Taljan ta’ 27 sena instab ħati li agredixxa u weġġa’ gravi lil Uffiċjal tal-Pulizija li fil-ħin li seħħ il-każ kien ‘off-duty’.
Il-każ seħħ fis-sigħat bikrin tas-6 ta’ Lulju ta’ sentejn ilu f’San Ġiljan, meta t-Taljan, Alessio Minelli kien mat-tfajla tiegħu viċin il-karozza tagħhom li kienet ipparkjata. Jidher li dak il-ħin il-koppja ma setgħux isibu ċ-ċwievet u nqala’ argument bejniethom.
Fix-xhieda tiegħu il-Pulizija rrakkonta kif dakinhar kien ma’ sieħbu, li kien se jwasslu d-dar bil-karozza tiegħu. Qal li sieħbu daħal fil-karozza, iżda hu baqa’ barra, peress li kien qed jiekol wrap u ma riedx iħammiġlu. Sacco kompla jgħid li t-Taljan kien mar fuqu u bl-Ingliż staqsih għalfejn kien qed iħares lejn it-tfajla tiegħu. Sacco qal li ċaħad, iżda Minelli tajjarlu r-wrap minn idu u qabad jagħtih.
Min-naħa tiegħu Minelli qal li kien staqsa lil Sacco għalfejn kien qiegħed hemm bil-bieba miftuħa, u li Sacco, li qal kien xurban, mar fuqhom u mbotta lit-tfajla mal-art. Qal li kien dak il-ħin li hu u Sacco ġew fl-idejn u sakemm sabuhom il-Pulizija.
Il-Qorti semgħet ix-xhieda ta’ tobba u dentist, li qalu li Sacco kien sofra ġrieħi gravi f’wiċċu u tilef żewġ sinniet, waqt li Minelli kien sofra ġrieħi ħfief ta’ tbenġil. Il-Qorti semgħet ukoll ix-xhieda ta’ sieħeb Sacco u tat-tfajla ta’ Minelli, li kienu l-uniċi xhieda oħra li raw x’ġara.
Il-Qorti qalet li miż-żewġ verżjonijiet tal-fatti, dik ta’ Sacco kienet iktar kredibbli u għalhekk Minelli kien ikkundannat sitt xhur ħabs sospiżi għal tliet snin u ntrabat b’garanzija ta’ €1,500 biex ma jdejjaqx lil Sacco.
