Waqt li ħa sehem fil-programm ‘Paperscan’ fuq ONE il-Ħadd filgħodu, il-Ministru tal-Ġustizzja, Jonathan Attard, ikkummenta dwar rapporti fuq il-libertà kundizzjonata li ngħatat lil mill-Qorti Yorgen Fenech fl-aħħar jiem u l-kritika li qed issir mill-Partit Nazzjonalista u l-fergħa estremista tiegħu.
Waqt li fakkar li l-Avukat Ġenerali oġġezzjonat kemm-il darba kontra deċiżjoni simili, tenna li iżda, fl-aħħar l-aħħar, dak li waslet għalih il-Qorti għandu jkun rispettat, differenti minn dak li kien isir fi żmien amministrazzjonijiet Nazzjonalisti, li meta kien ifettlilhom kienu jattakkaw l-istituzzjoni ġudizzjarja jew iħalluhom b’liġijiet skaduti, bil-konsegwenzi li persuni ma setgħux jinstabu ħatja, anke jekk kienu jammettu fl-interrogatorji.
“Ikun hemm ċerti analiżi li, fil-fehma tiegħi, huma mhux biss neqsin mis-sustanza legali, imma anke mil-loġika. Li jiġu jgħidulek, eżempju, li s-sistema hi mkissra, jiena ngħidilhom is-sistema tkun imkissra meta jkollok sitwazzjoni fejn mhux fuq kwistjoni ta’ bail qed nitkellmu, ikollok ġurijiet fejn ikollok il-persuni akkużati jagħmlu statement fuq statement jammettu li wettqu r-reat, imma minħabba l-fatt li kellek Gvern Nazzjonalista dak iż-żmien li baqa’ jirreżisti li jdaħħal, fost l-oħrajn, id-dritt tal-avukat waqt l-interrogazzjoni, minkejja li dan kien bl-aktar mod evidenti li kellu jiddaħħal.”
Iżjed minn hekk, il-Ministru semma li, kontra dak li qed iwettaq il-Gvern Laburista llum il-ġurnata biex jirriforma u jtejjeb dejjem iżjed is-sistema fil-qrati, il-Gvern ta’ GonziPN kien baqa’ jkaxkar saqajh u beża’ jwettaq riformi meħtieġa, kif anke ssuġġerit minn ħdanu stess.
“L-Avukat Franco Debono li kien jappellalhom biex jiddaħħal dan id-dritt u jibqgħu jinjorawh milli jidħol dan id-dritt u, imbagħad, ikollok sitwazzjoni li, imbagħad, fil-ġuri, wara snin ta’ ħidma min-naħa tal-Pulizija u l-investigaturi tal-pajjiż, jiġu illiberati fuq teknikalità fuq il-fatt li kellek dak iż-żmien Gvern Nazzjonalista li ma daħħalx dawk id-drittijiet. Hemmhekk ikollok sistema mkissra.”
Il-Ministru tal-Ġustizzja fakkar kif fiż-żmien taħt it-tmexxija ta’ GonziPN, fejn saħansitra Ministru responsabbli mill-qasam spiċċa sfiduċjat mill-Parlament, għax il-Gvern baqa’ jitituba biex jifred il-qasam tal-ġustizzja minn dak tal-intern.
“Wara l-2013, l-ammont ta’ riformi li wettaqna fil-kamp tal-ġustizzja, huma bla preċedent. Pajjiżna għal snin twal taħt Gvern Nazzjonalista, kien fi kriżi fis-settur tal-ġustizzja, u dan tant kien fi kriżi, li jiena ngħid din biss, l-aħħar Ministru, biex ngħidu Ministru, għax, imbagħad, inħatar wieħed warajh, imma fil-verità l-aħħar Ministru tal-Ġustizzja spiċċa ġie sfiduċjat mill-ogħla istituzzjoni tal-pajjiż, mill-Parlament Malti, minħabba l-inkompetenza u t-tkaxxir tas-saqajn fir-riformi.”
