Meta persuna tikkolassa u tieqaf tieħu n-nifs kull minuta li tgħaddi tifsser pass eqreb lejn il-mewt. Għalhekk il-Malta Resuscitation Council flimkien ma’ numru ta’ entitajiet oħra ħadu sehem f’kampanja favur l-għarfien dwar is-CPR.
Dr Tanya Esposito, konsulent mediku fi ħdan id-Dipartiment tas-Saħħa spjegat kif permezz tas-CPR il-bniedem ikun jista jħaddem il-qalb b’mod manwali sabiex id-demm ikun jista’ jibqa jitla’ lejn il-moħħ.
“CPR huwa l-aktar ħaġa importanti. Jekk xi ħadd tieqaflu qalbu l-ewwel ħaġa li se jiġri huwa li d-demm mhux se jibqa għaddej fil-ġisem u jieqaf sejjer sal-moħħ. L-importanti tas-CPR huma iċ-chest compressions li l-qalb tibda tgħaġġilha inti u d-demm tibqa’ twasslu sal-moħħ u jibqa’ għaddej kontinwu.”
Il-possibità li persuna tikkolassa u tieqaf tieħu n-nifs barra mill-bini tal-isptar hija ta’ madwar 80%. Ma’ kull minuta li tgħaddi il-persentaġġ li persuna jsalva jonqsu b’10%, u wara ħames minuti l-moħħ jibda jiżviluppa ħsara permanenti minħabba nuqqas ta’ ossiġnu. Għalekk intervent immedjat huwa importanti ħafna.
Dr Esposti spjegat li l-possibiltà li persuna tgħix wara li tieqfilha qalbha hija baxxa ħafna.
“Iċ-ċans li xi ħadd wara li tieqaflu jerġa jiġi f’tiegħu huma xi 5%. Jekk ħadd ma jagħmillu CPR iċ-ċans huwa anqas minn hekk u anki bis-CPR jekk jagħmluha sew tista’ titla sa xi 10% jekk dejjem issir sew”
Dr Esposito kompliet tispjega li ħafna jiddejqu jmissu ħalqhom ma’ persuna li tkun ikkolassat fit-triq madankollu bħalissa qed jiġi mgħallem ukoll compression only CPR jiġifieri l-persuni ma jagħtux in-nifs magħruf bħala l-mouth to mouth.
“Iva jekk ma tridx tagħmel CPR, li tagħti n-nifs tista’ tagħmel compression only. Illum qed ngħallmuhom lin-nies illi l-ewwel ħaġa jiċċekjaw li huma siguri, li persuna mhux jieħu n-nifs u mhux jirrispondi iċemplu 112 imbagħad jibdew jagħmlu compression only cpr. Jiġifieri ma jagħtux in-nifs”
Dr Esposito temmet b’appell fejn saħqet li jekk tiltaqa’ ma każ hekk u ma tagħmel xejn hemm possibilità kbira li l-persuna tmut.
“Jekk ma tagħmel xejn il-persuna żgur se tmut. allinqas jekk tagħmel cpr il-compressions se tgħin ħafna”.
Intant, waqt din l-attività fil-Belt Valletta ipparteċipaw ukoll numru ta’ għaqdiet mhux governattivi li bdew jgħallmu CPR lil dawk li nzertaw deħlin il-Belt.
Fost l-entitajiet preżenti kien hemm numru ta’ edukaturi tas-saħħa u sigurtà fejn appellaw għal leġislazzjoni li tagħmel it-tagħlim tal-ewwel għajnuna parti mill-kurrikulu skolastiku tal-istudenti.
