Hekk kif aktar tard din is-sena mistennija tibda l-World Cup fil-Qatar, diġà ħareġ l-album tal-istickers marbut mal-avveniment, liema album huwa magħruf li jservi ta’ passatemp għal numru kbir ta’ Maltin u Għawdxin.
Però dan il-passatemp huwa wieħed li jeħtieġ somma ta’ flus sinifikanti, hekk kif b’670 sticker differenti, il-probabbilità hi li wieħed żgur mhux forsi se jsib id-dupplikati.
Filfatt skont analista, album wieħed jaf jiswa mad-€990.
Dan il-passatemp imur lura sas-sena 1970 fil-World Cup li saret fil-Messiku.
Minkejja li din is-somma hija waħda sinifikanti, din mistennija li se tkompli togħla fis-snin li ġejjin, hekk kif fil-World Cup tal-elfejn sitta u għoxrin, in-numru ta’ timijiet li jipparteċipaw se jkun tmienja u erbgħin, minflok it-tnejn u tletin li jeżistu bħalissa.
