Magħruf bħala l-Maltese Falcon, Marty Rivers hu kantant Malti tal-mużika Country, li bħalissa qed jikseb fama fl-Istati Uniti tal-Amerka. Dan hekk kif il-vidjow mużikali tal-kanzunetta tiegħu bl-isem ‘Don’t Ever Say Goodbye’ bħalissa tinsab fl-ewwel post fiċ-charts f’California grazzi għas-CMC Music Channel.
ONE News tkellem ma’ Marty fejn spjegalna kif lanqas seta’ jemmen li kien jinsab fil-quċċata ta’ din il-klassifika speċjalizzata.
Qal kif għalih hu unur kbir hekk kif hu mhuwiex biss l-uniku artist Malti, li wasal f’din il-klassifika, iżda hi n-norma li fiha ġeneralment ikun hemm biss kantanti Amerikani ta’ dan il-ġeneru ta’ mużika u rarament jidħol barrani.
Spjegalna kif il-ħidma tiegħu mhux se tkun qed tieqaf hawnhekk u mistenni joħroġ aktar mużika ġdida.
Dan il-vidjow mużikali diġà deher aktar minn darba fuq il-programm Country Fix li jintwera fuq għadd kbir ta’ stazzjonijiet oħrajn madwar l-Amerka, stazzjonijiet li wħud minnhom huma bbażati fi bliet bħal New York u Las Vegas.
Mistoqsi dwar x’inhu l-appell tiegħu għal min jixtieq jimraħ f’dan il-qasam tal-mużika, Marty qalilna kif wieħed għandu jibqa’ ffokat u ma jaqtax qalbu.
