Wara bibien magħluqa, dik il-mara jew dak ir-raġel li jkunu għaddejjin minn żmien diffiċli, żmien li mhux neċċesarjament ikunu jistgħu jitkellmu dwarhu. Il-vjolenza domestika hija realtá li mhux dejjem nisimgħu dwarha, iżda realtá kiefra li bosta vittmi jkunu għaddejjin minnha, xi kultant quddiem għajnejn it-tfal, dak it-tifel jew tifla li jisma’ u jara xeni li l-ebda wild m’għandu jara.
Realtá li ma nsibux biss f’pajjiżna, iżda tista’ tgħid madwar id-dinja kollha. Dwar dan tkellimna ma’ Dr Roberta Lepre, li hija d-Direttur ta’ Victim Support Malta li spjegatilna kif skont statistika ppublikata minn Crime Malta, ir-rapporti ta’ każijiet ta’ vjolenza domestika f’pajjiżna żdiedu b’ 159 każ.
- Fl-2014 kien hemm 1046 rapport ta’ vjolenza domestika
- Fl-2015 dawn żdiedu għal 1205 rapport
Din l-istatistika turi kif in-nisa rrapportaw aktar każijiet ta’ vjolenza mill-irġiel u li fil-maġġoranza tagħhom, 46% kellhom bżonn assistenza psikoloġika. Dr Lepre spjegat li vittma ta’ vjolenza domestika għandu jitkellem ma’ xi ħadd ta’ fiduċja dwar is-sitwazzjoni tiegħu u tagħraf li dak li għaddej/ja minnu jammonta għal vjolenza domestika. “Min hemm wieħed jista’ jara x’servizzi jeżistu u jagħżel dawk li jgħoddu għalih – f’kelma waħda, persuna għandha tikseb l-informazzjoni kollha sabiex tagħmel l-aħjar għażla għaliha, skond iċ-ċirkostanzi speċifiċi tagħha.
Hija fissret kif Victim Support Malta tiltaqa’ ma’ ħafna tipi ta’ reati u li dawn ma jkunux biss ta’ vjolenza domestika u li l-maġġoranza tal-vittmi li jirrikorru għandha huma vittmi li jbagħtu minn vjolenza psikoloġika.
Iżda wieħed jistaqsi, jekk persuna oħra apparti l-vittma tkun taf li qed isir abbuż tista’ tirraporta anke f’każ li l-vittma tiddeċiedi li ma tirrapurtax?
Id-Direttur ta’ Victim Support Malta spjegat li persuna li tkun taf b’sitwazzjoni ta’ vjolenza domestika, tista’ tirraporta lill-Pulizija u l-Pulizija għandha l-obbligu li tinvestiga. “Ħafna drabi pero’ ikun hemm nuqqas ta’ provi konkreti u għalhekk għalkemm isir ir-rapport, il-każ ma’ jkunx jista’ jitressaq il-Qorti.
” Għandna wkoll noqgħodu attenti li meta jsir rapport, ma jkunx hemm riperkussjonijiet fuq il-vittmi, għaliex xi drabi rapport jista’ jqanqal rabja fl-offensur, u jekk il-vittmi ma jkunux qed jiġu protetti, dik il-persuna tista’ titpoġġa f’riskju.” Hija elenkat li għaldaqstant, persunia tagħmel rapport għandna wkoll, b’mod delikat, ngħidu lill-vittma li nafu minn x’hiex inhi għaddejja u li se ssib l-għajnuna.
Dr Lepre spjegat l-irwol ta’ Victim Support Malta fil-ħajja ta’ dawk l-aktar vulnerabbli quddiem sitwazzjoni li żgur m’għażlux din il-ħajja. Hija fissret kif l-għan ewlieni ta’ Victim Support Malta huwa li tgħin lill-vittmi ta’ reati billi tagħti informazzjoni, inkluz informazzjoni dwar id-drittijiet tal-vittmi u l-proċess kriminali biex b’hekk il-vittma tkun tista’ tagħmel għażla infurmata dwar jekk tirraportax il-każ tagħha jew le.
“Minbarra dan, noffru appoġġ emozzjonali permezz ta’ trainee counsellors li jgħinu lill-vittmi jegħlbu t-trawma emozzjonali li jkunu għaddejjin minnha. Noffru anke għajnuna aktar prattika, billi, per ezempju, nakkumpanjaw lill-vittmi l-qorti jew għall-medjazzjoni, ngħinuhom jaċċessaw servizzi oħra speċjalizzata li jista’ jkollhom bżonn, u anke ngħinuhom isibu għajnuna materjali jew finanzjarja f’każ ta’ bżonn.”
Pajjiżna huwa wkoll wieħed mill-pajjiżi li rratifika l-Konvenzjoni tal-Kunsill Ewropew dwar il-prevenzjoni u l-ġlieda kontra l-vjolenza fuq in-nisa u l-vjolenza domestika, magħrufa bħala l-konvenzjoni ta’ Istanbul. Fl-aħħar xhur il-Gvern nieda konsultazzjoni pubblika dwar l-abbozz dwar il-vjolenza abbażi tal-ġeneru u vjolenza domestika.
Fost l-iktar proposti importanti, hemm l-introduzzjoni ta’ ordnijiet ta’ protezzjoni b’emerġenza. Il-Pulizija, meta jaraw li l-vittma tkun qiegħdha f’sogru imminenti jekk min hu vjolenti jibqa’ taħt l-istess saqaf, jistgħu joħorġu lil min ikun vjolenti mir-residenza komuni tagħhom b’mod temporanju. Dan bil-ħsieb li m’għandhiex tkun il-vittma li jkollha toħroġ minn darha stess, speċjalment wara li tkun għaddiet minn esperjenza trawmatizzanti.
