Hekk kif il-kampanja elettorali daħlet fis-sebà jum tagħha, il-ġurnata tal-Ħadd se tkun ġurnata impennjattiva oħra għall-Mexxej Laburista Joseph Muscat u l-Partit Laburista. Fil-fatt illum se jkun qed isir mass meeting fi Vjal il-Labour, Ħaż-Żabbar kif ukoll maratona ta’ ġbir ta’ fondi tal-Partit Laburista fil-kumpless ONE, il-Marsa.
Dwar dan tkellimna ma’ Gino Cauchi, Kap Eżekuttiv tal-Partit Laburista li spjegalna li din se tkun maratona bħala parti mill-kampanja elettorali u li se tkun immirata biex il-ġabra kollha jmorru biex il-Partit jiffinanzja l-ispejjeż li ġġib magħha kampanja elettorali. “Kampanja elettorali ġġib magħha spejjeż kbar, hemm dawk l-affarijiet li jaraw in-nies bħall-armar u messaġġi li jintbagħtu fid-djar. Iżda dawn m’humiex l-unika spejjeż relatati mal-kampanja elettorali, hemm ukoll spejjeż relatati mal-proċess elettorali li jkun irid jagħmel il-partit,” spjega Gino Cauchi.
Il-Kap Eżekuttiv tal-Partit Laburista qal li wieħed jista’ jinnota l-istil tal-kampanja li l-Partit Laburista qed jagħmel biex jilħaq mal-istandards stabbiliti mill-istess Partit fil-kampanja tal-2013. “Minkejja li l-elezzjoni ġiet fuqna malajr, qed nagħmlu dak kollu possibbli biex il-kampanja tkun tajba daqs kemm kienet dik tal-2013.”
Xejn ma jiġi b’xejn, u għalhekk il-Partit Laburista qed jitlob l-appoġġ tan-nies biex jgħin f’dan il-proċess.
Il-maratona tibda fil-11.00 u tintemm fil-23.00.
Il-maratona se tieqaf waqt li l-Prim Ministru jagħmel id-diskors tiegħu f’Ħaż-Żabbar iżda n-nies jistgħu jibqgħu jagħtu d-donazzjonijiet. Matul il-maratona se jkun hemm l-intervent tal-Prim Ministru Joseph Muscat u d-deputati tiegħu flimkien mal-amministrazzjoni u l-kandidati kollha tal-Partit Laburista. Id-donazzjonijiet jistgħu isiru permezz tat-telefonati u wieħed jista’ jmur ukoll bid-donazzjoni tiegħu fiċ-ċentri lokali. Il-Partit Laburista jirringrazzja lil kulħadd minn quddiem.
Iżda parallel ma’ din il-maratona, se jkun qed isir mass meeting f’Ħaż-Żabbar. Dwar dan tkellimna ma’ wieħed mill-persuni li qed jikkordina l-ispettaklu.
Clint Bajada qal li wara s-suċċess tat-tnedija tal-kampanja tal-FŻL, issa kollox jinsab lest għal pre-party ta’ qabel l-ewwel mass meeting ta’ Ħaż-Żabbar. Il-pre-party se jibda fil-17.00 bi spettaklu li ser jinkludi l-aqwa mużika kummerċjali u ideali sabiex jitqajjem il-briju u l-atmosfera ta’ ċelebrazzjoni fil-mass meeting.
Fil-pre-party se jieħdu sehem żewġ DJs popolari, Ryan Spiteri u Lio li flimkien ma’ Alfred Zammit, Joe Tanti u Clint Bajada ser ikunu qed janimaw l-ispettaklu.
F’dan il-mass meeting ser jidher ukoll għall-ewwel dabra l-video mużikali tad-diska l-ġdida ‘L-Aqwa Żmien ta’ Pajjiżna’.
Wara l-mass meeting, il-partit Laburista ser ikun qed jorganizza after-hours ma’ JJoy.
Clint Bajada kellu appell għal dawk li se jkunu qed jinġabru f’Ħaż-Żabbar, “Wara l-after-hours, inħeġġu lill-pubbliku sabiex jkun preżenti fil-kumpless ONE il-Marsa għall-qofol tal-maratona ġbir ta fondi flimkien mal-Prim Ministru u Mexxej tal-Partit Laburista Joseph Muscat.
Fl-għeluq tal-maratona ser jiehdu sehem fost oħrajn il-kantanti popolari Amber, Corazon, Renato, Mary Spiteri u Versatile Band.
