Bernard Grech ikkonferma għal darba oħra li għadu bla costings għal wegħdiet tiegħu.
Dan f’attività politika f’Għajnsielem fejn talab lill-ġurnalisti ma jibqgħux jistaqsu għal costings.
B’ċertu arja Bernard Grech spiċċa jgħid li l-costings joħroġhom meta jrid hu.
Grech qal, “Il-ħin kollu sejrin għidulna hekk, u għidulna l-costings, u spjegawlna dik u spjegawlna din. Il-costings ġejjin, għamilnihom serħu raskom, u se nkunu qed nippubblikawhom qabel l-elezzjoni. Ħudu paċenzja issa stennewhom u nagħtuhom lilkom. Għaliex il-Partit Nazzjonalista, mhux intom tmexxuh, aħna mmexxuh, għad għandna l-viżjoni għal pajjiżna.”
Iżda filwaqt li Bernard Grech ikkonferma li għadu bla costings, il-kandidata Josephine Xuereb qalet li l-Partit Nazzjonalista ilu jikkalkulahom il-wegħdiet.
Kalkoli li madankollu s’issa għadhom ma rawx id-dawl tax-xemx.
Xuereb qalet, “Il-Partit Nazzjonlista għamel wegħdiet ilu jaħseb fuqhom, ilu jikkalkulahom.”
B’mod irresponsabbli l-istess kandidata spiċċat titkellem bħal donnu l-Gvern f’nofs pandemija bla preċedent għalaq l-istabilimenti u r-ristoranti b’kapriċċ.
Hija pruvat iddawwar id-deċiżjonijiet li ttieħdu fuq il-parir tal-awtoritajiet tas-saħħa f’ballun politiku.
Xuereb qalet, “Dawk li għalqulkom il-businesses, dawk li għalqulkom ir-ristoranti, dawk li għalqulkom il-bars bla preċedent għaliex hekk iddeċieda l-Ministru.”
Hija spiċċat tgħid li l-Maltin li fl-aħħar snin għażlu lil Partit Laburista huma reqdin.
Hi kompliet tgħid, “Nies, ejjew inqumu mir-raqda li rqadna u ejja nissapportjaw lill-Partit Nazzjonalista.”
Id-Deputat Nazzjonalista Kevin Cutajar stqarr li l-Partit Nazzjonalista ser jirbaħ l-elezzjoni.
Cutajar qal, “Ninsab nifforma parti minn tim minn Partit Nazzjonalista li se jtellaq biex jirbaħ. Partit illi iva jien nemmen li se jirbaħ din l-elezzjoni, jista’ jirbaħ din l-elezzjoni l-aħwa. Jista’ għax kif għedt dan il-partit ma jtellaqx biex jitlef.”
Fl-istess attività kompla miegħu d-deputat Nazzjonalista Chris Said.
Said qal, “Ser nibqgħu naħdmu sa bħal-lum ħmistax, is-26 ta’ Marzu fl-10 ta’ filgħaxija x’ħin tagħlaq il-votazzjoni biex nassiguraw li nagħtukom Bernard Grech Prim Ministru ta’ Malta u Partit Nazzjonalista li jkun qed jiggverna għal ħames snin li ġejjin.”
Il-Partit Nazzjonalista kompla jirrikorri għal politika ta’ biża’ bid-deputat Joe Ellis ibeżża’ li taħt Gvern Laburista l-Għawdxin ser ibatu.
Ellis irrimarka, “Dan Gvern, dan Gvern illi ma jafx fejn hu sejjer u jekk ħa jerġa’ jitla’ dan il-Gvern, Għawdex se jkompli jbati.”
Fid-diskors li għamel f’Għajnsielem Bernard Grech spiċċa jikkritika lill-Prim Ministru Robert Abela għaliex qed jipproponi b’mod konkret għall-futur.
Grech qal, “Kollox fil-futur. Dawn dejjem fil-futur. Fil-futur se nagħtu l-IVF b’xejn.”
Grech li ġmielu jgħid li jħobb jiltaqa’ mal-bdiewa għaliex ituh il-ħxejjex b’xejn issa spiċċa jitkellem fuq żewġ torti li ddobba.
Ma setax jonqos li jitfa’ botta oħra biex jara x’ser jakkwista.
Hu qal, “Ġiet mara fuqna u tatna żewġ pakketti u t-tnejn kienu torta bil-ġbejniet u bil-ful. Din il-mara reġa’ qiegħda hawn illejla u qed inxomm li għandha xi ħaġa oħra.”
