqa’ ma’ Austin Gatt biex jiddiskuti affarijiet marbuta mal-kuntratti taż-żejt. Ikkonferma wkoll li ltaqa mad-deputat nazzjonalista, Claudio Grech, fi żmien li kien jaħdem mal-istess Gatt. Taħt xhieda ġuramentata, George Farrugia qal dan wara li fil-Qorti kompla jinstema’ l-każ ta’ libell ta’ Austin Gatt kontra l-editur tal-Maltatoday Saviour Balzan. Kemm l-eks Ministru Austin Gatt u d-deputat Nazzjonalista Claudio Grech dejjem ċaħdu li ltaqgħu ma’ George Farrugia.
Madankollu quddiem il-Maġistrat Francesco Depasquale, George Farrugia kien ċar fi kliemu. “Iltqajt mal-Ministru Austin Gatt diversi drabi, darba minnhom kellu miegħu xi investituri minn Dubai li riedu jaħżnu ż-żejt f’pajjiżna. B’kollox riedu jinvestu xi tlett mitt miljun ewro.” George Farrugia li ngħata l-maħfra mill-Prim Ministru ta’ dak iż-żmien Lawrence Gonzi, bil-kundizzjoni li jgħid il-verita’, spjega li wara li n-negozjanti minn Dubai ressqu l-proposta tagħhom, mar mal-Ministru għand Gonzi fejn spjegawlu l-proġett. Fil-Qorti, Farrugia kkonferma kemm kien midħla tal-Gvern Nazzjonalista billi qal, “Iltqajt ma’ Austin Gatt anki fuq mejda tal-ikel fi stabbiliment il-Waterfront u darba minnhom mort l-uffiċju tiegħu fejn iltqajt ma’ Claudio Grech.”
Dwar Claudio Grech, George Farrugia xehed li anki ltaqa’ miegħu u ma’ Austin Gatt dwar proġett fis-settur tal-avjazzjoni. Għall-mistoqsijiet tal-avukat ta’ Saviour Balzan dwar jekk offriex donazzjonijiet għall-kampanja elettorali ta’ Austin Gatt, Farrugia ammetta li jaf kien hemm ċirkostanzi fejn kumpaniji li hu kien direttur tagħhom taw xi donazzjonijiet. Spjega li darba minnhom, ħuħ kien involut f’attivita’ f’lukanda ewlenija fil-Furjana u wara tah envelope b’elfejn ewro. George Farrugia spjega li hu kien qabad u għaddiehom lil dawk li kienu midħla fil-kampanja ta’ Austin Gatt.
Sadanittant il-gazzetta Maltatoday kienet żvelat li s-sala tal-aħwa Farrugia, Valentine Hall fil-Ħamrun kienet tingħata lil Austin Gatt biex taqdih waqt il-kampanja elettorali tal-elfejn u tmienja. Il-kumpanija powerplant ta’ George Farrugia kienet topera mill-istess binja tas-sala fejn Austin Gatt kien jistieden lin-nies tad-distrett. Intant il-każ tal-libell minn Austin Gatt mistenni jkompli jinstema’ f’April li ġej.
