Il-Gvern ireaġixxa għat-tbassir tal-Kummissjoni Ewropea għall-Ħarifa u nnota li fl-2016 Malta se jkollha l-ogħla rata ta’ tkabbir ekonomiku fost il-pajjiżi kollha taż-żona ewro. “Dan wara li, għal darba oħra, l-esperti tal-Kummissjoni Ewropea rrevedew ‘il fuq it-tbassir tagħhom għall-ekonomija ta’ pajjiżna. Fil-fatt, il-ġid nazzjonali issa mistenni jiżdied b’4.1%, jew aktar mid-doppju tal-medja tul l-amministrazzjoni preċedent,” qal il-gvern.
Il-gvern innota li fir-rapport tagħha, il-Kummissjoni ssostni li t-tkabbir ekonomiku se jkun xprunat minn investiment għoli kif ukoll minn żieda fil-konsum tal-familji. L-esperti tal-Unjoni Ewropea rrimarkaw li ‘economic sentiment still above the long-term average’, filwaqt li ‘growth is to continue to be based on strong labour market fundamentals – robust job creation and low unemployment’.
“Minflok jaraw bozoz ħomor, l-esperti tal-Kummissjoni Ewropea qed ibassru li din is-sena, il-potenzjal tal-ekonomija Maltija se jikber bi kważi 5% u jibqa’ ’l fuq minn 4% għas-sentejn li ġejjin. B’hekk, pajjiżna mistenni jkollu l-akbar tkabbir fil-potenzjal ekonomiku minn fost il-pajjiżi kollha tal-Unjoni Ewropea għal tliet snin konsekuttivi. Dan jirrifletti fost l-oħrajn il-fatt li, mill-bidla fl-amministrazzjoni, pajjiżna dejjem kellu l-akbar rata ta’ żieda fl-impjiegi fost il-pajjiżi kollha tal-Unjoni Ewropea,” żid il-gvern.
Għal darba oħra, il-Kummissjoni Ewropea kellha tbaxxi t-tbassir tagħha għar-rata ta’ qgħad f’pajjiżna. Filwaqt li sa ftit xhur ilu kienet qed tbassar 5.1% fl-2016, din issa ġiet riveduta ’l isfel għal 5%. Ta’ min ifakkar li, fl-2012, ir-rata ta’ qgħad f’Malta kienet ta’ 6.3%.
Il-gvern kompla jinnota li filwaqt li l-Oppożizzjoni tipprova tbeżża’ li m’hawnx biżżejjed investiment f’pajjiżna, ir-rapport tal-Kummissjoni jsostni li ‘the launching of additional investment projects could pose an upside risk to these projections’. Dan ifisser li, skont dawn l-esperti, huwa probabbli li l-investiment jiżdied aktar milli qed ibassru. Dan meta t-tkabbir fl-investiment diġà ġie rivedut ’il fuq għal 4% u 5% din is-sena kif ukoll id-dieħla, imqabbel mat-tbassir preċedenti ta’ żieda ta’ 1% u 3% biss.
It-tkabbir ekonomiku qed jirriżulta fi dħul aħjar għall-familji tagħna. Skont il-Kummissjoni Ewropea, din is-sena l-paga reali se tkun tjiebet b’1.9%, jew kważi d-doppju tal-medja taħt l-amministrazzjoni preċedenti.
“Filwaqt li l-Oppożizzjoni tgħid li l-ispiża tal-Gvern hija għolja wisq, il-Kummissjoni qed tbassar li fl-2016 din se tkun 40.7% tal-ġid nazzjonali, jew kważi 2 punti perċentwali anqas mir-rata fl-aħħar sena tal-gvern preċedenti,” kompla jkun spjegat.
Id-defiċit fl-2016 hu mbassar li jkun ta’ 0.7% tal-ġid nazzjonali, l-inqas livell osservat fl-istorja, u kwint dak li ħalliet warajha l-amministrazzjoni ta’ qabel. Il-piż tad-dejn nazzjonali mistenni jaqa’ taħt is-60% s-sena d-dieħla, l-inqas mill-1998 ’l hawn, li jfisser li f’leġiżlatura waħda l-Gvern se jkun ġab fix-xejn iż-żieda fil-piż finanzjarju tad-djun li wettqu tliet amministrazzjonijiet Nazzjonalisti.
“Dan huwa ċertifikat eċċellenti li juri li, permezz tal-bidla fid-direzzjoni fl-2013, pajjiżna llum qed jikseb ġid li jasal għand kulħadd u permezz tal-Budget 2017, il-Gvern se jkompli jaħdem favur il-familji u n-negozji,” temmet tgħid l-istqarrija.
