Il-Ħadd ġiet fit-tmiema r-raba ġurnata tal-Kampjonat Premier bit-tlett partiti oħra li komplew jikkonfermaw il-bidu mill-aqwa ta’ Birkirkara FC u Hamrun Spartans FC.
Ir-raba ġurnata mill-Kampjonat Premier bdiet il-ġimgħa fejn komplew is-sensiela ta’ riżultati pożittivi ta’ Gudja United meta bla wisq tbatija għelbu lill-Żebbuġ Rangers 2 – 1 Din kienet it-tielet rebħa staġjonali ta’ Gudja u għalhekk bħalissa qed jokkuppaw it-tielet post tal-klassifika tal-Kampjonat Premier b’total ta’ 10 punti.
Fl-aktar partita mistennija tat-tmiem il-ġimgħa Floriana FC għelbu lill-ġirien Valletta FC 1 – 0 f’partita li kienet destinata għal draw ta’ mingħajr gowls iżda erba minuti mit-tmiem Reid tefa fix-xibka tat-tim mill-kapitali. Għal Valletta din kienet l-ewwel telfa tal-staġun.
Rebħiet importanti fil-ġurnata tas-Sibt ġew irreġistrati minn Mosta u Hamrun Spartans. Wara t-telfa kontra Hibernians fil-ġimgħa ta’ qabel, Mosta għelbu lill-Pieta Hotspurs 4 – 1 biex ħallew lil dawn tal-aħħar ankrati fl-aħħar post tal-klassifika u r-reġistraw it-tieni rebħa staġjonali. B’gowl kull taqsima kontra Sirens FC, anke Hamrun irreġistraw ir-raba rebħa tagħhom biex issa qed jaqsmu l-ewwel post ma’ Birkirkara FC. Il-bidu ta’ Sirens żgur mhuwiex dak mixtieq hekk kif s’issa għadhom akkwistaw biss żewġ punti.
Il-Ħadd, Balzan ġew minn wara biex dawru telfa f’rebħa meta għelbu lill-Marsaxlokk 2 – 1 u b’hekk irregistraw it-tielet rebħa staġjonali u ħallew lill-stess Xlukkajri b’punt wieħed biss s’issa. Anke Gżira United irritornaw għar-rebħ meta għelbu liċ-ċampjins renjanti 2 – 1. Għaċ-ċampjins din kienet it-tieni telfa f’erba partiti.
Fl-aħħar partita mir-raba ġurnata, Birkirkara FC skorjaw erba gowls fit-tieni taqsima biex komplew jikkonfermaw il-mument brillanti li għaddejjin minnhu. Din it-telfa kienet ir-raba waħda għal Santa Lucia FC li s’issa jidher li l-Kampjonat Premier qed ikun diffiċli ħafna għalihom.
