Is-settijiet tal-Malta Film Studios fil-Kalkara jinsabu lesti biex il-Ħamis filgħodu jservu ta’ sfond għall-ġbid tal-ewwel xeni ta’ film ġdid, bl-isem ta’ “Napoleon”, li se jinħadem f’pajjiżna.
L-atturi prinċipali huma Joaquin Pheonix, magħruf għal bosta rwoli f’films kbar fosthom “Gladiator” u “Joker”, u Vanessa Kirby, magħrufa l-aktar għall-irwol tagħha fis-serje popolari “The Crown”.
Joaquin Pheonix se jinterpreta l-parti ta’ Napuljun, filwaqt li Vanessa Kirby se tkun martu, Josephine.
Id-Direttur ta’ dan il-film huwa Sir Ridley Scott, li wasal Malta l-Erbgħa filgħodu.
Il-Kummissarju tal-Films, Johann Grech, spjega li din hija t-tielet darba li Scott jinsab f’pajjiżna, wara l-ġbid ta’ “White Squall” fl-elf disa’ mija u sitta u disgħin, u “Gladiator” fis-sena elfejn.
Qal, “Ridley Scott huwa wieħed mill-akbar diretturi fid-dinja u għalina jagħmilna kburin. Kull darba li tkellimt miegħu dwar dan il-film, Napoleon, li qed jinħadem f’pajjiżna u qed jaħdmu ħafna nies u nbnew settijiet kbar ġewwa Fort Ricasoli, Sir Ridley Scott qalli li l-prodott ta’ Malta huwa b’saħħtu ħafna u wieħed li jikkompeti mad-dinja kollha.”
Dan jikkonfermah Scott innifsu li, kburi jżomm f’idu t-trofew li ġie ppreżentat waqt il-Malta Film Awards aktar kmieni din is-sena bħala l-Ambaxxatur għall-Films f’Malta, faħħar ix-xeni uniċi u spettakolari li toffri Malta.
Qal, “In 1995, I was making a film at the studio called White Squall and while at lunch time, I walked into the Fort next door and I was impressed to find it offered so much. I guess the rest is history. I have returned to Malta this time to film a large sequence for my next film called Kickback. The fourth will be Napoleon.”
Il-ġbid ta’ dan il-film se jsir f’Ħ’Attard, l-Isla, il-Mellieħa, is-Siġġiewi, l-Imdina, il-Belt, u fil-Malta Film Studios fil-Kalkara.
“Napoleon” hija l-ħames produzzjoni li qed tinġibed f’Malta din is-sena u l-prospetti għal li ġej huma tajbin.
Qal, “Il-prospetti għaż-żmien li ġej huma sbieħ ħafna u ninsab konvint li Malta se tkompli tattira aktar produzzjonijiet lejn pajjiżna u aktar nies jaħdmu f’din l-industrija. Irridu aktar nies u aktar businesses lokali jidħlu f’din l-industrija biex inkomplu nsaħħu l-prodott li Malta toffri lill-film makers barranin.”
