Kollox jinsab lest sabiex illum fit-Tottenham Hotspur Stadium, f’Londra tintlagħab l-ewwel edizzjoni tal-Visit Malta Cup li se tlaqqa’ lil Tottenham u lit-tim Ġermaniż ta’ Bayern Munich.
Kien propju f’Marzu li għadda li l-Awtorità Maltija għat-Turiżmu ħabbret li kienet waslet fi ftehim mal-klabb Ingliż ta’ Tottenham sabiex għall-ewwel darba tiġi organizzat il-Visit Malta Cup. L-għan ewlieni ta’ din it-tazza huwa li jkompli jiġi ġenerat aktar turiżmu sportiv kemm mir-Renju Unit kif ukoll minn pajjiżi oħra.
Preżenti f’Londra, lejliet il-partita bejn Tottenham u Bayern Munich, t-tmexxija tal-Awtoritá Maltija għat-Turiżmu bil-Kap Eżekkutiv tal-Awtorità Carlo Micallef jsostni li l-għan aħħari huwa li tintuża l-logħba tal-futbol sabiex jiġu attirati aktar turisti ta’ kwalità lejn Malta speċjlament fix-xhur tax-xitwa. Micallef sostna li l-emozzjonijiet li toffri l-logħba tal-futbol jwasslu għal udjenzi u viżżibiltà qawwija tal-prodott Malti f’kull età.
Il-partita bejn Tottenham Hotspur u Bayern Munich hija l-aħħar partita ta’ ħbiberija għaż-żewġ timijiet qabel il-bidu tal-kampjonati domestiċi.
Fil-fatt l-ewwel impenn uffiċjali ta’ Tottenham fil-kampjonat premier Ingliż ikun it-Tnejn 19 t’Awwissu meta fil-21.00 jilgħabu barra minn darhom għand Leicester City filwaqt li Bayern Munich jiftħu uffiċjalment l-istaġun f’partita mit-tazza domestika DFP Polak kontra t-tim mill-Bundesliga 2 SSV Ulm 1846.
Il-partita tas-sibt bejn Tottenham u Bayern Munich se tfisser ukoll ir-ritorn għall-ewwel darba fl-Stadium ta’ Tottenham tal-captain Ingliż Harry Kane li kien ingħaqad ma’ Bayern mingħand l-istess Tottenham bħal dan iż-żmien sena. Ir-relazzjoni bejn iż-żewġ klabbs hija meqjusa bħala waħda tajba hekk kif Kane mhuwiex l-uniku plejer li ġie trasferit bejn iż-żewġ klabbs.
Indubajment kemm il-kowċ Grieg ta’ Tottenham Ange Postecoglou u l-kowċ Belġjan ta’ Bayern Munich Vincent Kompany se jużaw il-partita ta’ bejniethom sabiex jirfinaw lit-tim qabel il-bidu ta’ staġun twil u impenjattiv.
Visit Malta Cup is-Sibt fil-17.30 ta’ wara nofsinhar bejn Tottenham u Bayern Munich.
