Slovenja 10-8 Malta
(2-2) (4-3) (2-1) (2-2)
It-team nazzjonali malti tal-Waterpolo tilef il-logħba ta’ klassifikazzjoni għat-13/14 -il post kontra s-Slovenja bl-iskor ta’ 10-8. B’hekk it-team malti tilef iċ-ċans li jerġa jikteb l-istorja u jirrepeti l-14-il post miksub sentejn ilu jew saħansitra jtejjbu. B’hekk issa l-maltin se jkollhom jilgħabu l-logħba ta’ klassifikazzjoni għall-15 jew is-16 -il post. Dik tal-lum kienet logħba fejn il-maltin bdew tajjeb, biss aktar ma għadda l-ħin ċedew l-inizjattiva.
Għal-logħba tal-lum irritornaw Nicholas Bugelli u Liam Galea. Min-naħa l-oħra Mark Castillo kellu jiskonta t-tieni logħba sospensjoni filwaqt li Sam Gialanze baqa’ ma rkuprax minn influwenza li ħakmitu tant li se jkun qed jirritorna lura Malta. Huwa b’hekk se jitlef il-kumplament tal-kampjonat. Daqqa ta’ ħarta għall-kowc Milan Cirovic hekk kif Gialanze skorja ħames goals f’dan il-kampjonat ewropew.
L-ewwel sessjoni intemmet fi draw ta’ 2-2. Kienu s-sloveni li marru fil-vantaġġ proprju mal-ewwel attakk tal-logħba permezz ta’ Aleksander Cerar. Jayden Cutajar ġab l-iskor indaqs. Slovenja reġgħu marru fil-vantaġġ minn Aljaz Troppan. Lejn l-aħħar parti tas-sessjoni Liam Galea reġa’ għamel l-iskor indaqs.
Il-maltin ħarġu tajjeb u wara biss 30 sekonda marru fil-vantaġġ permezz ta’ Jayden Cutajar. Jake Muscat Melito kabbar il-vantaġġ għat-team malti. Il-captain sloven Jasa Kadivec naqqas id-distakk. Aljaz Troppan għamilhom 4-4. Jake Cachia reġa’ poġġa lil Malta fil-vantaġġ, biss l-avversarji irreaġixxew tajjeb tant li skurjaw żewġ goals oħra permezz ta’ Aljaz Troppan biex għalqu s-sessjoni minn fuq.
Il-plejers tagħna tilfu l-konċentrazjoni fit-tielet sessjoni. Sessjoni li ntrebħet mis-sloveni 2-1. Slovenja skurjaw żewġ goals fl-ewwel parti tas-sessjoni bil-maltin dehru jbatu sabiex isibu x-xibka u jnaqqsu d-distakk. Huma rnexxielhom jiskurjaw fl-aħħar sekondi tas-sessjoni minn penalty ta’ Jayden Cutajar.
Il-maltin naqqsu li jsalvaw ir-riżultat fl-aħħar sessjoni, sessjoni li ntemmet fi draw ta’ 2-2. Kienu l-avversarji li skurjaw l-ewwel żewġ goals f’din is-sessjoni, bil-maltin jiskurjaw iż-żewġ goals tagħhom lejn l-aħħar tal-logħba. Goals li waslu minn Jayden Cutajar u Jake Cachia.
Il-maltin issa jerġgħu ikunu fl-azzjoni fil-finali għall-15/16 -il post nhar is-sibt fil-11.15 ta’ filgħodu kontra l-Iżrael.
Formazzjoni (Malta):
Jake Tanti (captain), Nicholas Bugelli, Liam Galea (1), Gianni Farrugia, Jake Cachia (2), Jake Bonavia, Jake Muscat Melito (1), Jayden Cutajar (4), Jeremy Abela, Nikolai Zammit, Darren Zammit, Matthias Azzopardi, Benjamin Busuttil.
