Il-grupp mużikali lokali Kapitlu Tlettax nieda kanzunetta ġdida bl-isem ‘Għidli Min’ fl-okkażjoni speċjali taż-żwieġ ta’ Glenn Vella u Katia Vassallo – koppja li minn dejjem kellhom għal qalbhom il-mużika, b’mod speċjali, il-mużika oriġinali bil-Malti.
Il-kanzunetta kienet xewqa ta’ Katia, li mhux biss permezz tagħha riedet tagħti sorpriża lill-għażiż tagħa, iżda biex din id-diska tibqa’ tfakkarhom fil-jum tat-tieġ tagħhom.
Permezz ta’ din id-diska, Kapitlu Tletta ikkollabora għall-ewwel darba mal-kantanta popolari Maltija Jessica, fejn sostniet li meta ġiet mistiedna biex tkanta, aċċettat mal-ewwel, għax it-tema tal-imħabba hi tema li tħobb tkanta fuqha.
Din hija t-tieni silta ta’ imħabba għas-sena 2024 iżda hija t-tielet waħda oriġinali għal Kapitlu Tlettax, wara s-suċċess tal-kanzunetti ‘Lilek Biss’ u ‘Rita’. Il-kanzunetta ‘Għidli Min’, li għandha produzzjoni ta’ Cyprian Cassar, hi disponibbli fuq il-pjattaformi ta’ Youtube u Facebook.
