Din hija Helen Caruana, omm ta’ sittin sena li tliet snin ilu kellha tagħmel trapjant tal-fwied fl-Ingilterra.
Għal għaxar xhur sħaħ Helen kienet ’il bogħod minn darha f’Malta u b’ħerqa, kull lejl u nhar kienet tistenna li xi darba jinstabilha fwied li jaqbel magħha.
Ma’ dan l-istazzjon Helen irrakkuntat dak il-mument pożittiv meta rċeviet telefonata li bidlilha ħajjitha.
Hija stqarret: “Dak il-ħin kont għadni se nqum biex nipprepara għal shower u ninżlu isfel għand is-sorijiet biex nisimgħu quddiesa u fl-istess ħin ħsibt li sar il-ħin biex inqumu. Iżda kienu ċempluli huma fil-ħamsa ta’ filgħodu. Preparajna u ġiet it-taxi għalina għax hemmhekk b’xejn u morna. Ħassejt bejn ferħ u biża’ imbagħad għidt jekk ma nagħmilix, l-uliedi mhux se narahom u ninżel lejn Malta.”
Helen spjegat kif l-operazzjoni u ż-żmien ta’ rkupru kienu ta’ suċċess, iżda maż-żmien instabulha kumplikazzjonijiet oħra u kellha terġa’ titla’ r-Renju Unit għal operazzjoni maġġuri oħra.
Hija sostniet: “Imbagħad inżilna wara sena eżatt minn Londra imbagħad bqajna għaddejjin bit-testijiet u wara indunajt li kelli bżonn għandi nerġa’ bżonn nitla’ għat-tieni operazzjoni maġġuri, it-tnejn kienu maġġuri u wara għaxar xhur għamilt l-operazzjoni mill-istess qatgħa.”
Hawnhekk saħqet kif dan iż-żmien ikrah ta’ mard sabilha t-tieni familja tagħha u li sal-lum il-ġurnata għadha tagħti kuraġġ lill-pazjenti l-oħra.
Hija kompliet tgħid: “Vera sorijiet li ma hemmx xi tgerger minnhom, ġew għaliha t-tieni familja. Għadna sal-lum anke man-nies li ltqajna magħhom għadna ħbieb inċemplu lil xulxin u jċempluli.”
Ftit qabel ma f’Malta tittella’ edizzjoni oħra tal-Istrina, Helen kellha messaġġ wieħed għall-Maltin u l-Għawdxin biex kulħadd jgħin lill-Fondazzjoni tal-Malta Community Chest Fund li għenet tant lilha.
Helen qalet: “Nirringrazzjahom minn hawn u xejn ma ngħidilkom ħadd ma jobsor x’se jkun ħa jiġri fuqu imma kulħadd jista’ jasal għal dawn l-affarijiet u fejn nistgħu ngħinu ngħinu għax vera ma jkun jonqsok xejn min-naħa tagħhom u għandhom bżonn il-flus.”
